സി.പി.എമ്മിന്റെ മൂന്ന് ദിവസത്തെ നിര്‍ണായക നേതൃയോഗങ്ങള്‍ക്ക് ഇന്ന് തുടക്കം.....ഇന്ന് സംസ്ഥാന സെക്രട്ടേറിയറ്റും നാളെയും മറ്റന്നാളും സംസ്ഥാന സമിതിയും... പെന്‍ഷന്‍ പ്രായം , ഗവര്‍ണര്‍ വിഷയങ്ങള്‍ ചര്‍ച്ചയായേക്കും.

ഗവര്‍ണറും സര്‍ക്കാരും തമ്മിലുള്ള നേര്‍ക്കുനേര്‍ പോരിനിടെ സി.പി.എമ്മിന്റെ മൂന്ന് ദിവസത്തെ നിര്‍ണായക നേതൃയോഗങ്ങള്‍ക്ക് ഇന്ന് തുടക്കമാകുന്നു. ഇന്ന് സംസ്ഥാന സെക്രട്ടേറിയറ്റും നാളെയും മറ്റന്നാളും സംസ്ഥാന സമിതിയുമാണ്. കോടിയേരി ബാലകൃഷ്ണന്റെ നിര്യാണത്തിന് ശേഷമുള്ള ആദ്യ സംസ്ഥാന നേതൃയോഗമാണിത്.

പൊതുമേഖലാ സ്ഥാപനങ്ങളിലെ പെന്‍ഷന്‍ പ്രായം അറുപതാക്കി ഏകീകരിച്ചത് മരവിപ്പിച്ചെങ്കിലും അതുണ്ടാക്കിയ രാഷ്ട്രീയ വിവാദം ചര്‍ച്ചയാകും. വിഷയം പാര്‍ട്ടിയില്‍ ആലോചിക്കാതെയാണെന്ന് സംസ്ഥാന സെക്രട്ടറി എം.വി.ഗോവിന്ദന്‍ പറഞ്ഞു കഴിഞ്ഞു. ഉത്തരവിറങ്ങിയത് എങ്ങനെയെന്ന് പരിശോധിക്കുമെന്നും വ്യക്തമാക്കി.

സര്‍വകലാശാലാ വിഷയത്തില്‍ മുഖ്യമന്ത്രി നടത്തിയ വിമര്‍ശനങ്ങള്‍ക്ക് ഇന്നലെ ഗവര്‍ണര്‍ രൂക്ഷമായ ഭാഷയിലാണ് മറുപടി നല്‍കിയത്. സ്വര്‍ണക്കടത്ത് കേസെടുത്തിട്ടാണ് മുഖ്യമന്ത്രിക്കും ഓഫീസിനുമെതിരെ അദ്ദേഹം കടന്നാക്രമണം നടത്തിയത്. പിണറായി വിജയന്‍ വിശ്വാസ്യതയില്ലാത്ത നേതാവെന്ന തരത്തില്‍ പ്രതികരിച്ച ഗവര്‍ണര്‍ വിട്ടുവീഴ്ചയ്ക്കില്ലെന്ന സൂചനയാണ് നല്‍കിയത്.

അതേസമംയം കേരളത്തില്‍ ഗവര്‍ണറുടെ നീക്കങ്ങള്‍ക്കെതിരെ പ്രാദേശികാടിസ്ഥാനത്തില്‍ പ്രതിഷേധ കണ്‍വെന്‍ഷനുകള്‍ക്ക് സി.പി.എം തുടക്കമിട്ടിട്ടുണ്ട്. 15ന് ഒരുലക്ഷം പേരുടെ രാജ്ഭവന്‍ മാര്‍ച്ചുണ്ട്. ഇന്നത്തെ അവസ്ഥയില്‍ അടുത്ത വര്‍ഷമാദ്യം നിയമസഭയിലവതരിപ്പിക്കേണ്ട നയപ്രഖ്യാപനം ഗവര്‍ണര്‍ അംഗീകരിക്കുമോയെന്ന കാര്യത്തിലും ആശങ്കയുയരുന്നുണ്ട്. അംഗീകരിച്ചില്ലെങ്കില്‍ കഴിഞ്ഞ തവണത്തെപോലെ അനുനയത്തിന് പോകാതെ നിയമപരമായി നീങ്ങാനാകും ശ്രമിക്കുക. എങ്കിലത് സമാനതകളില്ലാത്ത നിയമപോരാട്ടത്തിന് വഴിമാറാം.