ബോളിവുഡ് മുൻനിര താരങ്ങളിൽ ഒരാളാണ് കത്രീന കൈഫ്. തിളങ്ങുന്ന ചർമ്മവും അകാരവടിവും കൊണ്ട് പ്രേക്ഷകരെ ഏറെ സ്വാധീനിച്ച താരം. കഴിഞ്ഞ ദിവസമായിരുന്നു കത്രീന കെെഫിന്റെ 43ാം പിറന്നാൾ. സഹപ്രവർത്തകരും ആരാധകരും താരത്തിന് പിറന്നാൾ ആശംസകളുമായി എത്തിയിരുന്നു.

കരിയറിന്റെ തുടക്കത്തില്‍ വലിയ പരാജയങ്ങള്‍ ഏറ്റുവാങ്ങേണ്ടി വന്ന കത്രീന പക്ഷെ പിന്നീട് ബോളിവുഡിലെ ഭാഗ്യനായികയായി വളരുകയായിരുന്നു. നടൻ വിക്കി കൗശലാണ് കത്രീനയുടെ ഭർത്താവ്. മകന്റെ ജനനത്തോടെ സിനിമ രംഗത്ത് നിന്നും നടി ഇടവേളയെടുത്തിരിക്കുകയാണ്. തീർത്തും സ്വകാര്യമായ ജീവിതമാണ് കത്രീനയും വിക്കി കൗശലും നയിക്കുന്നത്. മകന്റെ ഫോട്ടോ ഇതുവരെ താരദമ്പതികൾ പുറത്ത് വിട്ടിട്ടില്ല എന്നതും ശ്രദ്ധേയമാണ്.

കത്രീന വന്ന ശേഷം തന്റെ ജീവിതത്തിലുണ്ടായ നല്ല മാറ്റങ്ങളെക്കുറിച്ച് മുമ്പൊരിക്കൽ വിക്കി കൗശൽ സംസാരിച്ച വാക്കുകളാണ് ഇപ്പോൾ വൈറലാകുന്നത്. ജീവിതത്തിൽ ഒരുപാട് സന്തോഷമുണ്ട്. ഞങ്ങൾക്കെപ്പോഴും ഒരു മകളെ വേണമെന്നുണ്ടായിരുന്നു. ഇപ്പോൾ ഒരു മകളെ ലഭിച്ചെന്നാണ് എന്റെ അച്ഛനും അമ്മയും പറയുന്നത്. വിവാഹ ജീവിതം വളരെ മനോഹരമാണെന്നും വിക്കി കൗശൽ അന്ന് പറഞ്ഞിരുന്നു.

വിവാഹത്തിന്റെ സമയത്ത് വിക്കിയുടെ സര ഹക്തെ സര ബച്കെ എന്ന സിനിമയുടെ ഷൂട്ടിം​ഗ് നടന്ന് കൊണ്ടിരിക്കുകയായിരുന്നു. സിനിമയുടെ 50 ശതമാനം ഷൂട്ട് പൂർത്തിയാക്കി. എന്നാൽ വിവാഹം കഴിഞ്ഞ് രണ്ട് ദിവസത്തിനുള്ളിൽ ഷൂട്ടിം​ഗിന് തിരികെ വരണമെന്ന് ആവശ്യപ്പെട്ടു. ഇതോടെ കത്രീന തന്നെ ഭീഷണിപ്പെടുത്തിയെന്നും വിക്കി തമാശയോടെ ഒരിക്കൽ പറഞ്ഞിരുന്നു.

രണ്ട് ദിവസത്തിനുള്ളിൽ സെറ്റിൽ പോകണമെങ്കിൽ വിവാഹം ചെയ്യേണ്ടെന്നാണ് കത്രീന പറഞ്ഞതെന്നും വിക്കി കൗശൽ അന്ന് പറഞ്ഞു. വിവാഹ ശേഷം സന്തോഷകരമായ ജീവിതം നയിക്കുകയാണ് കത്രീനയും വിക്കിയും. 2021 ഡിസംബറിൽ രാജസ്ഥാനിൽ വെച്ച് വിവാഹിതരായ കത്രീനയും വിക്കിയും തങ്ങളുടെ സ്വകാര്യ നിമിഷങ്ങൾക്ക് എന്നും പ്രാധാന്യം നൽകിയിരുന്നു.