ലഹരിമരുന്ന് കേസില്‍ അറസ്റ്റിലായ സംഘത്തെ വിട്ടയയ്ക്കണമെന്നാവശ്യപ്പെട്ട് പോലീസ് സ്റ്റേഷനിലെത്തിയ സൈനികനും സഹോദരനും ചേര്‍ന്ന് എ.എസ്.ഐയെ ആക്രമിച്ചു.... ഇരുവരെയും കസറ്റഡിയിലെടുത്ത് പോലീസ്

എ.എസ്.ഐ.യുടെ തല അടിച്ചുപൊട്ടിച്ചു. കിളികൊല്ലൂര്‍ പോലീസ് സ്റ്റേഷനില്‍ ഇന്നലെ വൈകുന്നേരം ആറരയോടെയാണ് സംഭവം നടന്നത്. എ.എസ്.ഐ. പ്രകാശ് ചന്ദ്രനാണ് തലയ്ക്ക് ഗുരുതരമായി പരിക്കേറ്റത്. ഇദ്ദേഹത്തെ മേവറത്തെ സഹകരണ ആശുപത്രിയില്‍ പ്രവേശിപ്പിച്ചിരിക്കുകയാണ്.

കൊറ്റങ്കര ഇന്ദീവരത്തില്‍, സൈനികനായ വിഷ്ണു (30), സഹോദരന്‍ വിഘ്നേഷ് (25) എന്നിവരാണ് സ്റ്റേഷനില്‍ ആക്രമണം നടത്തിയത്. പോലീസ് കസ്റ്റഡിയിലെടുത്ത ഇരുവരെയും രാത്രി വൈകിയും ചോദ്യം ചെയ്തുവരുന്നു.

കരിക്കോടുള്ള ലോഡ്ജില്‍ നിന്നു എം.ഡി.എം.എ.യുമായി ദമ്പതിമാരടക്കം നാലുപേരെ പോലീസ് അറസ്റ്റ് ചെയ്തിരുന്നു. ഇവരെ കോടതിയില്‍ ഹാജരാക്കാനുള്ള നടപടികള്‍ക്കിടയിലായിരുന്നു ആക്രമണം ഉണ്ടായത്. സ്റ്റേഷനിലെത്തിയ സൈനികനും സഹോദരനും പ്രതികളെ കാണണമെന്നാവശ്യപ്പെട്ടു. ജാമ്യത്തില്‍ വിടണമെന്ന് റൈറ്റര്‍ ഡ്യൂട്ടിയിലായിരുന്ന പ്രകാശ് ചന്ദ്രനോട് ആവശ്യപ്പെട്ടു.

കോടതിയില്‍ ഹാജരാക്കാനായി പോകുകയാണെന്നറിയിച്ചതോടെ പ്രകോപിതനായ വിഷ്ണു കൈയിലെ വളകൊണ്ട് തലയ്ക്കടിക്കുകയായിരുന്നെന്ന് പോലീസ് .