ഇ.പി.ജയരാജനെതിരായ വധശ്രമ കേസില് പരാതിക്കാരായ യൂത്ത് കോണ്ഗ്രസ് പ്രവര്ത്തകര് നവീന്കുമാറിന്റെ മൊഴിയെടുക്കും.... ഇന്ന് കൊല്ലം പൊലീസ് ക്ലബ്ബില് വച്ചാണ് മൊഴി രേഖപ്പെടുത്തുക
ഇ.പി.ജയരാജനെതിരായ വധശ്രമ കേസില് പരാതിക്കാരായ യൂത്ത് കോണ്ഗ്രസ് പ്രവര്ത്തകര് നവീന്കുമാറിന്റെ മൊഴി ഇന്നെടുക്കും. കൊല്ലം പൊലീസ് ക്ലബ്ബില് വച്ചാണ് മൊഴി രേഖപ്പെടുത്തുക.
കഴിഞ്ഞ ദിവസം മറ്റൊരു പരാതിക്കാരനായ ഫര്സിന് മജീദിന്റെ മൊഴിയെടുത്തിരുന്നു. ഇ പി ജയരാജനെ കൂടാതെ മുഖ്യമന്ത്രിയുടെ ഗണ്മാന് അനില്കുമാര്, പി എ സുനീഷ് എന്നിവരും കേസില് പ്രതികളാണ്. വിമാനത്തില് വെച്ച് മുഖ്യമന്ത്രിയെ വധിക്കാന് ശ്രമിച്ചെന്ന കേസില് പ്രതികളാണ് ഫര്സീനും നവീനും.
ഹൈക്കോടതിയുടെ ജാമ്യവ്യവസ്ഥ പ്രകാരം തിരുവനന്തപുരം ജില്ലയില് പ്രവേശിക്കുന്നതിന് രണ്ടുപേര്ക്കും വിലക്കുള്ളതിനാലാണ് കൊല്ലത്ത് വച്ച് മൊഴി എടുക്കുന്നത്.ഫര്സീന് കഴിഞ്ഞ ദിവസമാണ് കൊല്ലത്ത് പൊലീസ് ക്ലബില് എത്തി മൊഴി നല്കിയത്.
ജീവന് ഭീഷണിയുണ്ടെന്നും യാത്രയ്ക്ക് പോലീസ് സംരക്ഷണം നല്കണമെന്നും ആവശ്യപ്പെട്ട് ഫര്സീന് കഴിഞ്ഞ ദിവസം ഡി.ജി.പിക്ക് കത്ത് നല്കിയിരുന്നെങ്കിലും സംരക്ഷണം നല്കിയില്ല. തനിക്ക് വധ ഭീഷണി ഉണ്ടെന്നും ഫര്സീന് മജീദ് പറഞ്ഞു. ഇപി ജയരാജന് നല്കിയ പരാതിയുടെ അടിസ്ഥാനത്തിലാണ് യൂത്ത് കോണ്ഗ്രസ് പ്രവര്ത്തകരെ മൊഴി രേഖപ്പെടുത്താനായി വിളിച്ചുവരുത്തിയത്.
മുഖ്യമന്ത്രിക്കെതിരെ വിമാനത്തില് പ്രതിഷേധിച്ച യൂത്ത് കോണ്ഗ്രസ് പ്രവര്ത്തകരെ കയ്യേറ്റം ചെയ്ത സംഭവത്തില് വധശ്രമം, മനഃപൂര്വ്വമല്ലാത്ത നരഹത്യാ ശ്രമം, ഗൂഢാലോചന, ഭീഷണിപ്പെടുത്തല് എന്നീ കുറ്റങ്ങള് ചുമത്തി തിരുവനന്തപുരം വലിയതുറ പൊലീസ് ഇ പി ജയരാജനെതിരെ കേസെടുത്തിട്ടുണ്ടായിരുന്നു. മുഖ്യമന്ത്രിയുടെ ഗണ്മാന് അനില്കുമാര്, പിഎ സുനീഷ് എന്നിവര്ക്കെതിരെയും കേസെടുത്തു. തിരുവനന്തപുരം ജെ എഫ് എം സി കോടതിയുടെ ഉത്തരവിന്റെ അടിസ്ഥാനത്തിലായിരുന്നു പൊലീസ് കേസെടുത്തത്.
വിമാനത്തില് മുഖ്യമന്ത്രിക്കെതിരെ പ്രതിഷേധിച്ച് വധശ്രമക്കേസില് പ്രതികളാക്കപ്പെട്ട യൂത്ത് കോണ്ഗ്രസ് പ്രവര്ത്തകര് ഫര്സീന് മജീദും നവീന്കുമാറും നല്കിയ പരാതിയാണ് ഇപിക്ക് തിരിച്ചടിയായി മാറിയത്. ഇവര്ക്കെതിരായാണ് ഇപി ജയരാജന്റെയും മറ്റും പരാതി. ഇപി ജയരാജനും മുഖ്യമന്ത്രിയുടെ പേഴ്സനല് സ്റ്റാഫ് അംഗം സുനീഷും ഗണ്മാന് അനില്കുമാറും ചേര്ന്ന് മര്ദ്ദിച്ചുവെന്ന യൂത്ത് കോണ്ഗ്രസ് പ്രവര്ത്തകരുടെ പരാതിയിലാണ് ഇപിക്കെതിരെ കേസ് എടുത്തിരിക്കുന്നത്.
"
https://www.facebook.com/Malayalivartha
