കൈ പിടിച്ചു നല്‍കാനും എത്തിയില്ല..... 37 ദിവസം അച്ഛനെത്തുമെന്ന് പ്രതീക്ഷയോടെയിരുന്ന മകള്‍ കല്ല്യാണമണ്ഡപത്തില്‍ നിറകണ്ണുകളുമായി..... ഒടുവില്‍ അച്ഛന്റെ അനുഗ്രഹം ഒപ്പമുണ്ടെന്ന ഉറപ്പില്‍ വനംവാച്ചര്‍ രാജന്റെ മകള്‍ രേഖ വിവാഹിതയായി.

37 ദിവസം പ്രതീക്ഷയോടെ അച്ഛനെ കാത്തിരുന്ന മകളുടെ കല്യാണത്തിന് വനം വാച്ചര്‍ രാജനെത്തിയില്ല. കല്യാണം ക്ഷണിക്കാനായി അവധിക്ക് വരുമെന്ന് പറഞ്ഞ് കാടുകയറിയ രാജന്‍ മകളുടെ കല്യാണത്തിനെങ്കിലും വേദിയിലെത്തുമെന്ന പ്രതീക്ഷയാണ് ഇതോടെ പൊലിഞ്ഞത്.

രേഖയുടെ വരന്‍ മണ്ണാര്‍ക്കാട് സ്വദേശി നിഖിലാണ് .അച്ഛന്റെ സ്ഥാനത്ത് ചെറിയച്ഛന്‍ സുരേഷ്ബാബുവാണ് കൈപിടിച്ച് വരന് നല്‍കിയത്. കഴിഞ്ഞ മെയ് മൂന്നാം തിയതിയാണ് സൈരന്ധ്രിയിലെ വാച്ചര്‍ പുളിക്കഞ്ചേരി രാജനെ കാണാതാകുന്നത്.

സൈലന്റ് വാലി, സൈരന്ധ്രിയിലെ വാച്ചര്‍ രാജന്‍ അന്ന് രാത്രി ഭക്ഷണം കഴിച്ച് സമീപത്തെ ക്യാമ്പ് റൂമിലേക്ക് പോയതാണ്. പിന്നീട് ഇതുവരെ ആരും രാജനെ കണ്ടിട്ടില്ല.

വനംവകുപ്പ് , തണ്ടര്‍ബോള്‍ട്ട് , പോലീസ്, സ്നിഫര്‍ ഡോഗ്, ഡ്രോണ്‍ അടക്കമുള്ള സര്‍വ്വ സന്നാഹങ്ങളും ഉപയോഗിച്ച് ദിവസങ്ങളോളം നടത്തിയ തിരച്ചിലിലും രാജനെ കണ്ടെത്താനായിട്ടില്ല.

അതേസമയം രാജനെ സമ്മര്‍ദ്ദത്തിനു വേണ്ടിയോ, കാട്ടിലെ ഊടുവഴികളും സുരക്ഷാപാതകളും മനസിലാക്കുന്നതിനോ വേണ്ടിയോ ഭീകരര്‍ തട്ടിക്കൊണ്ടു പോയതാണെന്നുള്ള സംശയം ശക്തമാകുന്നു.