ഇന്ത്യയിലെ പ്രമുഖ വ്യവസായിയും നരേന്ദ്ര മോദിയുടെ സുഹൃത്തും അദാനി ഗ്രൂപ്പ് ഉടമയുമായ അദാനി മാധ്യമ രംഗത്തും ശക്തമായ ചുവട് വയ്ക്കുകയാണ്. കഴിഞ്ഞ ഏതാനും മാസങ്ങള്‍ക്കുള്ളില്‍ അദാനി ഗ്രൂപ്പ് മാധ്യമ മേഖലയില്‍ നടത്തുന്ന രണ്ടാമത്തെ പ്രധാന നിക്ഷേപമാണ് ഇപ്പോള്‍ എന്‍ഡിടിവിയില്‍ നടത്തുന്നത്. കേന്ദ്ര സര്‍ക്കാരിനെതിരെ ആഞ്ഞടിക്കുന്ന എന്‍ഡിടിവിയ്ക്ക് വന്‍ മാറ്റം വരും.

മെയ് മാസത്തില്‍ രാഘവ് ബാലിന്റെ ക്വിന്റില്യണ്‍ ബിസിനസ് മീഡിയ െ്രെപവറ്റ് ലിമിറ്റഡിന്റെ 49 ശതമാനം ഓഹരികള്‍ വെളിപ്പെടുത്താത്ത തുകയ്ക്ക് അദാനി ഗ്രൂപ്പ് സ്വന്തമാക്കിയിരുന്നു. അതേ സമയം കഴിഞ്ഞ ദിവസമിറക്കിയ വാര്‍ത്ത കുറിപ്പില്‍ തന്നെ എന്‍ഡിടിവിയില്‍ തങ്ങള്‍ക്കുള്ള താല്‍പ്പര്യം അദാനി ഗ്രൂപ്പ് വ്യക്തമാക്കുന്നുണ്ട്.

പുതിയ യുഗത്തില്‍ മാധ്യമങ്ങളുടെ പുതിയ വഴി ഒരുക്കുകയാണ് ഈ ഏറ്റെടുക്കലിലൂടെ ഒരുക്കുന്നതെന്നും, ഈ ഏറ്റെടുക്കല്‍ സുപ്രധാന നാഴികക്കല്ലാണെന്നും എഎംഎന്‍എല്‍ സിഇഒ സഞ്ജയ് പുഗാലിയ പറഞ്ഞു. ഇന്ത്യന്‍ പൗരന്മാരെയും ഉപഭോക്താക്കളെയും ഇന്ത്യയില്‍ താല്‍പ്പര്യമുള്ളവരെയും വിവരങ്ങളും അറിവും ഉപയോഗിച്ച് ശാക്തീകരിക്കാന്‍ എഎംഎന്‍എല്‍ ശ്രമിക്കുന്നു. എന്‍ഡിടിവി ഞങ്ങളുടെ കാഴ്ചപ്പാടില്‍ എത്തിക്കുന്നതിന് ഏറ്റവും അനുയോജ്യമായ പ്രക്ഷേപണവും ഡിജിറ്റല്‍ പ്ലാറ്റ്‌ഫോമാണ്. വാര്‍ത്താ വിതരണത്തില്‍ എന്‍ഡിടിവിയുടെ നേതൃത്വം ശക്തിപ്പെടുത്താന്‍ ഞങ്ങള്‍ ആഗ്രഹിക്കുന്നു എന്നാണ് അദാനി ഗ്രൂപ്പ് പറയുന്നത്.

അദാനി ഗ്രൂപ്പിന്റെ എന്‍ഡിടിവി ഏറ്റെടുക്കുന്നു എന്ന വാര്‍ത്ത വന്നതോടെ ഓഹരി വിപണിയില്‍ എന്‍ഡിടിവി ഓഹരികളില്‍ 5 ശതമാനം വളര്‍ച്ചയാണ് അദാനി എന്‍ഡിടിവി വാങ്ങുന്നു എന്ന വാര്‍ത്ത മൂലം ഉണ്ടായത്. എന്തായാലും അംബാനിയുടെ റിലയന്‍സ് ചുവടുറപ്പിച്ച ഒരു മേഖലയിലേക്ക് കൂടി അദാനി ചുവടുവയ്ക്കുന്നു എന്നതാണ് ഈ വാര്‍ത്തയുടെ മറുവശം. നേരത്തെ 5ജി ലേലത്തില്‍ പങ്കെടുത്ത് അദാനി ഗ്രൂപ്പ് ടെലികോം രംഗത്തും തങ്ങള്‍ ഭാവിയില്‍ ഉണ്ടാകും എന്ന സൂചന നല്‍കിയിരുന്നു.

ഇതിന് പിന്നാലെയാണ് ഇപ്പോള്‍ മാധ്യമ രംഗത്തെ അദാനിയുടെ അരങ്ങേറ്റം. രാജ്യത്തെ പ്രധാന മാധ്യമ സ്ഥാപനമായ നെറ്റ് വര്‍ക്ക് 18 ഗ്രൂപ്പിനെ സ്വന്തമാക്കി അംബാനി ഇന്ത്യന്‍ മാധ്യമ രംഗത്തേക്ക് ചുവടുവച്ചതിന് സമാനമാണ് അദാനിയുടെ നീക്കം എന്ന് പറയാം. എന്നാല്‍ അംബാനിയെക്കാള്‍ നാടകീയമായാണ് അദാനി ഈ രംഗത്തേക്ക് വന്നത് എന്ന് പറയേണ്ടിവരും. എന്‍ഡിടിവി പ്രമോട്ടര്‍മാരായ പ്രണോയ് റോയി, രാധിക റോയ് എന്നിവര്‍ പോലും അദാനി ഗ്രൂപ്പിന്റെ ഔദ്യോഗിക പ്രസ് റിലീസ് ഇറങ്ങും വരെ ഈ കാര്യം അറിഞ്ഞില്ലെന്നതാണ്.

2009-10 കാലഘട്ടത്തില്‍ അതിന്റെ പ്രമോട്ടര്‍മാര്‍ എന്‍ഡിടിവിക്കുവേണ്ടി വിശ്വപ്രധാന്‍ കൊമേഴ്‌സ്യല്‍ െ്രെപവറ്റ് ലിമിറ്റഡില്‍നിന്ന് രണ്ട് ഘട്ടമായി വായ്പയെടുത്തതാണ് എല്ലാത്തിന്റെയും തുടക്കം. രാധിക റോയി പ്രണോയ് റോയി ഹോള്‍ഡിംസ് ആണ് എന്‍ഡിടിവിക്കായി വായ്പ എടുത്തത്.

ഈ സമയത്ത് 7.56ശതമാനം ഓഹരികള്‍ മാത്രമായിരുന്നു ആര്‍ആര്‍പിആര്‍ ഹോള്‍ഡിംഗ്‌സിന്റെ പേരില്‍ ഉണ്ടായിരുന്നത്. വിസിപിഎല്‍ നല്‍കിയ പണം റിലയന്‍സിന്റെ പൂര്‍ണ ഉടമസ്ഥതയിലുള്ള ഷിനാനോ റീട്ടെയില്‍ വഴിയാണ് വായ്പയായി നല്‍കിയത്.

കഴിഞ്ഞ രണ്ട് സാമ്പത്തിക വര്‍ഷങ്ങളിലായി വെറും ഒരു ലക്ഷം രൂപ വിറ്റുവരവുണ്ടായിരുന്ന വിശ്വപ്രധാന്‍ കൊമേഴ്‌സ്യല്‍ പ്രൈവറ്റ് ലിമിറ്റഡ് എന്നാല്‍ അടുത്തിടെ അദാനി ഗ്രൂപ്പ് അങ്ങ് വാങ്ങി. വിശ്വപ്രധാന്‍ കൊമേഴ്‌സ്യല്‍ പ്രൈവറ്റ് ലിമിറ്റഡിന്റെ ഇപ്പോഴത്തെ ഉടമകള്‍ അദാനി ഗ്രൂപ്പാണ്. അതോടെ എന്‍ഡിടിവി അദാനിക്ക് സ്വന്തമായി.