ആയുധ മേഘലയില്‍ ഇന്ത്യ തിളങ്ങുന്നു; ബ്രഹ്മോസ് വാങ്ങാന്‍രാജ്യങ്ങളുടെ ക്യൂ..
ഇന്ത്യയില്‍ നിന്ന് ബ്രഹ്മോസ് മിസൈലുകള്‍ ഇറക്കുമതി ചെയ്യുന്ന രണ്ടാമത്തെ ആസിയാന്‍ അംഗരാജ്യമായി ഇന്തോനേഷ്യ. ഈ വര്‍ഷം അവസാനമോ അടുത്ത വര്‍ഷം ആദ്യമോ കരാറില്‍ ഇന്ത്യയും ഇന്തോനേഷ്യയും ഒപ്പുവച്ചേക്കും. കിഴക്കനേഷ്യന്‍ രാജ്യങ്ങളുമായി ഇന്ത്യയുടെ ബന്ധം ഊട്ടിയുറപ്പിക്കുവാന്‍ ആയുധ ഇടപാടിലൂടെ കഴിയും. ബ്രഹ്മോസ് മിസൈലില്‍ ഇന്ത്യോനേഷ്യ താത്പര്യം പ്രകടിപ്പിക്കുന്നതായി വര്‍ഷങ്ങള്‍ക്ക് മുന്‍പേ അഭ്യൂഹങ്ങളുണ്ടായിരുന്നു. 2018 ജനുവരിയില്‍ ന്യൂഡല്‍ഹിയില്‍ നടന്ന ആസിയാന്‍ ഇന്ത്യ ഉച്ചകോടിക്കിടെയായിരുന്നു ഇത് സംബന്ധിച്ച റിപ്പോര്‍ട്ടുകള്‍ പുറത്ത് വന്നത്. എന്നാല്‍ തെക്ക് കിഴക്കനേഷ്യന്‍ രാജ്യങ്ങളില്‍ ഫിലിപ്പീന്‍സാണ് ഇന്ത്യയുടെ കരുത്തനെ ആദ്യം സ്വന്തമാക്കിയത്. 374.96 ദശലക്ഷം യുഎസ് ഡോളറിന്റെ കരാറാണ് ആയുധ കൈമാറ്റത്തിനായി ഫിലിപ്പീന്‍സ് ഇന്ത്യയുമായി ഒപ്പുവച്ചത്.
യുദ്ധക്കപ്പലുകളില്‍ നിന്നും വിക്ഷേപിക്കുന്ന ബ്രഹ്മോസ് മിസൈലുകളാണ് ഇന്തോനേഷ്യ വാങ്ങാന്‍ തയ്യാറെടുക്കുന്നത്. ബ്രഹ്മോസ് എയ്‌റോസ്‌പേസില്‍ നിന്നുള്ള സംഘം ഇതിനകം ഇന്തോനേഷ്യന്‍ കപ്പല്‍ശാല സന്ദര്‍ശിച്ചു വിലയിരുത്തല്‍ നടത്തി. ശബ്ദത്തിന്റെ മൂന്നിരട്ടി വേഗതയില്‍ പറക്കാന്‍ സാധിക്കുന്ന ഹ്രസ്വ ദൂര റാംജെറ്റ് സൂപ്പര്‍സോണിക് ക്രൂയിസ് മിസൈലാണ് ബ്രഹ്മോസ്. വിമാനം, കപ്പലുകള്‍, ലാന്‍ഡ് പ്ലാറ്റ്‌ഫോമുകള്‍, അന്തര്‍വാഹിനികള്‍ എന്നിവയില്‍ നിന്ന് വിക്ഷേപിക്കാന്‍ കഴിയും.
ആസിയാന്‍ രാജ്യങ്ങളിലെ മറ്റ് അംഗങ്ങളും ഇന്ത്യന്‍ കരുത്തനെ സ്വന്തമാക്കാന്‍ ആഗ്രഹിക്കുന്നുണ്ട്. സിംഗപ്പൂര്‍, തായ്‌ലന്‍ഡ്, വിയറ്റ്‌നാം എന്നീ രാജ്യങ്ങളും ഇതിനായി കരുക്കള്‍ നീക്കുന്നുണ്ട്. ഈ മേഖലയിലെ മിക്ക രാഷ്ട്രങ്ങളും തങ്ങളുടെ മേഖലയിലെ ചൈനീസ് ഇടപെടലില്‍ അസ്വസ്ഥരാണ്. അതിനാല്‍ ഈ രാജ്യങ്ങള്‍ ബ്രഹ്മോസ് കരുത്ത് നേടിയാല്‍ അത് ചൈനയ്ക്കാവും ഏറെ ഭീഷണിയാവുക. ബ്രഹ്മോസിന് പുറമേ ഇന്ത്യയുടെ ആകാശ് മിസൈലും സ്വന്തമാക്കാന്‍ വിയറ്റ്‌നാം ഏറെ ആഗ്രഹിക്കുന്നുണ്ട്. ബ്രഹ്മോസ് മിസൈലിനായി മലേഷ്യയുമായി ചര്‍ച്ചകള്‍ പ്രാരംഭ ഘട്ടത്തിലാണ്.
ആസിയാന്‍ രാഷ്ട്രങ്ങളുമായി ആയുധ ഇടപാട് നടത്തുന്നത് മേഖലയില്‍ തന്ത്രപരമായ ഇടപെടല്‍ നടത്തുന്നതിനും, ഒപ്പം സമ്പന്ന രാഷ്ട്രങ്ങളുമായുള്ള ഇടപെടലിലൂടെ അത് ഇന്ത്യന്‍ സമ്പദ്‌വ്യവസ്ഥയ്ക്ക് ഉത്തേജനവുമാവും. ഇന്ത്യ റഷ്യ സംയുക്ത സംരംഭമായ ബ്രഹ്മോസ് ഇന്ത്യയ്ക്ക് മറ്റൊരു രാജ്യത്തിന് നല്‍കണമെങ്കില്‍ റഷ്യയുടെ സമ്മതം അത്യാവശ്യമാണ്.
https://www.facebook.com/Malayalivartha
