യാത്ര അവസാനിക്കേണ്ട കശ്മീരിലെ ലാൽ ചൗക്കിൽ പൊയി ഭാരത് ജോടോ എന്ന മുദ്രാവാക്യം വിളിക്കാൻ കോൺഗ്രസിന് കഴിയുമെന്ന് തോന്നുന്നുണ്ടെങ്കിൽ അത് നരേന്ദ്ര മോദി ഇന്ത്യ ഭരിക്കുന്നത് കൊണ്ട് മാത്രമാണ് എന്ന് കുറിച്ച് സന്ദീപ് ജി. വാര്യർ

ഫേസ്ബുക്ക് കുറിപ്പ് ഇങ്ങനെ;

ശ്രീ ശങ്കരൻ , സ്വാമി വിവേകാനന്ദൻ മുതൽ മഹാത്മജിയും വിനോബാ ഭാവെയുമടക്കമുള്ളവർ ഈ മഹാരാജ്യത്തെ തൊട്ടറിഞ്ഞുള്ള യാത്രകൾ നടത്തിയിട്ടുണ്ട് . വാഹന സൗകര്യങ്ങൾ അചിന്തനീയമായിരുന്ന കാലത്തും ഭാരത ഖണ്ഡത്തെ പലകുറി നടന്ന് കണ്ടറിഞ്ഞ മഹാരഥന്മാർ ഈ മണ്ണിൽ ജന്മമെടുത്തിട്ടുണ്ട് .

കേരളത്തിലെ പല ഗ്രാമങ്ങളിലെ ആൽത്തറകളിലും മഹാത്മജി നിന്ന് പ്രസംഗിച്ചിട്ടുണ്ട് എന്ന് കേൾക്കുമ്പോൾ വിസ്മയിച്ച് പോയിട്ടുണ്ട് . ഷൊർണൂർ റെയിൽവേ സ്റ്റേഷനിലെ രണ്ടാമത് പ്ലാറ്റഫോമിൽ വന്നിറങ്ങിയ വിവേകാനന്ദ സ്വാമികൾ നടത്തിയ പൊളിറ്റിക്കൽ സ്റ്റേറ്റ്‌മന്റ്‌ ഇന്നും പ്രസക്തമാണ് . പ്രചാരകനെന്ന നിലയിൽ ഈ രാജ്യത്തെ പലകുറി അടുത്ത് കണ്ടയാളാണ് നരേന്ദ്ര മോദിജി . യാത്രകൾ തന്നെയാണ് ഒരു മനുഷ്യന് പുതിയ കാഴ്ചപ്പാടുകളും വീക്ഷണങ്ങളും നൽകുന്നത് എന്ന കാര്യത്തിൽ സംശയമില്ല .

ഇന്ന് ലോകം മാറിയിരിക്കുന്നു . കേരളത്തിലെ കുട്ടികൾ ഹെൽമെറ്റ് ക്യാമും വച്ച് ലോകപര്യടനം നടത്തി വരുന്ന കാലമാണ് . ലോകം അത്രമേൽ ചെറുതായിരിക്കുന്നു . പക്ഷെ എതൊരു യാത്രക്കും ഒരു ലക്ഷ്യമുണ്ടായിരിക്കണം . ഉദ്ദേശമുണ്ടായിരിക്കണം . ലക്‌ഷ്യം നിറവേറ്റാനുള്ള ശ്രമം ഉണ്ടായിരിക്കണം .
ഇവിടെ അമ്പത് വയസ്സ് പിന്നിട്ട ഒരു രാഷ്ട്രീയ നേതാവ് ആദ്യമായി ഭാരത യാത്ര നടത്തുമ്പോൾ ആ യാത്രക്ക് ലക്ഷ്യമോ ഉദ്ദേശമോ ഉള്ളതായി തോന്നുന്നില്ല . രാഹുൽ ഗാന്ധിയുടെ ജാഥയിൽ രാഷ്ട്രീയം എന്തെങ്കിലും പറയുന്നുണ്ടോ ? ഇല്ല . ഒരാൾക്കൂട്ടം നടന്നു നീങ്ങുന്നു . ജനങ്ങളെ പ്രചോദിപ്പിക്കുന്ന ഒന്നും തന്നെ പറയാത്ത യാത്ര . പഴകി തേഞ്ഞ , ജനം തിരസ്കരിച്ച മുദ്രാവാക്യങ്ങൾക്കപ്പുറം എന്തുണ്ട് പുതുമ ?

ഒന്നാന്തരം വിഘടനവാദികളായ ഡിഎംകെ , ഒരിക്കൽ രാജീവ് ഗാന്ധിയുടെ കൊലപാതകത്തിന് കാരണക്കാർ എന്ന് കോൺഗ്രസ് ആരോപിച്ച ഡിഎംകെയുടെ സ്റ്റാലിനിൽ നിന്ന് പതാക ഏറ്റു വാങ്ങി തുടങ്ങിയ ഈ യാത്ര എങ്ങനെയാണ് ഭാരതത്തെ ഒരുമിപ്പിക്കുക ? നാഴികക്ക് നാല്പത് വട്ടം ഇന്ത്യ എന്ന രാജ്യത്തിന്റെ അസ്ഥിത്വത്തിനെ തന്നെ ചോദ്യം ചെയ്യുന്ന സ്റ്റാലിൻ ഉദ്‌ഘാടനം ചെയ്ത യാത്രയെ ഭാരത് ജോടോ യാത്ര എന്നല്ല ഭാരത് തോടോ യാത്ര എന്നാണ് വിളിക്കേണ്ടത് . യാത്ര അവസാനിക്കേണ്ട കശ്മീരിലെ ലാൽ ചൗക്കിൽ പൊയി ഭാരത് ജോടോ എന്ന മുദ്രാവാക്യം വിളിക്കാൻ കോൺഗ്രസിന് കഴിയുമെന്ന് തോന്നുന്നുണ്ടെങ്കിൽ അത് നരേന്ദ്ര മോദി ഇന്ത്യ ഭരിക്കുന്നത് കൊണ്ട് മാത്രമാണ് .

ഭാരത് തെരെ തുക്ടെ ഹൊംഗെ എന്ന മുദ്രാവാക്യം വിളിച്ച കനയ്യ കുമാർ ആണ് ഒരു ജാഥാംഗം . കശ്മീർ സംബന്ധിച്ച കനയ്യയുടെ നിലപാട് എന്താണ് ? ആർഎസ്എസ് വിരുദ്ധത ആളിക്കത്തിച്ച് കയ്യടി വാങ്ങൽ ഒന്നും നടക്കാൻ പോകുന്നില്ല .രാഹുൽ ഗാന്ധി രാഷ്ട്രീയം പറഞ്ഞാൽ രാഷ്ട്രീയമായ മറുപടി നൽകും . നിക്കർ കത്തിക്കൽ പോലെ വിലകുറഞ്ഞ പരിപാടികളൊന്നും മറുപടി അർഹിക്കുന്നില്ല . ജിഹാദികളുടെ കയ്യടിക്കായി നടത്തുന്ന അഭ്യാസമൊക്കെ കയ്യിൽ വച്ചിരുന്നാൽ മതി .

വാൽക്കഷ്ണം - താൻ ഈ യാത്രയെ നയിക്കുന്നില്ലെന്നും കോൺഗ്രസ് പ്രവർത്തകൻ എന്ന നിലയിൽ പങ്കെടുക്കുകയാണെന്നും രാഹുൽ ഗാന്ധി . മനസ്സിലായി ... ഈ യാത്രയും പൂർത്തീകരിക്കാൻ രാഹുലിന് ഉദ്ദേശമില്ല . ഇടക്ക് വച്ച് മുങ്ങും . ബാക്കി യാത്ര കെസി നമ്മെ നയിക്കും . ( എനിക്ക് പകരം രമണൻ ഗോദായിലേക്കിറങ്ങും )