കോൺഗ്രസ്സ് പാർട്ടിയുടെ കരുത്തുറ്റ നേതാവ് ഗുലാം നബി ആസാദ് ജി പാർട്ടിയിൽ നിന്നും പ്രാഥമിക അംഗത്വം അടക്കം രാജിവെച്ചു പാർട്ടി വിട്ട വാർത്ത കേട്ട് ഞെട്ടിപ്പോയി എന്ന് സന്തോഷ് പണ്ഡിറ്റ്. അദ്ദേഹം ഈ വിഷയത്തെ കുറിച്ച് ഫേസ്ബുക്കിൽ പങ്കു വച്ച കുറിപ്പിന്റെ പൂർണ്ണ രൂപം ഇങ്ങനെ;

പണ്ഡിറ്റിൻ്റെ രാഷ്ടീയ നിരീക്ഷണം കോൺഗ്രസ്സ് പാർട്ടിയുടെ കരുത്തുറ്റ നേതാവ് ഗുലാം നബി ആസാദ് ജി പാർട്ടിയിൽ നിന്നും പ്രാഥമിക അംഗത്വം അടക്കം രാജിവെച്ചു പാർട്ടി വിട്ട വാർത്ത കേട്ട് ഞെട്ടിപ്പോയി. ഇന്ദിരാ ജിയുടെ കാലം മുതൽ ഉള്ള കാശ്മീരിൽ നിന്നുള്ള കരുത്തുറ്റ നേതാവ് ആയിരുന്നു അദ്ദേഹം . കോൺഗ്രസ്സ് പാർട്ടിയുടെ കേന്ദ്ര മന്ത്രി, മുഖ്യമന്ത്രി, മുൻ രാജ്യസഭാ പ്രതിപക്ഷ നേതാവ് ഒക്കെ ആയി സേവനം അനുഷ്ഠിച്ചിട്ടുണ്ട്.

തൻ്റെ പല നിർദേശങ്ങളും അഭിപ്രായങ്ങളും പാർട്ടി ഗൗരവത്തിൽ എടുക്കുന്നില്ല എന്നതാണ് പാർട്ടി വിടുന്നതിനു കാരണമായി അദ്ദേഹം പറഞ്ഞത്. ഇനി ബിജെപിയോ മറ്റു വല്ല പാർട്ടികളിലോ അദ്ദേഹം ചേരുമോ എന്നു അടുത്ത ദിവസം അറിയാം.

കോൺഗ്രസ്സിന് കരുത്തുറ്റ ഒരു അധ്യക്ഷൻ ഉടനെ ഉണ്ടാകണം. ഈ മാസം പാർട്ടിക്കുള്ളിൽ നേതാവിനെ തെരഞ്ഞെടുക്കുന്നുണ്ട് . എൻ്റെ അഭിപ്രായത്തിൽ കഴിഞ്ഞ ലോകസഭാ ഫലം വന്നതിൽ പിന്നെ രാജിവെച്ച രാഹുൽ ജിയെ വീണ്ടും അധ്യക്ഷൻ ആക്കണം എന്നാണ്. അദ്ദേഹത്തെ ഇതിനായി പ്രവർത്തകർ നിർബന്ധിക്കണം.

മറുവശത്ത് ശശി തരൂർ ജി അടക്കം പല പ്രമുഖ നേതാക്കൾക്ക് അധ്യക്ഷൻ ആകുവാൻ പരോക്ഷമായി താൽപര്യം പ്രകടിപ്പിക്കുന്നുണ്ട്. പക്ഷേ കോൺഗ്രസ്സ് പാർട്ടിയുടെ ഐക്യം നില നിറുത്തുവാൻ നെഹ്റു കുടുംബത്തിൽ നിന്നുള്ള ഒരാളെ തന്നെ അധ്യക്ഷൻ ആക്കുന്നതാണ് ബുദ്ധി. ഇനി രാഹുൽ ജി ഏറ്റെടുക്കുന്നില്ലെങ്കിൽ പ്രിയങ്ക ജിയെ അധ്യക്ഷ ആക്കണം. അതാകും പാർട്ടിക്ക് ഗുണം ചെയ്യുക.

ശശി തരൂർ ജിയെ പോലെ ആരെ അധ്യക്ഷൻ ആക്കിയാലും പാർട്ടിക്ക് അതുകൊണ്ട് ഒരു ഗുണവും ഉണ്ടാകില്ല എന്നാണ് എൻ്റെ നിരീക്ഷണം. മറ്റുള്ള പാർട്ടിയിൽ നിന്നും ജനപ്രിയരായ നല്ല നേതാക്കന്മാരെ കോൺഗ്രസ്സ് പാർട്ടിയിലേക്ക് എങ്ങനെ ആകർഷിപ്പിക്കാം എന്നും പാർട്ടി ഉടനെ ചർച്ച ചെയ്യണം.

(വാൽകഷ്ണം.. പോകുന്നവർ ഒക്കെ പോകട്ടെ.. പതിന്മടങ്ങ് വീര്യത്തോടെ പുതിയ ചെറുപ്പക്കാരായ നേതാക്കന്മാർ കോൺഗ്രസ്സ് പാർട്ടിയിലേക്ക് വന്നാൽ പാർട്ടിക്ക് ഗുണമാണ്. പക്ഷേ ഇനിയും വൈകാതെ നല്ലൊരു അധ്യക്ഷനെ തെരഞ്ഞെടുക്കുക. എന്നാലേ ഭാവിയിലും ഇതുപോലെ നേതാക്കന്മാരുടെ കൊഴിഞ്ഞു പോക്ക് തടയുവാൻ ആകു.)