വടക്കഞ്ചേരി- മണ്ണുത്തി ദേശീയപാതയിലെ പന്നിയങ്കര ടോള്‍ പ്ലാസയിലെ നിരക്ക് ഇന്നു മുതല്‍ കൂടും. വാഹനങ്ങള്‍ക്ക് അഞ്ചുശതമാനം വരെ നിരക്ക് കൂട്ടാനായി നാഷണല്‍ ഹൈവേ അതോറിറ്റി തീരുമാനിച്ചു.

കാര്‍, ജീപ്പ്, വാന്‍ എന്നിവയ്ക്ക് ഒരു ഭാഗത്തേയ്ക്ക് 105 രൂപയാണ് പുതുക്കിയ നിരക്ക്. രണ്ടു ഭാഗത്തേയ്ക്കും പോകണമെങ്കില്‍ 155 രൂപയാണ് നല്‍കേണ്ടത്. ടോള്‍ പിരിവ് തുടങ്ങിയതിന് ശേഷം നിരക്ക് കൂട്ടുന്നത് ഇത് രണ്ടാം തവണയാണ്.

ലൈറ്റ്, കൊമേഷ്യല്‍ വാഹനം, ലൈറ്റ് ഗുഡ്സ് വാഹനം ,മിനി ബസ്സ് എന്നിവക്ക് 160 രൂപയും, തിരിച്ച് യാത്ര ഉണ്ടെങ്കില്‍ 240 രൂപയുമാണ് പുതിയ കണക്ക്. ബസ്, ട്രാക്ക് എന്നിവക്ക് ഒരു യാത്രക്ക് 325 ഉം ,തിരിച്ച് ഉണ്ടെങ്കില്‍ 485 ആണ് പുതുക്കിയ നിരക്ക്.

മുന്‍പ് വര്‍ധിപ്പിച്ച നിരക്ക് ഈടാക്കുന്നത് തടഞ്ഞ സിംഗിള്‍ ബെഞ്ച് ഉത്തരവ് ഹൈക്കോടതിയുടെ ഡിവിഷന്‍ ബെഞ്ച് റദ്ദാക്കിയ പശ്ചാത്തലത്തിലാണ് ഇന്ന് മുതല്‍ പുതിയ നിരക്ക് പ്രാബല്യത്തില്‍ വരുന്നത്. അതേസമയം വടക്കഞ്ചേരി, കിഴക്കഞ്ചേരി, കണ്ണമ്പ്ര, പുതുക്കോട്, വണ്ടാഴി, പാണഞ്ചേരി പഞ്ചായത്തിലുള്ളവര്‍ക്കു സൗജന്യയാത്ര തുടരും. തിരിച്ചറിയല്‍ രേഖകള്‍ കാണിച്ചാല്‍ പ്രത്യേക ട്രാക്കിലൂടെ കടന്നുപോകാവുന്നതാണ്.