സംസ്ഥാനത്ത് പ്ലസ് വണ്‍ ക്ലാസുകള്‍ ഇന്ന് ആരംഭിക്കുമ്പോള്‍ ചാല ബോയ്സ് ഹയര്‍ സെക്കന്‍ഡറി സ്‌കൂളില്‍ ഇന്ന് പെണ്‍കുട്ടികള്‍ എത്തും. പെണ്‍കുട്ടികളുടെ പ്രവേശനോത്സവമാണ് ഇന്ന് നടക്കുക.

നാല് ദശാബ്ദത്തിന് ശേഷമാണ് ഈ വിദ്യാലയത്തിലേക്ക് പെണ്‍കുട്ടികള്‍ പഠിക്കാന്‍ എത്തുന്നത്. രാവിലെ 9.30 ഓടെ സ്വീകരണ സമ്മേളനം ആരംഭിക്കും. ഇതില്‍ ഗതാഗത മന്ത്രി ആന്റണി രാജുവും പങ്കെടുക്കും, മന്ത്രിയാണ് പെണ്‍കുട്ടികളെ സ്‌കൂളിലേക്ക് വരവേല്‍ക്കുന്നത്.

ഫലവൃക്ഷത്തൈകള്‍ നല്‍കി വിദ്യാര്‍ത്ഥിനികളെ സ്‌കൂളിലേക്ക് സ്വീകരിക്കും. ഇംഗ്ലീഷ്, മലയാളം, തമിഴ് മീഡിയങ്ങളില്‍ പ്രവര്‍ത്തിച്ചിരുന്ന ചരിത്രപ്രാധാന്യമുള്ള ഏക വിദ്യാലയമാണ് ചാല ഗവണ്‍മെന്റ് സ്‌കൂള്‍.

കുട്ടികളുടെ എണ്ണം കൂടിയപ്പോഴാണ് ഗേള്‍സ് സ്‌കൂള്‍, തമിഴ് സ്‌കൂള്‍, ബോയ്‌സ് സ്‌കൂള്‍ എന്നിങ്ങനെ മൂന്നായി തിരിച്ചത്. അത് വര്‍ഷങ്ങള്‍ക്ക് ശേഷം വീണ്ടും മിക്‌സഡ് സ്‌കൂള്‍ ആക്കി മാറ്റുകയാണ്. ആകെ 18 പെണ്‍കുട്ടികളാണ് സ്‌കൂളിലെ ലിസ്റ്റിലുള്ളത്. ഇതില്‍ 12 പേര്‍ അഡ്മിഷന്‍ നടപടിക്രമങ്ങള്‍ പൂര്‍ത്തിയാക്കിക്കഴിഞ്ഞു. ഇനിയും കൂടുതല്‍ വിദ്യാര്‍ത്ഥിനികള്‍ സ്‌കൂളിലേക്ക് എത്തുമെന്നാണ് പ്രതീക്ഷിക്കുന്നത്.