ഇനിയെല്ലാം നേരിട്ട്... ഏതു ബില്‍ പാസാക്കിയാലും ബന്ധുനിയമനം അനുവദിക്കില്ലെന്ന് ഉറച്ച നിലപാടില്‍ ഗവര്‍ണര്‍; അധികാരത്തിലിരിക്കുന്നവരുടെ ബന്ധുക്കളെ സര്‍വകലാശാലകളില്‍ നിയമിക്കാന്‍ അനുവദിക്കില്ല; സര്‍വകലാശാലകളുടെ അന്തകനായി ഗവര്‍ണര്‍ മാറിയെന്ന് എംവി ജയരാജന്‍
ഗവര്‍ണര്‍ ആരിഫ് മുഹമ്മദ് ഖാന്‍ ഡല്‍ഹിയില്‍ നിന്നും തലസ്ഥാനത്ത് മടങ്ങിയെത്തി. ഇനിയെല്ലാം നേരിട്ടുള്ള അങ്കമാണ്. വന്ന വരവില്‍ തന്നെ ശക്തമായ മറുപടിയാണ് ഗവര്‍ണര്‍ നല്‍കിയത്. സര്‍വകലാശാലകളിലെ ബന്ധു നിയമന വിഷയത്തില്‍ സര്‍ക്കാരിനെതിരെ രൂക്ഷമായ വിമര്‍ശനം തുടര്‍ന്ന് ഗവര്‍ണര്‍. അധികാരത്തിലിരിക്കുന്നവരുടെ ബന്ധുക്കളെ സര്‍വകലാശാലകളില്‍ നിയമിക്കാന്‍ അനുവദിക്കില്ലെന്നു ഗവര്‍ണര്‍ പറഞ്ഞു.
നിയമസഭയ്ക്കു ബില്‍ പാസാക്കാനുള്ള അധികാരമുണ്ട്. ഏതു ബില്‍ പാസാക്കിയാലും സര്‍വകലാശാലകളുടെ സ്വയംഭരണം തകര്‍ക്കുന്ന നടപടികളോ വൈസ് ചാന്‍സലര്‍ ബന്ധുനിയമനം നടത്തുന്ന രീതിയോ അനുവദിക്കില്ല. നിയമപരമായും ഭരണഘടനാപരമായും തന്നില്‍ അര്‍പ്പിതമായ ജോലിയാണ് നിര്‍വഹിക്കുന്നത്.
കണ്ണൂര്‍ സര്‍വകലാശാലയില്‍ മുഖ്യമന്ത്രിയുടെ െ്രെപവറ്റ് സെക്രട്ടറി കെ.കെ.രാഗേഷിന്റെ ഭാര്യ പ്രിയാ വര്‍ഗീസിനു നിയമനം നല്‍കാനുള്ള തീരുമാനം പൊതുജനങ്ങള്‍ അറിഞ്ഞിട്ടും സര്‍ക്കാര്‍ പ്രതിരോധം തീര്‍ക്കുകയാണെന്ന് ഗവര്‍ണര്‍ പറഞ്ഞു. പ്രിയാ വര്‍ഗീസിന്റെ രാഷ്ട്രീയ നിയമത്തില്‍ ചാന്‍സലര്‍ എന്ന നിലയില്‍ ലജ്ജിക്കുന്നു. കണ്ണൂര്‍ സര്‍വകലാശാലയിലെ നിയമന വിഷയത്തില്‍ താനെടുത്ത നടപടി കോടതിയും ശരിവച്ചു.
ജനാധിപത്യവും ഭരണഘടനയും സംരക്ഷിക്കുമെന്നു പറയുമ്പോള്‍, തന്നില്‍ അര്‍പ്പിതമായ ചുമതല ശരിയായി നിര്‍വഹിക്കുന്നു എന്നാണ് മനസിലാക്കേണ്ടത്. മറ്റുള്ള ഭരണഘടനാ സ്ഥാപനങ്ങളില്‍ അതൃപ്തിയുണ്ടെന്നല്ല അതിന്റെ അര്‍ഥം. നിയമത്തിനു കീഴിലാണ് നമ്മളെല്ലാം ജീവിക്കുന്നത്. ഭരണഘടനയും നിയമവും അനുശാസിക്കുന്ന തരത്തില്‍ തീരുമാനമെടുക്കും.
എങ്ങനെ നടപടിയെടുക്കണമെന്ന് ആര്‍ക്കും നിര്‍ബന്ധിക്കാനാകില്ല. സര്‍വകലാശാല നിയമനങ്ങള്‍ യുജിസി ചട്ടങ്ങള്‍ അനുസരിച്ചാകണം എന്നു സുപ്രീംകോടതി പറഞ്ഞിട്ടുണ്ട്. സര്‍വകലാശാലകളുമായോ കോളജുകളുമായോ ബന്ധമുള്ളവര്‍ സേര്‍ച്ച് കമ്മിറ്റിയില്‍ പാടില്ല. എന്നാല്‍, ഹയര്‍ എജ്യുക്കേഷന്‍ കൗണ്‍സില്‍ വൈസ് ചെയര്‍നാണ് ഇവിടെ സേര്‍ച്ച് കമ്മിറ്റി ചെയര്‍മാന്‍. ചരിത്ര കോണ്‍ഗ്രസില്‍ തനിക്കെതിരെയുള്ള പ്രതിഷേധത്തിന്റെ ഗൂഢാലോചന നടന്നത് ഡല്‍ഹിയിലാണെന്നു ഗവര്‍ണര്‍ പറഞ്ഞു. വൈസ് ചാന്‍സലറും ഗൂഢാലോചനയില്‍ പങ്കാളിയാണെന്നും അദ്ദേഹം ആവര്‍ത്തിച്ചു.
അതേസമയം ഗവര്‍ണര്‍ക്കെതിരെ സിപിഎമ്മും ശക്തമായി രംഗത്തുണ്ട്. സര്‍വ്വകലാശാലകളുടെ അന്തകനായി ഗവര്‍ണര്‍ ആരിഫ് മുഹമ്മദ് ഖാന്‍ മാറിയെന്ന് സിപിഎം നേതാവ് എം വി ജയരാജന്‍ പറഞ്ഞു. ഗവര്‍ണര്‍ക്ക് മീഡിയ മാനിയ ആണ്. ഗവര്‍ണര്‍ക്ക് മനോരോഗമെന്ന് പറഞ്ഞാലും തെറ്റില്ലെന്നും അദ്ദേഹം പറഞ്ഞു. കേരള ഗവര്‍ണര്‍ക്കെതിരെ കണ്ണൂര്‍ സര്‍വ്വകലാശാലയുടെ സംരക്ഷണ കൂട്ടായ്മ ഉദ്ഘാടനം ചെയ്തു സംസാരിക്കുകയായിരുന്നു എം വി ജയരാജന്‍.
ഗവര്‍ണര്‍ കാരണം കാണിക്കല്‍ നോട്ടീസ് നല്‍കാതെ കാര്യങ്ങളില്‍ ഇടപെടുന്നത് നിയമ വിരുദ്ധമാണ്. അദ്ദേഹം നല്ല ബുദ്ധി നഷ്ടപ്പെട്ട് മനോരോഗത്തിനടിമയായി. സ്ഥലം മാറ്റിയാല്‍ മാറിപ്പോകേണ്ട വെറുമൊരു ഉദ്യോഗസ്ഥനാണ് ഗവര്‍ണര്‍. സര്‍ക്കാരിന്റെ തീരുമാനങ്ങളില്‍ ഒപ്പിടാന്‍ മാത്രം അനുവാദമുള്ളയാളാണ് ഗവര്‍ണര്‍. കാരണം കാണിക്കല്‍ നൊട്ടീസ് നല്‍കാതെ ഒരാള്‍ക്കതെിരെ നടപടിയെടുക്കുന്നത് നിയമ വിരുദ്ധമാണെന്നും എം വി ജയരാജന്‍ പറഞ്ഞു.
ഗവര്‍ണറുടെ സമനില തെറ്റിയിട്ടുണ്ടെന്നും ഇന്ന് എല്‍ഡിഎഫ് കണ്‍വീനര്‍ ഇ പി ജയരാജനും പറഞ്ഞിരുന്നു. അദ്ദേഹത്തിന് എന്തോ സംഭവിച്ചിട്ടുണ്ട് എന്നും ഇ പി ജയരാജന്‍ പറഞ്ഞു. ഗവര്‍ണര്‍ സ്ഥാനത്ത് ഇരിക്കാന്‍ ആരിഫ് മുഹമ്മദ് ഖാന്‍ യോഗ്യനല്ല. ഗവര്‍ണര്‍ ആര്‍ എസ് എസ് സേവകനായി മാറി പോയി. ഗവര്‍ണറുടെ നിയമനം എന്തിന്റെ പ്രത്യുപകാരമാണ്. ഫര്‍സീന്‍ മജീദ് ക്രിമിനല്‍ ആയതു കൊണ്ടാണ് ഭയം തോന്നുന്നത്. ക്രിമിനലുകള്‍ക്ക് എങ്ങനെയാണ് പൊലീസ് സംരക്ഷണം നല്‍കുക എന്നും ഇ പി ജയരാജന്‍ പറഞ്ഞു
"
https://www.facebook.com/Malayalivartha
