മലയാളി ആർപിഎഫ് വനിത കോൺസ്റ്റബിളിന് നേരെ ട്രെയിനിൽ വച്ച് ആക്രമണം. ട്രെയിനിൽ വച്ച് ഇവരെ വെട്ടിപ്പരിക്കേൽപ്പിക്കുകയായിരുന്നു. ചെന്നൈയിൽ സബർബൻ ട്രെയിനിൽ വച്ചായിരുന്നു കത്തികൊണ്ടുള്ള ആക്രമണം ഉണ്ടായത്. വടകര പുറമേരിയിലെ എൻഎൻ ആശിർവയ്ക്കാണ് (23) വെട്ടേറ്റത്.

ബുധനാഴ്ച രാത്രി ഒൻപതു മണിക്കാണ് സംഭവങ്ങളുടെ തുടക്കം. ചെന്നൈ ബീച്ചിൽ നിന്ന് വേളാച്ചേരിയിലേക്ക് പോകുകയായിരുന്നു സബർബൻ ട്രെയിൻ. ബീച്ച് റെയിൽവേ സ്റ്റേഷനിൽ നിന്ന് ട്രെയിൻ പുറപ്പെടുന്നതിന് മുന്നെ പിറകിലെ വനിതാ കോച്ചിൽ നിന്ന് ബഹളം കേട്ടു. അപ്പോൾ എന്താണ് സംഭവം എന്നറിയാൻ ആശിർവ അങ്ങോട്ടേക്ക് പോയി. മദ്യലഹരിയിലുള്ള യുവാവ് ലേഡീസ് കോച്ചിൽ കയറി ബഹളമുണ്ടാക്കുകയായിരുന്നു.

ഇയാളോട് യാത്രക്കാർ ഇറങ്ങിപ്പോകാൻ പറഞ്ഞു. പക്ഷേ ഇയാൾ അത് വകവച്ചില്ല. സുരക്ഷ ഡ്യൂട്ടിയിലുണ്ടായിരുന്ന ആശിർവ അങ്ങോട്ട് ചെന്ന് ഇയാളോട് ഇറങ്ങാൻ പറഞ്ഞു. എന്നാൽ അയാൾ അത് കേട്ടില്ല. വീണ്ടും ഇറങ്ങാൻ പറഞ്ഞപ്പോൾ ഇയാൾ കയ്യിലുണ്ടായിരുന്ന വലിയ കത്തിയെടുത്ത് ആശിർവയെ വെട്ടി. അപ്പോഴേക്കും തീവണ്ടി പുറപ്പെട്ടു.

വീണ്ടും ആക്രമിച്ചാലോ എന്ന് കരുതി ഇവർ രക്തം ഒലിപ്പിച്ചു കൊണ്ട് പ്ലാറ്റ്ഫോമിലേക്ക് ചാടി. പിന്നാലെ അക്രമിയും ചാടി എങ്കിലും അയാൾ രക്ഷപ്പെട്ടു. ആശിർവയെ പെരമ്പൂർ റെയിൽവേ ആശുപത്രിയിൽ പ്രവേശിപ്പിച്ചിരിക്കുകയാണ്. കത്തികൊണ്ടുള്ള വെട്ടിൽ കഴുത്തിലും നെഞ്ചിലും മുറിവേൽക്കുകയുണ്ടായി. വളരെയധികം നടുക്കുന്ന ഒരു സംഭവം തന്നെയാണ് ഇപ്പോൾ ഉണ്ടായിരിക്കുന്നത്.