നിപ്പ ബാധിച്ച് മരിച്ച നഴ്‌സ് ലിനിയുടെ ഭര്‍ത്താവ് സജീഷ് വിവാഹിതനാകുന്നതില്‍ സന്തോഷം പങ്കുവച്ച് ആരോഗ്യമന്ത്രി വീണാ ജോര്‍ജ്. ലിനിയുടെ മക്കള്‍ക്ക് അമ്മയെ ലഭിക്കുന്നെന്നും വിവാഹകാര്യം സജീഷ് വിളിച്ചറിയിച്ചതായും എല്ലാ ആശംസകളും നേരുന്നതായും മന്ത്രി സമൂഹമാധ്യമത്തില്‍ കുറിച്ചു.

അധ്യാപികയായ കൊയിലാണ്ടി സ്വദേശി പ്രതിഭയുമായി ഈ മാസം 29ന് വടകര ലോകനാര്‍ക്കാവ് ക്ഷേത്രത്തിലാണ് സജീഷിന്റെ വിവാഹം. ലിനിയുടെയും സജീഷിന്റെയും ഇളയ മകന്‍ ഒന്നാം ക്ലാസിലും മൂത്ത മകന്‍ നാലാം ക്ലാസിലുമാണ് പഠിക്കുന്നത്. പ്രതിഭയ്ക്ക് ഒരു മകളുണ്ട്. 2018ലാണ് പേരാമ്പ്ര താലൂക്ക് ആശുപത്രിയിലെ നഴ്‌സായിരുന്ന ലിനി രോഗീപരിചരണത്തിനിടെ നിപ്പ ബാധിച്ച് മരിച്ചത്.

മന്ത്രി വീണാ ജോര്‍ജിന്റെ കുറിപ്പ് ഇങ്ങനെ...

നിപ്പയ്‌ക്കെതിരെയുള്ള പോരാട്ടത്തിനിടെ നിപ്പ ബാധിച്ച് ജീവന്‍ വെടിയേണ്ടി വന്ന പ്രിയപ്പെട്ട സിസ്റ്റര്‍ ലിനിയുടെ മക്കള്‍ക്ക് അമ്മയെ ലഭിക്കുന്നു. സജീഷ് വിവാഹിതനാകുകയാണ്. സജീഷ് എന്നെ വിളിച്ച് വിവാഹവിശേഷം പങ്കുവച്ചു. സജീഷിനും കുടുംബത്തിനും എല്ലാ ആശംസകളും നേര്‍ന്നു.

വധുവിന്റെ പേര് പ്രതിഭ എന്നാണ്. മക്കള്‍ പ്രതിഭയുമായി നല്ല രീതിയില്‍ ഇണങ്ങി എന്നാണ് സജീഷ് അറിയിച്ചത്. ലിനിയുടെയും സജീഷിന്റെയും ഇളയ മകന്‍ ഒന്നാം ക്ലാസിലും മൂത്ത മകന്‍ നാലാം ക്ലാസിലുമാണ് പഠിക്കുന്നത്. പ്രതിഭയ്ക്ക് ഒരു മകളുണ്ട്. എല്ലാ സ്‌നേഹാശംസകളും നേരുന്നു.