കുട്ടികള്‍ കളിക്കുന്നതിനിടെ അങ്കണവാടി കെട്ടിടത്തിന്റെ ഭിത്തി ഇടിഞ്ഞു വീണ് ഗുരുതരമായി പരുക്കേറ്റ മൂന്നര വയസ്സുകാരന്‍ ആശുപത്രിയില്‍. ആ സമയം അങ്കണവാടിയിലുണ്ടായിരുന്ന മറ്റൊരു കുട്ടിയും ഹെല്‍പറും രക്ഷപ്പെട്ടത് അദ്ഭുതകരമായി .

കായിക്കരയില്‍ നഗരസഭയിലെ 25-ാം വാര്‍ഡില്‍ പ്രവര്‍ത്തിക്കുന്ന 4ാം നമ്പര്‍ അങ്കണവാടിയുടെ ഭിത്തിയാണ് ഇടിഞ്ഞു വീണത്. വൈക്കം പോളശേരി മായിത്തറ അജീഷിന്റെ മകന്‍ ഗൗതമിനെയാണ് ആശുപത്രിയില്‍ പ്രവേശിപ്പിച്ചത്. സാരമായ പരുക്കേറ്റ കുട്ടി മെഡിക്കല്‍ കോളജ് കുട്ടികളുടെ ആശുപത്രിയില്‍ (ഐസിഎച്ച്) ചികിത്സയിലാണ്. കുട്ടി അപകടനില തരണം ചെയ്തതായി ഡോക്ടര്‍മാര്‍ .

ഇന്നലെ രാവിലെ 10.30നാണു സംഭവം നടന്നത്. 12 കുട്ടികളുള്ള അങ്കണവാടിയില്‍ ഇന്നലെ 2 കുട്ടികളും ഹെല്‍പര്‍ എം.ജി.സിന്ധുവും മാത്രമാണുണ്ടായിരുന്നത്. കുട്ടികള്‍ ഭൂരിഭാഗവും എത്താതിരുന്നതിനാല്‍ വലിയ ഒരു അപകടം ഒഴിവായി.

കെട്ടിടത്തിനുള്ളില്‍ കുട്ടികള്‍ കളിക്കുന്നതിനിടെ ഒരു വശത്തെ ഭിത്തി വെളിയിലേക്കു തകര്‍ന്നു വീണു. ഭിത്തിയോടു ചേര്‍ന്നു നിന്നു കളിച്ചിരുന്ന ഗൗതമും ഭിത്തിയോടൊപ്പം വീണു.

ഗൗതമിന്റെ കണ്ണിനു താഴെയുള്ള അസ്ഥിക്ക് പൊട്ടല്‍ സംഭവിച്ചു. വലതു കാലില്‍ തുടയെല്ലിനും മുട്ടിനു താഴെ രണ്ടിടങ്ങളിലും പൊട്ടലുണ്ടായിട്ടുണ്ട്്. തലയോട്ടിയുടെ പുറത്തും പരുക്കേറ്റിട്ടുണ്ട്. ആന്തരികാവയവങ്ങള്‍ക്കു ക്ഷതമേറ്റതായും ഡോക്ടര്‍മാര്‍.
അതേസമയം വാടകക്കെട്ടിടത്തില്‍ 8 മാസം മുന്‍പാണ് അങ്കണവാടി പ്രവര്‍ത്തിച്ചു തുടങ്ങിയത്. ഈ കെട്ടിടത്തിനു നഗരസഭ ഫിറ്റ്നസ് സര്‍ട്ടിഫിക്കറ്റ് നല്‍കിയിട്ടില്ല.