മ്യൂസിയം, കുറവന്‍കോണം അക്രമക്കേസില്‍ അറസ്റ്റിലായ സന്തോഷിനെതിരെ പീഡനശ്രമക്കേസ്.... വനിതാ ഡോക്ടര്‍ക്കു നേരെ ലൈംഗികാതിക്രമം നടത്തുകയും കുറവന്‍കോണത്ത് ഭവനഭേദനത്തിനു ശ്രമിക്കുകയും ചെയ്തതിന് അറസ്റ്റിലായ സന്തോഷ് (39) തന്നെയാണു കഴിഞ്ഞ ഡിസംബറില്‍ രാത്രി നഗരത്തിലെ വീട്ടില്‍ അതിക്രമിച്ചു കടന്നു കത്തി ചൂണ്ടി വിദ്യാര്‍ഥിനിയെ പീഡിപ്പിക്കാന്‍ ശ്രമിച്ചതെന്നു പൊലീസ് സ്ഥിരീകരിച്ചു.

പേരൂര്‍ക്കട പൊലീസ് അന്നു ശേഖരിച്ച വിരലടയാളം ഇയാളുടേതുമായി ഒത്തുനോക്കിയാണ് ഇക്കാര്യം സ്ഥിരീകരിച്ചിട്ടുള്ളത്. പീഡനശ്രമത്തിനു കേസെടുത്തെങ്കിലും അന്വേഷണം മുന്നോട്ടു പോയിരുന്നില്ല.

2021 ഡിസംബര്‍ 19 ന് കുറവന്‍കോണത്തു തന്നെ മറ്റൊരു വീട്ടിലാണു പീഡനശ്രമം ഉണ്ടായത്. സിവില്‍ സര്‍വീസ് പരീക്ഷാ പരിശീലനം നടത്തിയിരുന്ന നാല് വിദ്യാര്‍ഥിനികള്‍ ഈ വീടിന്റെ മുകള്‍ നില വാടകയ്‌ക്കെടുത്തു താമസിച്ചിരുന്നു. രാത്രി രണ്ടു മണിയോടെ മതില്‍ ചാടി അകത്തു കടന്ന പ്രതി ഗ്രില്ലിന്റെ പൂട്ട് തകര്‍ത്തു മുകള്‍ നിലയില്‍ കടന്നു. ഉറങ്ങിക്കിടന്ന പെണ്‍കുട്ടിയുടെ വായ് പൊത്തിപ്പിടിച്ച ശേഷം കത്തി ചൂണ്ടി ഭീഷണിപ്പെടുത്തി പീഡിപ്പിക്കാന്‍ ശ്രമിച്ചു. കത്തി വീശിയപ്പോള്‍ പെണ്‍കുട്ടിയുടെ കൈ മുറിയുകയും ചെയ്തു.

ബഹളം കേട്ട് അടുത്ത മുറിയിലുള്ളവര്‍ ഓടിവന്നപ്പോള്‍ പുതപ്പ് വീശിയെറിഞ്ഞ ശേഷം ഇയാള്‍ രക്ഷപ്പെടുകയും ചെയ്തു. അപ്പോള്‍ തന്നെ പെണ്‍കുട്ടികള്‍ പൊലീസില്‍ അറിയിക്കുകയും വിശദമായ മൊഴി കൊടുക്കുകയും ചെയ്തിരുന്നു. എങ്കിലും ഒരു പ്രയോജനമുണ്ടായില്ല. സമീപവാസികള്‍ അക്രമിയെ പിടിക്കാനായി കുറേ ദിവസം രാത്രി കാത്തിരുന്നു. ഒരു മാസം കഴിഞ്ഞ് ഇതേ വീട്ടില്‍ ഇയാള്‍ വീണ്ടും എത്തിയെങ്കിലും പുറത്തു ശബ്ദം കേട്ടു വിദ്യാര്‍ഥിനികള്‍ ബഹളം വച്ചപ്പോള്‍ ഓടി രക്ഷപ്പെട്ടു.

ഇപ്പോള്‍ അറസ്റ്റിലായ സന്തോഷിന്റെ ദൃശ്യങ്ങള്‍ കണ്ടാണു പെണ്‍കുട്ടികള്‍ അയാളെ തിരിച്ചറിഞ്ഞത്. ജയിലില്‍ ഉള്ള സന്തോഷിനെ ഈ കേസിലും കസ്റ്റഡിയിലെടുത്തു തെളിവെടുക്കും. വനിതാ ഡോക്ടര്‍ക്കെതിരെ അതിക്രമം നടത്തിയ കേസില്‍ ഇന്നു കസ്റ്റഡിയില്‍ ലഭിക്കുമെന്നു മ്യൂസിയം പൊലീസ്.