കോഴിക്കോട് കോട്ടൂളി മാമ്പിലാംപറമ്പ് മാലാടത്ത് ക്ഷേത്രത്തില്‍ ഇന്നലെ പുലര്‍ച്ചയോടെ മോഷണം.... ക്ഷേത്രത്തിലുണ്ടായിരുന്ന നാലു ഭണ്ഡാരങ്ങള്‍ കുത്തിത്തുറന്ന് നിലയില്‍ , വലിയ ഉരുളികളും വിളക്കുകളും മോഷണം പോയി, പോലീസ് അന്വേഷണം ഊര്‍ജ്ജിതമാക്കി.

പുലര്‍ച്ചെ അഞ്ചുമണിയോടെ ക്ഷേത്രം ജീവനക്കാരന്‍ എത്തിയപ്പോഴാണ് മോഷണവിവരം അറിയുന്നത്. ഉടനെ ക്ഷേത്രം ഭാരവാഹികളെയും മെഡിക്കല്‍ കോളേജ് പോലീസിലും വിവരം അറിയിക്കുകയായിരുന്നു. ക്ഷേത്രത്തിലുണ്ടായിരുന്ന നാലു ഭണ്ഡാരങ്ങള്‍ കുത്തിത്തുറന്ന് അതിലുണ്ടായിരുന്ന ഏകദേശം 25,000 രൂപയോളം മോഷ്ടിച്ചിട്ടുണ്ട്.

നിവേദ്യങ്ങളുണ്ടാക്കുന്ന തിടപ്പള്ളിയിലും മോഷണം നടത്തിയിട്ടുണ്ട്. ഇവിടെ സൂക്ഷിച്ചിരുന്ന വലിയ ഉരുളികളും വിളക്കുകളും മോഷ്ടിച്ചിട്ടുണ്ട്. ശ്രീകോവിലിനുമുന്നില്‍ തൂക്കിയിട്ടിരിക്കുന്ന രണ്ട് വലിയ മണികള്‍ മുറിച്ചുമാറ്റിയിട്ടുണ്ട്.ക്ഷേത്രകോമ്പൗണ്ടിനുള്ളിലെ മറ്റു മുറികളില്‍ മോഷണം നടത്തിയിട്ടില്ല. ഈ മുറികളിലാണ് കൂടുതല്‍ വിളക്കുകളും പാത്രങ്ങളുമെല്ലാം സൂക്ഷിച്ചിരുന്നത്.


ഭണ്ഡാരം പൊളിച്ചശേഷം ക്ഷേത്രത്തിന്റെ പിറകുവശത്ത് എത്തിച്ചാണ് തകര്‍ത്ത് പണം കവര്‍ന്നത്. ശ്രീകോവിലിനു മുന്നിലെ പ്രധാനഭണ്ഡാരം പൊളിക്കാനായി മോഷ്ടാവിന് കഴിഞ്ഞിട്ടില്ല. ക്ഷേത്രകോമ്പൗണ്ടിനുള്ളില്‍ നിന്നു തന്നെ മോഷ്ടാവ് മറന്നുവെച്ച ഹെല്‍മെറ്റും മോഷണത്തിനായി കൊണ്ടുവന്ന കൊടുവാളും ചുറ്റികയും ഉളിയും കണ്ടെത്തി.


ക്ഷേത്രത്തിലെ ഭണ്ഡാരം തുറന്ന് പണമെടുത്തിട്ട് ഒരു മാസത്തിലധികമായി. ഈ വരുന്ന ഞായറാഴ്ച പണമെടുക്കാനിരിക്കെയാണ് മോഷണം നടന്നത്. ക്ഷേത്രത്തില്‍ സി.സി.ടി.വി.യില്ലാത്തതിനാല്‍ തൊട്ടടുത്ത റോഡുകളിലോ വീടുകളിലോ സി.സി.ടി.വി.യുണ്ടോയെന്നും പോലീസ് അന്വേഷിക്കുന്നുണ്ട്. അമ്പലത്ത്കാവ് ക്ഷേത്രത്തില്‍ മോഷണം. മോഷ്ടാക്കളായ രണ്ടുപേരുടെ ദൃശ്യം ക്ഷേത്രത്തിലെ സി.സി.ടി.വി.യില്‍ പതിഞ്ഞു. വ്യാഴാഴ്ച പുലര്‍ച്ചയോടെയായിരുന്നു മോഷണം.

20 കിലോ തൂക്കമുള്ള വിളക്ക്, അഞ്ച് നിലവിളക്കുകള്‍, 13 ഓട്ടുരുളികള്‍ തുടങ്ങിയവയാണ് മോഷണം പോയത്. തിടപ്പള്ളിയുടെ പൂട്ട് പൊളിച്ച നിലയിലാണ്. ഉപദേവതകള്‍ക്കായി തറകളില്‍വെച്ച വിളക്കുകളാണ് പോയത്. ക്ഷേത്രമുറ്റത്തുള്ള വലിയ ഓട്ടുവിളക്ക് ഇളക്കാന്‍ ശ്രമിക്കുന്നതും ഇളക്കിയെടുക്കാന്‍ കഴിയാത്തതിനാല്‍ ശ്രമം ഉപേക്ഷിച്ച് പോകുന്നതുമായ ദൃശ്യങ്ങള്‍ സി.സി.ടി.വി.യില്‍ പതിഞ്ഞു.

വിളക്കിന്റെ ഒരുഭാഗവും ചെരിപ്പും മറ്റും ക്ഷേത്രമതിലിന് സമീപം കണ്ടെത്തി. അറുപതിനായിരം രൂപയുടെ നഷ്ടം കണക്കാക്കുന്നു.


അതേസമയം ക്ഷേത്രങ്ങളില്‍ മോഷണം പതിവാക്കിയ പതിനേഴുകാരന്‍ പിടിയില്‍. തടമ്പാട്ടുതാഴം സ്വദേശിയാണ് ടൗണ്‍ പോലീസിന്റെ പിടിയിലായത്. മെഡിക്കല്‍ കോളേജ്, ചേവായൂര്‍, എലത്തൂര്‍ എന്നിവിടങ്ങളിലെ ക്ഷേത്രങ്ങളില്‍ കളവുനടത്തിയിട്ടുണ്ടെന്ന് പോലീസിനോട് പറഞ്ഞു.

എലത്തൂരില്‍ നിന്ന് ഒരു സ്‌കൂട്ടറും മോഷ്ടിച്ചിട്ടുണ്ട്. ഒപ്പം സമപ്രായക്കാരായ രണ്ട് സുഹൃത്തുക്കള്‍ കൂടിയുണ്ടെന്നും ഇവരെപ്പറ്റിയും അന്വേഷണം തുടരുകയാണെന്നും പോലീസ് .