വൃദ്ധയെ പരിപാലിക്കാൻ എത്തി 21 പവൻ സ്വർണ ആഭരണം മോഷ്ടിച്ച കേസിൽ ഹോം നഴ്സ് അറസ്റ്റിലായി. ആദി കടലായിയിലെ രേഖയുടെ വീട്ടിൽ ഭർതൃ മാതാവിനെ പരിപാലിക്കാൻ നിയോഗിച്ച കുടക് സ്വദേശിയായ പെന്നംപേട്ട അള്ളിക്കെട്ട് സീത കോളനിയിലെ കെ.ആർ.സൗമ്യ(33)യാണു പിടിയിലായത്. മാർച്ച് അവസാനവും ഏപ്രിൽ ആദ്യ ആഴ്ചയ്ക്കുള്ളിലുമാണ് ആഭരണങ്ങൾ നഷ്ടപ്പെട്ടത്.

അന്വേഷണത്തിനിടെ സൗമ്യയെ ചോദ്യം ചെയ്തെങ്കിലും താൻ അത്തരക്കാരിയല്ലെന്ന് പറഞ്ഞ് നിഷേധിക്കുകയായിരുന്നു. മേയ് മാസത്തോടെ ജോലി മതിയാക്കി നാട്ടിലേയ്ക്ക് മടങ്ങിയെങ്കിലും പോലീസ് ആഴ്ചകളോളം രഹസ്യമായി കുടകിലെ വീടും പരിസരവും നിരീക്ഷിക്കുകയായിരുന്നു.

യുവതിയുടേത് ആഡംബര ജീവിതമാണെന്ന് ഇതിനിടെ പോലീസ് മനസിലാക്കി. തനിക്ക് ലോട്ടറി അടിച്ചെന്നായിരുന്നു അയൽക്കാരോട് യുവതി പറഞ്ഞിരുന്നത്. വീട്ടിലെത്തിയ പോലീസ് സ്വർണം പണയം വച്ച റസീറ്റുകളും മറ്റും കണ്ടെത്തി. തുടർന്ന് കസ്റ്റഡിയിലെടുത്തു ചോദ്യം ചെയ്തതോടെ മോഷ്ടിച്ചെന്നു സമ്മതിക്കുകയായിരുന്നു.

കണിച്ചാറിലെ ഒരു വീട്ടിൽ നിന്നാണ് അറസ്റ്റ് ചെയ്തതെന്ന് കണ്ണൂർ സിറ്റി സിഐ കെ.കെ.രാജീവ് കുമാർ പറഞ്ഞു. എസ്ഐ എ.പി.രാജീവൻ, കെ.സ്നേഹേഷ്, വി.സജിത്ത്, കെ.കെ.ദീപ എന്നിവരും പൊലീസ് സംഘത്തിലുണ്ടായിരുന്നു.