മുന്കാല പ്രാബല്യം എന്താകും... ഗവര്ണറുടെ ചാന്സലര് അധികാരം വെട്ടിക്കുറയ്ക്കവെ അതേ നാണയത്തില് തിരിച്ചടിച്ച് ഗവര്ണര്; കേരള സര്വകലാശാല വൈസ് ചാന്സലര് നിയമന നടപടികളുമായി മുന്നോട്ടു പോകാന് ഗവര്ണറുടെ തീരുമാനം
കേരളത്തില് തിരിച്ചെത്തിയ ഗവര്ണര് ആരിഫ് മുഹമ്മദ് ഖാന് ശക്തമായ നീക്കങ്ങളാണ് നടത്തുന്നത്. ഗവര്ണറുടെ അധികാരം വെട്ടിക്കുറയ്ക്കാനുള്ള ബില് നിയമസഭ പരിഗണിച്ച് വരികയാണ്. അതിന് മുന്കാല പ്രാബല്യം നല്കിയാണ് പാസാക്കുന്നത്. ഈ ബില് ഗവര്ണര് ഒപ്പിടുമോയെന്ന് കണ്ടറിയം.
അതിനിടെ കേരള സര്വകലാശാല വൈസ് ചാന്സലര് നിയമന നടപടികളുമായി മുന്നോട്ടു പോകാന് ഗവര്ണറുടെ തീരുമാനം. വിസി ആകാന് താല്പര്യമുള്ളവരുടെ അപേക്ഷയോ നോമിനേഷനോ സ്വീകരിക്കുന്നതിനുള്ള വിജ്ഞാപനം ഇറക്കാന് സേര്ച് കമ്മിറ്റിയുടെ കണ്വീനറെ ചുമതലപ്പെടുത്തി.
ദേശീയ മാധ്യമങ്ങളില് വിജ്ഞാപനം ചെയ്ത് അപേക്ഷ സ്വീകരിക്കാന് നടപടിയെടുത്ത ശേഷമാകും പാനല് തയാറാക്കുക. നവംബര് 5 വരെ കമ്മിറ്റിക്കു കാലാവധി ഉണ്ട്. ഇതിനിടെ സെനറ്റ് പ്രതിനിധിയെ തിരഞ്ഞെടുത്താല് അദ്ദേഹത്തിനും സേര്ച് കമ്മിറ്റിയില് പങ്കെടുക്കാം.
സര്വകലാശാലയുടെ പ്രതിനിധിയെ നല്കാതിരുന്നാലും നിലവിലെ രണ്ടംഗ കമ്മിറ്റിക്കു തുടര്പ്രവര്ത്തനം നടത്തുന്നതിനു തടസ്സം ഇല്ല. കേരള വിസിയുടെ കാലാവധി ഒക്ടോബര് 25ന് അവസാനിക്കുകയാണ്. അതിനു മുന്പ് സേര്ച് കമ്മിറ്റി കൂടി പുതിയ വിസിയെ നിയമിക്കാനാണു സാധ്യത.
വിസി നിയമനത്തിനായി ഗവര്ണര് കഴിഞ്ഞ 5ന് രൂപീകരിച്ച സേര്ച് കമ്മിറ്റി റദ്ദാക്കുക എന്ന ഉദ്ദേശ്യത്തോടെയാണു സര്വകലാശാല നിയമഭേദഗതി ബില്ലിന് ഒന്നാം തീയതി മുതല് പ്രാബല്യം നല്കാന് നിയമസഭാ സബ്ജക്ട് കമ്മിറ്റി തീരുമാനിച്ചത്.
സര്വകലാശാലയുടെ സ്വയംഭരണത്തിനു ദോഷം വരുന്ന നടപടി അംഗീകരിക്കില്ലെന്നു ഗവര്ണര് പ്രഖ്യാപിച്ച സാഹചര്യത്തില് നിലവിലുള്ള നിയമപ്രകാരം അദ്ദേഹത്തിനു വിസി നിയമനം നടത്താം. കോഴിക്കോട് ഐഐഎം ഡയറക്ടര് കണ്വീനറും കര്ണാടക കേന്ദ്ര സര്വകലാശാല വൈസ് ചാന്സലര് യുജിസി പ്രതിനിധിയുമായുള്ള സേര്ച് കമ്മിറ്റിയാണു രൂപീകരിച്ചത്.
സെനറ്റ് പ്രതിനിധിയെ കേരള സര്വകലാശാല നിശ്ചയിക്കുന്ന മുറയ്ക്കു കമ്മിറ്റിയില് ഉള്പ്പെടുത്തുമെന്ന് ഉത്തരവില് വ്യക്തമാക്കിയിട്ടുണ്ട്. ഇതിനിടെ, സേര്ച് കമ്മിറ്റി പൂര്ണമല്ലെന്ന കാരണം ചൂണ്ടിക്കാട്ടി കോടതിയെ സമീപിക്കാനോ, ഗവര്ണറുമായി സര്ക്കാര് അനുരഞ്ജനത്തില് എത്താനോ ഉള്ള സാധ്യതയും തള്ളാനാവില്ല.
അതേസമയം ഇന്നലേയും ഗവര്ണര് ആഞ്ഞടിച്ചു. കണ്ണൂര് തന്റെ നാടാണ് എന്നു പറഞ്ഞു മുഖ്യമന്ത്രി പിണറായി വിജയന് നിര്ബന്ധിച്ചതു കൊണ്ടാണു ഡോ. ഗോപിനാഥ് രവീന്ദ്രന് കണ്ണൂര് സര്വകലാശാല വൈസ് ചാന്സലറായി പുനര്നിയമനം നല്കിയതെന്ന് ഗവര്ണര് ആരിഫ് മുഹമ്മദ് ഖാന് പറഞ്ഞു.
മുഖ്യമന്ത്രിയുടെ ആവര്ത്തിച്ചുള്ള അഭ്യര്ഥന മാനിക്കുകയായിരുന്നുവെന്നും ഗവര്ണര് പറഞ്ഞു. ഞെട്ടിക്കുന്നതാണ് സര്വകലാശാലകളിലെ നിയമനങ്ങള്. ചിലരുടെ അനന്തരവനും ഭാര്യാ സഹോദരനും മറ്റുമാണു നിയമനം. നിയമസഭ പാസാക്കുന്ന ബില്ലുകള് എന്റെ മുന്നില് എത്തുമ്പോള് ഭരണഘടനാപരമായ എല്ലാ സൂക്ഷ്മ പരിശോധനയും നടത്തും.
സര്വകലാശാലകളുടെ ചാന്സലര് സ്ഥാനം തിരിച്ചെടുത്തുകൊള്ളാന് ഞാന് നേരത്തേ മുഖ്യമന്ത്രിയോട് ആവശ്യപ്പെട്ടതാണ്. ഇതുവരെ ഉയര്ന്നതും എനിക്കു ലഭിച്ചതുമായ വിവിധ പരാതികളില് അന്വേഷണം ഉറപ്പാക്കും. കണ്ണൂര് വിസിക്കെതിരെ നടപടി സ്വീകരിക്കുന്നതിനല്ല ആദ്യ പരിഗണന. പ്രശ്നങ്ങള് പരിഹരിക്കുകയാണ് ആദ്യം വേണ്ടതെന്നും ഗവര്ണര് പറഞ്ഞു.
https://www.facebook.com/Malayalivartha
