പാനൂരില്‍ വ്യവസായ ദമ്പതികളെ കാണാനില്ലെന്ന് പരാതി. താഴെ ചമ്പാട് തായാട്ട് വീട്ടില്‍ രാജ് കബീര്‍, ഭാര്യ ശ്രീവിദ്യ എന്നിവരെയാണ് കാണാതായത്. തലശേരിയില്‍ ഇവര്‍ നടത്തിയിരുന്ന ഫര്‍ണീച്ചര്‍ കടയ്ക്കു സമീപം സ്ഥലം കയ്യേറിയെന്ന് കാണിച്ച് സ്ഥാപനം അടച്ചുപൂട്ടാന്‍ നഗരസഭ നോട്ടിസ് നല്‍കിയിരുന്നു. ഇതിനു പിന്നാലെയാണ് ഇവരെ കാണാതായത്.

സ്ഥലം കയ്യേറിയതിന് നാല് ലക്ഷത്തിലധികം തുക പിഴയടയ്ക്കണമെന്നു കാണിച്ചാണ് തലശേരി നഗരസഭ ആദ്യം നോട്ടിസ് നല്‍കിയത്. പിഴയടയ്ക്കാത്തതിനെ തുടര്‍ന്നു സ്ഥാപനം അടച്ചുപൂട്ടാന്‍ നോട്ടിസ് നല്‍കി. ഇതിനെതിരെ ദമ്പതികള്‍ ഹൈക്കോടതിയെ സമീപിക്കുകയും നഗരസഭയുടെ നടപടിക്കു സ്റ്റേ വാങ്ങിക്കുകയും ചെയ്തിരുന്നു. തവണകളായി പിഴ അടയ്ക്കാനും കോടതി നിര്‍ദേശം നല്‍കി.

എന്നാല്‍ നടപടി ഹൈക്കോടതി സ്റ്റേ ചെയ്തിട്ടും നഗരസഭയുടെ ഭാഗത്തുനിന്നു നിഷേധാത്മക നിലപാടാണ് ഉണ്ടായതെന്നും ഞങ്ങള്‍ പോകുന്നെന്നും ഞങ്ങളെ ഇനി അന്വേഷിക്കണ്ടയെന്നും രാജ് കബീര്‍ കടയിലെ മാനേജര്‍ക്കു വാട്‌സാപ് സന്ദേശം നല്‍കി. ചൊവ്വാഴ്ച വൈകിട്ട് കടയുടെ മുന്നില്‍നിന്നും ഇരുവരും ഓട്ടോറിക്ഷയില്‍ കയറി പോകുന്നതിന്റെ സിസിടിവി ദൃശ്യങ്ങള്‍ പുറത്തുവന്നു.

സൂപ്പര്‍മാര്‍ക്കറ്റില്‍ പോകുകയാണെന്നു പറഞ്ഞാണ് ഇരുവരും വീട്ടില്‍നിന്ന് ഇറങ്ങിയത്. എന്നാല്‍ തിരിച്ചെത്താത്തതിനെ തുടര്‍ന്നു പാനൂര്‍ പൊലീസ് കേസെടുക്കുകയായിരുന്നു. സിസിടിവി ദൃശ്യങ്ങളും ഇരുവരുടെയും ടവര്‍ ലൊക്കേഷനും കേന്ദ്രീകരിച്ചാണ് അന്വേഷണം നടക്കുന്നത്. തമിഴ്‌നാട്ടിലേക്ക് അടക്കം അന്വേഷണം വ്യാപിപ്പിച്ചിട്ടുണ്ട്.

അതേസമയം, ദമ്പതികളുടെ വ്യാവസായം പൂട്ടിക്കാന്‍ ശ്രമിച്ചിട്ടില്ലെന്നു തലശേരി നഗരസഭാ അധ്യക്ഷ ജമുന റാണി പറഞ്ഞു. കയ്യേറ്റം ഒഴിപ്പിക്കാന്‍ ശ്രമിക്കുകയും കോടതിയിട്ട പിഴ അടയ്ക്കാന്‍ ആവശ്യപ്പെടുകയുമാണ് ചെയ്തത്. ആദ്യ ഗഡു അടച്ചിതിനാല്‍ കട തുറന്നു പ്രവര്‍ത്തിക്കാന്‍ അനുമതി നല്‍കിയിരുന്നതായും നഗരസഭാ അധ്യക്ഷ പറഞ്ഞു.