എംഎൽഎ കെ ടി ജലീലിന്റെ കാശ്മീരിനെ കുറിച്ചുള്ള പ്രസ്താവനകളും പരാമർശങ്ങളും വളരെയധികം വിവാദമായിരുന്നു. ഇപ്പോൾ ഇതാ കെ ടി ജലീലിനെ അക്ഷരാർത്ഥത്തിൽ വെട്ടിലാക്കി ഗവർണർ ആരിഫ് മുഹമ്മദ് ഖാൻ രംഗത്തുവന്നിരിക്കുകയാണ്. കേരളത്തിൽ പ്രത്യേക ശ്രദ്ധ വേണമെന്ന് ചൂണ്ടിക്കാണിച്ച ഗവർണർ കെ.ടി.ജലീലിന്റെ രാജ്യ വിരുദ്ധ പരാമർശങ്ങൾക്ക് പ്രാധാന്യം നൽകരുതെന്നും പറഞ്ഞു.

കെ ടി.ജലീലിന്റെ രാജ്യ വിരുദ്ധ പരാമർശങ്ങൾക്ക് പ്രാധാന്യം നൽകരുത്. സ്വാതന്ത്ര്യ സമരത്തെപ്പറ്റി പോലും ജലീൽ ബോധവാനല്ല. കശ്മീരിന്റെ ചരിത്രം ജലീലിന് അറിയില്ലെന്നും അദ്ദേഹം കൂട്ടിച്ചേർത്തു. കേരളം മികച്ച സംസ്ഥാനമാണ്. വിവിധ മേഖലകളിൽ വൈവിധ്യം നിറഞ്ഞ നാട് ആണ് നമ്മുടെ കേരളം എന്നും ഗവർണർ ചൂണ്ടിക്കാണിച്ചു.

സംഘപരിവാറുകാരനാണോയെന്ന ചോദ്യത്തിന് 86 മുതൽ ആർഎസ്എസുമായി ബന്ധമുണ്ടെന്നായിരുന്നു ഗവർണർ പറഞ്ഞത്. വിദ്യാഭ്യാസരംഗത്തെ ആർഎസ്എസിന്റെ പ്രവർത്തനങ്ങൾ വിലമതിക്കാനാവാത്തതാണ് എന്നും അദ്ദേഹം പറഞ്ഞു. ആർഎസ്എസുമായുള്ള ബന്ധത്തിൽ അഭിമാനിക്കുന്നു. കണ്ണൂരിൽ അക്രമങ്ങൾ അടിച്ചു വിടുന്നതുപോലെ അല്ല ജനാധിപത്യരീതിയിൽ വേണം പ്രശ്‌നങ്ങൾക്ക് പരിഹാരം കാണാനെന്നും ഗവർണർ പറഞ്ഞു.

കേരളം ഭീകരവാദത്തെ പ്രോത്സാഹിപ്പിക്കില്ല. ഭീകരവാദികളെ സംരക്ഷിക്കരുതെന്നും ഗവർണർ ആരിഫ് മുഹമ്മദ്ഖാൻ തുറന്നടിക്കുകയുണ്ടായി. ഇക്കാര്യത്തിൽ കേരളത്തിൽ പ്രത്യേക ശ്രദ്ധ വേണമെന്നും ഗവർണ്ണർ വ്യക്തമാക്കി.

അതേസമയം സംസ്ഥാന സര്‍ക്കാരിനും കണ്ണൂര്‍ വിസിക്കുമെതിരെ ആഞ്ഞടിച്ച് ഗവര്‍ണര്‍ ആരിഫ് മുഹമ്മദ് ഖാന്‍ വീണ്ടും രംഗത്തെത്തി. രാഷ്ട്രീയ യജമാനന്മാരുടെ താല്പര്യം സംരക്ഷിക്കാന്‍ ആണ് വിസിയുടെ ശ്രമമെന്ന് ഗവര്‍ണര്‍ തുറന്നടിച്ചു. വി സിക്ക് നിയമം പ്രധാനം അല്ല. വിസി പാര്‍ട്ടി കേഡര്‍ എന്ന് ഗവര്‍ണര്‍ ആവര്‍ത്തിച്ചു.