മറക്കില്ല എണ്ണിക്കോ... കണ്ണൂര് സര്വകലാശാല വൈസ് ചാന്സലര് ഡോ. ഗോപിനാഥ് രവീന്ദ്രന് എതിരെയുള്ള നടപടികള് തീര്ച്ചയാകും ഉണ്ടാകും; ഗവര്ണര് കാത്തിരിക്കുന്നത് നിര്ണായകമായ ഒരു ഹൈക്കോടതി വിധി; മുഖ്യമന്ത്രിയെ സ്വാഗതം ചെയ്ത് ഗവര്ണര്
കണ്ണൂര് സര്വകലാശാല വൈസ് ചാന്സലര് ഡോ. ഗോപിനാഥ് രവീന്ദ്രന് എതിരെ നടപടി ഗവര്ണര് ആരിഫ് മുഹമ്മദ് ഖാന് ഉറപ്പിച്ചു കഴിഞ്ഞു. ഉടന് ധൃതിപിടിച്ച് വേണ്ടെന്നാണ് തീരുമാനം. അതേസമയം സംസ്ഥാന സര്ക്കാരിനും കണ്ണൂര് വിസിക്കുമെതിരെ ആഞ്ഞടിച്ച് ഗവര്ണര് ആരിഫ് മുഹമ്മദ് ഖാന് വീണ്ടും രംഗത്തെത്തി. രാഷ്ട്രീയ യജമാനന്മാരുടെ താല്പര്യം സംരക്ഷിക്കാന് ആണ് വിസിയുടെ ശ്രമമെന്ന് ഗവര്ണര് തുറന്നടിച്ചു. വി സിക്ക് നിയമം പ്രധാനം അല്ല. വിസി പാര്ട്ടി കേഡര് എന്ന് ഗവര്ണര് ആവര്ത്തിച്ചു.
കണ്ണൂര് സര്വ്വകലാശാലയില് പ്രിയ വര്ഗീസിനെ അസോസിയേറ്റ് പ്രൊഫസറായി നിയമിക്കാനുള്ള നീക്കം ചട്ടവിരുദ്ധമാണെന്നും ഗവര്ണര് പറഞ്ഞു. പ്രഥമ ദൃഷ്ട്യ പരാതി നില നില്ക്കുന്നത് കൊണ്ടാണ് സ്റ്റേ ചെയ്തത്. എല്ലാവരെയും നേരിട്ട് വിളിപ്പിക്കും. അതിനു ശേഷം നടപടി ഉണ്ടാകും. പ്രിയ വര്ഗീസിന് അഭിമുഖത്തിന് വിളിക്കാന് പോലും യോഗ്യത ഇല്ല. റെഗുലേഷന് അനുസരിച്ചുള്ള അധ്യാപന പരിചയം പ്രിയക്ക് ഇല്ല.
കണ്ണൂര് സര്വകലാശാല വൈസ് ചാന്സലര് ഡോ. ഗോപിനാഥ് രവീന്ദ്രന് എതിരെയുള്ള നടപടികളിലേക്ക് കടക്കുംമുന്പ് ഗവര്ണര് ആരിഫ് മുഹമ്മദ് ഖാന് കാത്തിരിക്കുന്നത് നിര്ണായകമായ ഒരു ഹൈക്കോടതി വിധിയാണ്. മുഖ്യമന്ത്രിയുടെ പ്രൈവറ്റ് സെക്രട്ടറി കെ.കെ. രാഗേഷിന്റെ ഭാര്യ പ്രിയാ വര്ഗീസിനെ മലയാളം അസോസിയേറ്റ് പ്രൊഫസര് ആയി നിയമിച്ചതില് ഹൈക്കോടതി എന്തുതീരുമാനമെടുക്കുന്നുവെന്നു നോക്കുകയാണ് ഗവര്ണര്.
കേസ് ഈ മാസം 31നാണ് കോടതി പരിഗണിക്കുന്നത്. വിസിക്കെതിരെയുള്ള പരാതികളും അതുസംബന്ധിച്ച തെളിവുകളും ഗവര്ണര് ആരിഫ് മുഹമ്മദ് ഖാന്റെ പക്കലുണ്ട്. നടപടി ഉണ്ടാകുമെന്ന് അദ്ദേഹം പരസ്യമായി പ്രഖ്യാപിക്കുകയും ചെയ്തു. പ്രിയയ്ക്ക് ഒന്നാം റാങ്ക് നല്കിയതിനു പുറമേ ബോര്ഡ് ഓഫ് സ്റ്റഡീസ് പുനഃസംഘടന, പുതിയ കോളജിന്റെ അഫിലിയേഷന് തുടങ്ങിയ പ്രശ്നങ്ങളിലും വിസിക്കെതിരായ തെളിവുകള് ഗവര്ണര് ശേഖരിച്ചിട്ടുണ്ട്.
ഗവര്ണറെ അനുനയിപ്പിക്കാനുള്ള കൂടിക്കാഴ്ചയ്ക്ക് മുഖ്യമന്ത്രിയുടെ പഴ്സനല് സ്റ്റാഫ് അംഗം അനുമതി ചോദിച്ചെങ്കിലും അനുവദിച്ചില്ല. മന്ത്രിമാര്ക്കോ മുഖ്യമന്ത്രിക്കോ വന്നു കാണാമെന്നും ദൂതനായി പഴ്സനല് സ്റ്റാഫ് അംഗം വരേണ്ട കാര്യമില്ലെന്നും ആയിരുന്നു മറുപടി. സ്വന്തം കാര്യം പറയാനാണെങ്കില് പഴ്സനല് സ്റ്റാഫ് അംഗത്തിനു വരുന്നതിനു തടസമില്ലെന്നും ഗവര്ണര് വ്യക്തമാക്കി.
കണ്ണൂര് വിസി നിയമനത്തിന് സെര്ച് കമ്മിറ്റി ഉണ്ടാക്കിയത് ചട്ട പ്രകാരമാണ്. മുഖ്യമന്ത്രി നേരിട്ട് രാജ് ഭവനില് എത്തി വിസി ക്ക് പുനര് നിയമനം ആവശ്യപ്പെട്ടു. പാനല് വരട്ടെ പരിഗണിക്കാം എന്ന് മറുപടി നല്കി. വെയിറ്റെജ് നല്കാം എന്ന് പറഞ്ഞു. സെര്ച് കമ്മിറ്റി റദ്ദാക്കാമെന്നു എജി ഉപദേശം നല്കി. സര്ക്കാരുമായി നല്ല ബന്ധം തുടരാന് അന്ന് ആഗ്രഹിച്ചു. കണ്ണൂര് വിസി നിയമനത്തില് മുഖ്യമന്ത്രി ഇടപെട്ടത് മുതല് ആണ് ചാന്സലര് ആയി തുടരേണ്ടെന്നു തീരുമാനിച്ചത്. സര്ക്കാര് ഇടപെടല് ഇനി ഉണ്ടാകില്ല എന്ന് മുഖ്യമന്ത്രി ഉറപ്പ് പറഞ്ഞതോടെ ആണ് തീരുമാനം മാറ്റിയതെന്നും ഗവര്ണര് വ്യക്തമാക്കി.
കേരള വി സി നിയമനത്തിന് സെര്ച് കമ്മിറ്റി ഉണ്ടാക്കിയത് നിയമ പ്രകാരമാണ്. സേര്ച്ച് കമ്മിറ്റിയിലേക്ക് നോമിനിയെ നല്കാന് ആവശ്യപ്പെട്ടിട്ടും കേരള സര്വ്വകലാശാല നല്കിയില്ല. സര്വ്വകലാശാല നിയമഭേദഗതിയടക്കം ബില്ലുകള് പാസക്കാന് സഭക്ക് അധികാരം ഉണ്ട്: പക്ഷെ ബില് ഭരണ ഘടനാ വിരുദ്ധം അല്ലെന്നു ഉറപ്പാക്കാന് ഉള്ള ബാധ്യത ഗവര്ണ്ണര്ക്ക് ഉണ്ട്. മുഖ്യമന്ത്രിക്ക് ഏത് സമയത്തും രാജ് ഭവനിലേക്ക് സ്വാഗതം. ആശയ വിനിമയത്തിനു തയ്യാറെന്നും ഗവര്ണര് പറഞ്ഞു.
https://www.facebook.com/Malayalivartha
