കല്യാണം വിളി തകൃതി... എല്ലാവരും കാത്തിരുന്ന ആര്യ സച്ചിന് വിവാഹം സെപ്റ്റംബര് നാലിന് എകെജി സെന്ററില്; സിപിഎമ്മിന്റെ യുവതലമുറയുടെ പ്രതീക്ഷകളായ ഇരുവരും തമ്മിലുള്ള വിവാഹം ആഘോഷമാക്കാന് പാര്ട്ടി; ആര്ഭാടങ്ങളൊന്നുമില്ലാത്ത ക്ഷണക്കത്തില് സച്ചിന്റെയും ആര്യയുടെയും പാര്ട്ടിയിലെ ഭാരവാഹിത്വം പറഞ്ഞ് പരിചയപ്പെടുത്തല്
ചിങ്ങമാസം കല്യാണമാസമാണ്. ഇത്തവണത്തെ കല്യാണങ്ങളില് മലയാളികള് എല്ലാവരും പങ്കെടുത്തില്ലെങ്കിലും മനസാ പങ്കെടുക്കുന്ന ഒരു കല്യാണമുണ്ട്. അതാണ് തിരുവനന്തപുരം കോര്പറേഷന് മേയര് ആര്യാ രാജേന്ദ്രനും ബാലുശേരി എംഎല്എ സച്ചിന് ദേവുമായുള്ള വിവാഹം. ഇവരുടെ വിവാഹം സെപ്റ്റംബര് നാലിന് നടക്കും.
എകെജി ഹാളില് വച്ച് രാവിലെ 11നാണ് കല്യാണം. എസ്എഫ്ഐ പ്രവര്ത്തകരായി തുടങ്ങിയ പരിചയമാണ് ഇരുവരും തമ്മിലുള്ള പുതു ജീവിതത്തിന് വഴിതുറക്കുന്നത്. ഏതാനും മാസം മുന്പ് ഇരുവരുടെയും വീട്ടുകാരും പാര്ട്ടി നേതാക്കളും ചേര്ന്ന് വിവാഹ നിശ്ചയം നടത്തിയിരുന്നു.
സിപിഎമ്മിന്റെ യുവതലമുറയുടെ പ്രതീക്ഷകളായ ഇരുവരും തമ്മിലുള്ള വിവാഹം ആഘോഷമാക്കാനുള്ള ഒരുക്കത്തിലാണ് പാര്ട്ടിയും.
സിപിഎം തിരുവനന്തപുരം ജില്ലാ കമ്മിറ്റിയാണ് വധുവിന് വേണ്ടി ക്ഷണക്കത്ത് തയാറാക്കിയിരിക്കുന്നത്. ആര്ഭാടങ്ങളൊന്നുമില്ലാത്ത ക്ഷണക്കത്തില് സച്ചിന്റെയും ആര്യയുടെയും പാര്ട്ടിയിലെ ഭാരവാഹിത്വം പറഞ്ഞാണ് പരിചയപ്പെടുത്തല്.
സിപിഎം കോഴിക്കോട് ജില്ലാ കമ്മിറ്റിയാണ് വരനു വേണ്ടി കത്ത് തയാറാക്കിയിരിക്കുന്നത്. 6ാം തീയതി കോഴിക്കോട് വെച്ച് വരന്റെ വക വിവാഹ സൗഹൃദ വിരുന്ന് നടക്കും. ടാഗോര് സെന്റിനറി ഹാളിലാണ് വിരുന്ന്. വൈകീട്ട് നാല് മണി മുതലാണ് വിരുന്ന്.
രാജ്യത്തെ ഏറ്റവും പ്രായം കുറഞ്ഞ മേയറും സംസ്ഥാന നിയമസഭയിലെ ഏറ്റവും പ്രായം കുറഞ്ഞ എം എല് എയുമാണ് വിവാഹിതരാകുന്നത്. ഇക്കഴിഞ്ഞ ഫെബ്രുവരിയിലായിരുന്നു ഇരുവരും വിവാഹം കഴിക്കാന് പോകുകയാണെന്ന വാര്ത്ത പുറത്തുവന്നത്. ബാലസംഘം മുതലുള്ള പരിചയമാണ് പ്രണയത്തിലേക്കും ഇപ്പോള് വിവാഹത്തിലേക്കും എത്തി നില്ക്കുന്നത്.
സച്ചിന് ദേവാണ് തന്നോട് ആദ്യമായി പ്രണയം പറഞ്ഞതെന്നാണ് ആര്യ വെളിപ്പെടുത്തിയത്. താന് മേയറാകുന്നതിനും മുന്പായിരുന്നു അതെന്നും ആര്യ ഒരു അഭിമുഖത്തില് പറഞ്ഞിരുന്നു. താത്പര്യം തോന്നിയപ്പോള് ആര്യയോട് പറയുകയായിരുന്നുവെന്നും തുടര്ന്ന് ആര്യയുടെ വീട്ടുകാരോട് അഭിപ്രായം ചോദിക്കുകയായിരുന്നുവെന്നും സച്ചിന് ദേവ് പറഞ്ഞിരുന്നു. മാര്ച്ച് ആറാം തീയതിയായിരുന്നു ഇരുവരുടേയും വിവാഹ നിഷ്ചയം നടന്നത്. തിരുവനന്തപുരത്ത് എ കെ ജി സെന്ററില് വെച്ചായിരുന്നു ചടങ്ങുകള്.
സി പി എം കോഴിക്കോട് ജില്ലാ കമ്മിറ്റി അംഗം കൂടിയാണ് സച്ചിന് ദേവ്. ആര്യ രാജേന്ദ്രന് എസ് എഫ് ഐ സംസ്ഥാന സമിതി അംഗവും സി പി എം ചാല ഏരിയാ കമ്മിറ്റി അംഗവുമാണ്. ഓള് സെയിന്റ്സ് കോളജില് വിദ്യാര്ഥിയായിരിക്കെ 21ാം വയസിലാണ് ആര്യ രാജേന്ദ്രന് തിരുവനന്തപുരം മേയറായത്. കോഴിക്കോട് നെല്ലിക്കോട് സ്വദേശിയാണ് സച്ചിന് ദേവ്. കഴിഞ്ഞ നിയമസഭ തിരഞ്ഞെടുപ്പില് ബാലുശേരിയിലെ കന്നി പോരാട്ടത്തില് 20,372 വോട്ടിന്റെ ഭൂരിപക്ഷത്തിലായിരുന്നു സച്ചിന് വിജയിച്ചത്.
ഇരുവരുടേയും വിവാഹം കെങ്കേമമാക്കാനുള്ള പുറപ്പാടിലാണ് പാര്ട്ടിക്കാര്. മേയറെന്ന നിലയില് ആര്യയും നിയമസഭാ സമ്മേളനം നടക്കുന്നതിനാല് സച്ചിനും തിരക്കിലാണ്. ഇതിനിടയിലെ ഒഴിവ് വേളകളില് കല്യാണം വിളിയും കല്യാണ വിശേഷങ്ങള് പങ്കുവയ്ക്കലും നടക്കുന്നുണ്ട്.
"
https://www.facebook.com/Malayalivartha