ആദ്യഘട്ടത്തിൽ വോട്ടെടുപ്പ് നടക്കുന്ന ഏഴു ജില്ലകളിലെ പരസ്യപ്രചാരണം അവസാനിച്ചു . ഇന്നു നിശബ്ദ പ്രചാരണമാണ്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിലാണ് വോട്ടെടുപ്പ്.

595 തദ്ദേശ സ്ഥാപനങ്ങളിലെ 11,168 വാർഡുകളിലാണ് വിധിയെഴുത്ത്. ഇന്നലെ നടന്ന കലാശക്കൊട്ടിൽ ആവേശം വാനോളമുയർന്നു. 471 ഗ്രാമപഞ്ചായത്തുകളിലെ 8310 വാർഡുകൾ, 75 ബ്ലോക്ക് പഞ്ചായത്തുകളിലെ 1090 വാർഡുകൾ, 7 ജില്ലാപഞ്ചായത്തുകളിലെ 164 വാർഡുകൾ, 39 മുനിസിപ്പാലിറ്റികളിലെ 1371 വാർഡുകൾ, 3 കോർപ്പറേഷനുകളിലെ 233 വാർഡുകൾ എന്നിവിടങ്ങളിലാണ് നാളെ വോട്ടെടുപ്പ്.

തദ്ദേശ യുദ്ധത്തിൽ മേൽക്കൈ നേടുന്നവർക്ക് കരളുറപ്പോടെ നിയമസഭ തിരഞ്ഞെടുപ്പിന്റെ പോർക്കളത്തിലിറങ്ങാം. നിയമസഭയിൽ വീണ്ടും തുടർഭരണമെന്ന അതുല്യ നേട്ടമാണ് എൽ.ഡി.എഫ് ലക്ഷ്യം. പത്തുവർഷം ഭരണം കിട്ടാത്തതിന്റെ ക്ഷീണമകറ്റി, തിരിച്ചുവരവാണ് യു.ഡി.എഫ് ശ്രമം. ദേശീയ തലത്തിലെ ആധിപത്യത്തിന്റെ പ്രതിഫലനം കേരളത്തിലുണ്ടാക്കുമെന്ന വാശിയിൽ ബി.ജെ.പിയും. മൂവരും കനത്ത പോരാട്ട വീര്യത്തിലാണ് .