ഓണക്കിറ്റ് വിതരണം വീണ്ടും തടസ്സപ്പെട്ടു. ഇ- പോസ് മെഷീന്‍ തകരാറിലായതിനെ തുടര്‍ന്നാണ് കിറ്റ് വിതരണം തടസ്സപ്പെട്ടത്. കഴിഞ്ഞ ദിവസവും മെഷീന്റെ തകരാറ് മൂലം കിറ്റ് വിതരണം തടസ്സപ്പെട്ടിരുന്നു. പിങ്ക് കാര്‍ഡ് ഉടമകള്‍ക്കാണ് ഇന്ന് കിറ്റ് വിതരണം ചെയ്തിരുന്നത്.

രണ്ട് ദിവസത്തിനിടെ ഇത് രണ്ടാം തവണയാണ് മെഷീന്‍ പണിമുടക്കുന്നത്. ഇത് സര്‍ക്കാരിന് തിരിച്ചടി ആയിരിക്കുകയാണ്. ഓഗസ്റ്റ് 23 മുതലാണ് സംസ്ഥാനത്ത് ഓണക്കിറ്റ് വിതരണം ആരംഭിച്ചത്. ആദ്യ രണ്ട് ദിവസങ്ങളില്‍ മഞ്ഞ കാര്‍ഡുടമകള്‍ക്കായിരുന്നു കിറ്റ് വിതരണം ചെയ്തത്. ഇന്ന് മുതല്‍ മൂന്ന് ദിവസം പിങ്ക് കാര്‍ഡുടമകള്‍ക്കും ശേഷിച്ച ദിവസങ്ങളില്‍ വെള്ള കാര്‍ഡുകള്‍ക്കുമാണ് കിറ്റ് നല്‍കേണ്ടിയിരുന്നത്.


ഏതെങ്കിലും കാരണത്താല്‍ ഈ തീയതികളില്‍ വാങ്ങാന്‍ കഴിയാത്തവര്‍ക്ക് അടുത്തമാസം 4,5,6,7 തീയതികളില്‍ ഓണക്കിറ്റ് കൈപ്പറ്റാന്‍ അവസരമുണ്ട്.87 ലക്ഷം കാര്‍ഡ് ഉടമകള്‍ക്കാണ് ഓണക്കിറ്റ് വിതരണം ചെയ്യുക.


14 ഇനം സാധനങ്ങളടങ്ങിയതാണ് കിറ്റ്. മില്‍മ നെയ്യ് 50 മി.ലി, ശബരി മഞ്ഞള്‍പ്പൊടി 100 ഗ്രാം, കശുവണ്ടിപ്പരിപ്പ് 50 ഗ്രാം,ശബരി മുളക്പൊടി 100 ഗ്രാം, ഉണക്കലരി 500 ഗ്രാം,ശര്‍ക്കരവരട്ടി 100 ഗ്രാം,പൊടി ഉപ്പ് 1 ഒരു കിലോ ഗ്രാം,ശബരി തേയില 100 ഗ്രാം,പഞ്ചസാര ഒരു കിലോഗ്രാം, ചെറുപയര്‍ 500 ഗ്രാം, ശബരി വെളിച്ചെണ്ണ 500 മി.ലി, ഏലയ്ക്ക 20 ഗ്രാം, തുണിസഞ്ചി, തുവരപ്പരിപ്പ് 250 ഗ്രാം തുടങ്ങിയവയാണ് ഇത്തവണത്തെ ഓണക്കിറ്റില്‍ ഉള്ളത്.