സംസ്ഥാനത്തെ ഞെട്ടിച്ച യൂട്യൂബര്‍ ആക്രമണക്കേസില്‍ രണ്ടാം പ്രതി ദിയാസന തലസ്ഥാനത്തെ കോടതിയിലെത്തി ജാമ്യമെടുത്തു. വിചാരണക്കോടതിയായ തിരുവനന്തപുരം മൂന്നാം ജുഡീഷ്യല്‍ ഫസ്റ്റ് ക്ലാസ്സ് മജിസ്‌ട്രേട്ട് കോടതിയിലാണ് ദിയാസന രണ്ടു ജാമ്യക്കാര്‍ക്കൊപ്പം ഹാജരായത്.

ഇരുപത്തയ്യായിരം രൂപയുടെ പ്രതിയുടെ സ്വന്തവും തുല്യ തുകക്കുള്ള രണ്ടാള്‍ ജാമ്യ ബോണ്ടിലും കോടതി ജാമ്യമനുവദിച്ചു. അതേസമയം ജാമ്യ രേഖകള്‍ പരിശോധിക്കവേ പ്രതിയുടെ ഒന്നാം ജാമ്യക്കാരന്റെ സ്ഥാവര വസ്തുവിന്റെ കരം തീരുവ രേഖകളില്‍ കാണുന്ന പേരും ആധാര്‍ കാര്‍ഡ് പേരിലും വ്യത്യാസം കണ്ടതനാല്‍ രണ്ടും ഒരേ ആളാണെന്ന സാക്ഷ്യപത്രം ജൂണ്‍ 21 ന് ഹാജരാക്കാന്‍ മജിസ്‌ട്രേട്ട് അഭിനിമോള്‍ രാജേന്ദ്രന്‍ ഉത്തരവിട്ടു.




അതേ സമയം ഒന്നാം പ്രതി ഭാഗ്യലക്ഷ്മിയും മൂന്നാം പ്രതി ശ്രീലക്ഷ്മി അറക്കലും ഹാജരാകാന്‍ സമയം തേടി. പ്രതികള്‍ 3 പേരും 21 ന് ഹാജരാകാന്‍ കോടതി ഉത്തരവിട്ടു. പ്രതികളായ ഫെമിനിസ്റ്റും സിനിമാ ഡബ്ബിംഗ് ആര്‍ട്ടിസ്റ്റുമായ ഭാഗ്യലക്ഷ്മിയടക്കം 3 പ്രതികള്‍ ഹാജരാകാന്‍ കോടതി ഉത്തരവിട്ടിരുന്നു.


യൂട്യൂബര്‍ വിജയ്. പി. നായരെ തമ്പാനൂര്‍ ലോഡ്ജ് മുറിയില്‍ അതിക്രമിച്ചു കടന്ന് ഭവനഭേദനം നടത്തി അസഭ്യം വിളിക്കുകയും ദേഹോപദ്രവം ഏല്‍പ്പിക്കുകയും കൈയ്യേറ്റം ചെയ്യുകയും മഷി ദേഹത്തൊഴിക്കുകയും അടിവസ്ത്രത്തിനകം ചൊറിഞ്ഞനം തേക്കുകയും ചെയ്ത കേസിലെ പ്രതികളായ ഫെമിനിസ്റ്റുകളായ ഭാഗ്യലക്ഷ്മി, വെമ്പായം സ്വദേശിനി ദിയ സന , കണ്ണൂര്‍ സ്വദേശിനി ശ്രീലക്ഷ്മി അറയ്ക്കല്‍ എന്നിവരാണ് ഹാജരാകേണ്ടത്.




പ്രതികള്‍ ഇനി വിചാരണ നേരിടണം. തമ്പാനൂര്‍ പോലീസ് കുറ്റപത്രം സമര്‍പ്പിച്ചതിനെ തുടര്‍ന്നാണ് വിചാരണക്കായി പ്രതികളെ ഹാജരാക്കാന്‍ കോടതി ആവശ്യപ്പെട്ടിരിക്കുന്നത്. തമ്പാനൂര്‍ പോലീസ് കേസ് അട്ടിമറിക്കാന്‍ ശ്രമിക്കുന്നതിനാല്‍ കേസന്വേഷണം കോടതിയുടെ നിരീക്ഷണത്തിലാക്കണം എന്നാവശ്യപ്പെട്ട് ന്യൂഡെല്‍ഹി ആസ്ഥാനമായ മെന്‍സ് റൈറ്റ്‌സ് അസോസിയേഷന്‍ ഓഫ് ഇന്ത്യ അഡ്വ. നെയ്യാറ്റിന്‍കര. പി. നാഗരാജ് മുഖേന സമര്‍പ്പിച്ച നിരീക്ഷണ ഹര്‍ജി സമര്‍പ്പിച്ചിരുന്നു.


ഹര്‍ജിയില്‍ കോടതി അന്വേഷണ തല്‍ സ്ഥിതിയുടെ പീരിയോഡിക്കല്‍ റിപ്പോര്‍ട്ടുകള്‍ വിളിച്ചു വരുത്തിയതോടെയാണ് പോലീസ് കുറ്റപത്രം സമര്‍പ്പിച്ചത്.