ദയനീയമായ പറച്ചില്‍ ഗൃഹനാഥന് മനസ്സലിഞ്ഞു.....യുവാവിന്റെ കൈയ്യില്‍ നിന്നും 100 രൂപയ്ക്ക് സാധനം വാങ്ങി.. പിറ്റേന്ന് പത്രത്തില്‍ ഫോട്ടോ കണ്ട് ഞെട്ടി....ആര്യനാട്ട് തൈലവും മറ്റും വില്‍ക്കാനെത്തിയ യുവാവ് വീട്ടില്‍ നിന്ന് 80,000 രൂപ കവര്‍ന്നതിന് അറസ്റ്റില്‍! സംഭവമിങ്ങനെ.....

അപ്പച്ചാ, ഭക്ഷണം കഴിക്കാനുള്ള പണം പോലും ഇതുവരെ കിട്ടിയിട്ടില്ല . എന്തെങ്കിലും വാങ്ങണേ ... '' എന്ന ഈ ഒരു വാചകത്തിലാണ് പൂജപ്പുര കേശവന്‍നായര്‍ റോഡിലെ വീട്ടിലെ ഗൃഹനാഥന്റെ മനസ്സലിഞ്ഞു പോയത്. ഒരു ബാഗില്‍ തൈലവും ഡിഷ് വാഷും ഉള്‍പ്പെടെ കുറച്ചു സാധനങ്ങളുമായി വില്‍പനയ്‌ക്കെത്തിയ പയ്യന് 20 വയസ്സ പ്രായമേ തോന്നുകയുള്ളൂ. 100 രൂപയ്ക്ക് സാധനം വിറ്റ് ഇയാള്‍ മടങ്ങി.

പക്ഷേ, പിറ്റേദിവസത്തെ പത്രത്തില്‍ വാര്‍ത്തയും പടവും കണ്ടപ്പോഴാണ് വീട്ടുകാര്‍ ഞെട്ടിപ്പോയി. ആര്യനാട്ട് തൈലവും മറ്റും വില്‍ക്കാനെത്തിയ യുവാവ് വീട്ടില്‍ നിന്ന് 80,000 രൂപ കവര്‍ന്നതിന് അറസ്റ്റില്‍! 21ന് രാവിലെ ആര്യനാട്ട് മോഷണം നടത്തിയ കോട്ടയം മോനിപ്പള്ളിയില്‍ താമസിക്കുന്ന വിപിന്‍ബാബു(21) വിനെ അറസ്റ്റ് ചെയ്തത് പൂജപ്പുരയില്‍ സാധനങ്ങളുമായി ചുറ്റുന്നതിനിടെയാണ്.

അറസ്റ്റിലാവുന്ന ദിവസം ഇയാള്‍ പൂജപ്പുര ഭാഗത്തെ പല വീടുകളിലും കയറിയിറങ്ങി. കേശവന്‍നായര്‍ റോഡില്‍ സാധനം വിറ്റ വീട്ടിലെ പ്രായമായ ഗൃഹനാഥന്‍ ആദ്യം ഒന്നും വേണ്ട എന്നു പറഞ്ഞെങ്കിലും, ദയനീയമായ അപേക്ഷയില്‍ മനസ്സലിയുകയായിരുന്നു. കമ്പനിയുടെ ബ്രോഷറും ഇയാള്‍ കാണിച്ചു.

കാഴ്ചയിലും സംസാരത്തില്‍ ഇതരസംസ്ഥാനത്തു നിന്നാണെന്നു തോന്നിക്കുന്ന യുവാവ് പക്ഷേ മലയാളിയാണെന്നാണ് അവകാശപ്പെട്ടത്.
വീട്ടുകാരില്‍ നിന്നു വെള്ളം ചോദിച്ചുവാങ്ങി കുടിക്കുകയും ചെയ്തു. തുടര്‍ന്ന് ഗൃഹനാഥനോട്, വീട്ടിലാരൊക്കെയുണ്ടെന്നും എന്തൊക്കെയാണ് ജോലിയെന്നും മൊത്തം എത്ര അംഗങ്ങളുണ്ടെന്നുമെല്ലാം ചോദിച്ചറിയാന്‍ തുടങ്ങിയതോടെ വീട്ടുകാര്‍ക്കു സംശയം തോന്നുകയായിരുന്നു. ഇതോടെ ഇവര്‍ യുവാവിനെ വേഗം പറഞ്ഞുവിട്ടു. എങ്കിലും പോകുന്നതിനു മുന്‍പ് ഗൃഹനാഥന്റെ കാല്‍ തൊട്ടു വണങ്ങി, അനുഗ്രഹമൊക്കെ വാങ്ങിയിട്ടാണ് ആള്‍ മടങ്ങിയത് ! ഇതേ വ്യക്തി തന്നെ പിറ്റേന്ന് പത്രവാര്‍ത്തകളില്‍ അറസ്റ്റിലായ വാര്‍ത്തയും ചിത്രവും കണ്ടപ്പോഴാണ് വീട്ടുകാര്‍ ഞെട്ടിപ്പോയത്.

ആര്യനാട് ഉഴമലയ്ക്കല്‍ പൊങ്ങല്ലി തടത്തരികത്ത് എം.കുമാറിന്റെ വീട്ടില്‍നിന്ന് പ്രതി മോഷ്ടിച്ച പണത്തില്‍ നിന്ന് കുറച്ച് സാധനങ്ങള്‍ വാങ്ങുകയും ശേഷിച്ച തുക സ്വന്തം അക്കൗണ്ടില്‍ നിക്ഷേപിക്കുകയും ചെയ്തതായി ആര്യനാട് എസ്‌ഐ പറഞ്ഞു. ഇയാള്‍ ബൈക്ക് മോഷണക്കേസിലും പ്രതിയുമാണ്.

ആര്യനാട്ട് വീടിന്റെ വാതില്‍പൂട്ടി അതില്‍ തന്നെ വച്ചിട്ടുപോയ താക്കോലുപയോഗിച്ചാണത്രെ അകത്തുകയറി യുവാവ് മോഷണം നടത്തിയത്. വീട്ടുകാര്‍ അല്‍പസമയത്തേക്ക് വീട്ടില്‍നിന്നു മാറിയ സമയത്തായിരുന്നു മോഷണം നടന്നത്.

അതേസമയം സാധനങ്ങള്‍ വില്‍ക്കാനെന്ന പേരില്‍ വീടുകളിലെത്തുന്നവരെ സ്ത്രീകളാണെങ്കില്‍ പോലും ഒരിക്കലും പ്രോത്സാഹിപ്പിക്കരുതെന്ന് ഒരിക്കല്‍ക്കൂടി ഓര്‍മിപ്പിക്കുകയാണ് ഈ സംഭവം. നല്ല പെരുമാറ്റവും ദയനീയ രൂപഭാവങ്ങളും വിശ്വസിക്കരുതെന്നും വീട്ടുകാര്‍ സാക്ഷ്യപ്പെടുത്തുന്നു.