പെരുമ്പാവൂര്‍ എം.എല്‍.എ. എല്‍ദോസ് കുന്നപ്പിള്ളിലിനെതിരെ വീണ്ടും എടുത്ത മര്‍ദ്ദന- സ്ത്രീത്വത്തെ അപമാനിക്കല്‍ കേസില്‍ എല്‍ദോസിന് ഉപാധികളോടെ മുന്‍കൂര്‍ ജാമ്യം അനുവദിച്ചു. തിരുവനന്തപുരം ഏഴാം അഡീ. ജില്ലാ സെഷന്‍സ് കോടതി ജഡ്ജി പ്രസുന്‍ മോഹന്റെ ബെഞ്ചാണ് ജാമ്യം അനുവദിച്ചത്.

അന്വേഷണവുമായി പ്രതി സഹകരിക്കണം. അന്വേഷണ ഉദ്യോഗസ്ഥന്‍ അറസ്റ്റ് ചെയ്യുന്ന പക്ഷം ഉടന്‍ 25,000 രൂപയുടെ പ്രതിയുടെ സ്വന്ത ജാമ്യ ബോണ്ടും തുല്യ തുകക്കുള്ള രണ്ടാള്‍ ജാമ്യ ബോണ്ടിടിന്‍മേലും പ്രതിയെ വിട്ടയക്കണം. അന്വേഷണ ഉദ്യോഗസ്ഥന്‍ രേഖാമൂലം ആവശ്യപ്പെടുന്ന പക്ഷം ഹാജരാകണം. സാക്ഷികളെയോ കേസിന്റെ വസ്തുത അറിയാവുന്നവരേയോ നേരിട്ടോ മറ്റു മാര്‍ഗ്ഗങ്ങളിലൂടെയോ സ്വാധീനിക്കാനോ ഭീഷണിപ്പെടുത്താനോ പാടില്ല. തെളിവു നശിപ്പിക്കരുത്. കോടതിയുടെ മുന്‍കൂര്‍ അനുമതിയില്ലാതെ കേരളം വിടരുതെന്നുമുള്ള ഉപാധിയിലാണ് ജാമ്യം നല്‍കിയത്.

കേസില്‍ 3 അഭിഭാഷകരെയും ഒരു ഓണ്‍ലൈന്‍ മാധ്യമ പ്രവര്‍ത്തകനെയുമടക്കം 4 പേരെ കൂടുതല്‍ 2 മുതല്‍ 5 വരെ പ്രതിചേര്‍ത്ത് വഞ്ചിയൂര്‍ പോലീസ് വെള്ളിയാഴ്ച (ഒക്ടോബര്‍ 28) അഡീ. റിപ്പോര്‍ട്ട് സമര്‍പ്പിക്കുകയായിരുന്നു. എല്‍ദോസിന്റെ ജാമ്യ ഹര്‍ജി 28 ന് രാവിലെ 11.45 മണിക്ക് പ്രാരംഭവാദം കേട്ട് ഒക്ടോബര്‍ 31 ലേക്ക് മാറ്റിയ ശേഷം ഉച്ചക്ക് 12.30 നാണ് അഡീ. റിപ്പോര്‍ട്ട് തിരുവനന്തപുരം പതിനൊന്നാം ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേട്ട് കോടതിയിലാണ് സമര്‍പ്പിച്ചത്.

എഫ് ഐ ആര്‍ പ്രതി കോളത്തില്‍ പ്രതിസ്ഥാനത്ത് എല്‍ദോസ് എംഎല്‍ എ എന്ന് പറഞ്ഞിട്ടുള്ളതും എന്നാല്‍ അന്വേഷണത്തില്‍ അലക്‌സ് , ജോസ് , സുധീര്‍ എന്നീ 3 അഭിഭാഷകരും രാഗം രാധാകൃഷ്ണന്‍ എന്ന ഒരു ഓണ്‍ലൈന്‍ മാധ്യമപ്രവര്‍ത്തകനുമടക്കം 4 പേര്‍ കൂടി യുവതിയുടെ സ്ത്രീത്വത്തെ അപമാനിക്കുകയും യുവതിയില്‍ നിന്നും ഒത്തുതീര്‍പ്പു രേഖ ഭയപ്പെടുത്തി അപഹരിക്കുന്നതിനായി ഭീഷണിപ്പെടുത്തുകയും ചെയ്ത കൃത്യത്തില്‍ പങ്കും പങ്കാളിത്തവും കൂട്ടായ്മയും ഉള്ളതായി വെളിവായിട്ടുള്ളതിനാല്‍ ഇവരെ 2 മുതല്‍ 5 വരെ പ്രതിസ്ഥാനത്ത് ചേര്‍ത്ത് അന്വേഷണം തുടരുന്ന വിവരത്തിന് ഈ അഡീ. റിപ്പോര്‍ട്ട് ഹാജരാക്കുന്നുവെന്നാണ് അഡീ. റിപ്പോര്‍ട്ട്.
ഇന്ത്യന്‍ ശിക്ഷാ നിയമത്തിലെ 354 ( എ ) (1) (സ്വാഗതാര്‍ഹമല്ലാത്തതും പ്രകടമായിത്തന്നെ ലൈംഗികവുമായ സമീപനം ഉള്‍പ്പെടുന്ന ശാരീരിക സ്പര്‍ശവും മുന്നേറ്റങ്ങളും നടത്തല്‍) ,
, 342 ( അന്യായമായി തടഞ്ഞുവെക്കല്‍) , 384 ( ഭയപ്പെടുത്തി മൂല്യമുള്ള ഈടായി മാറ്റാവുന്ന ഒപ്പുവച്ചതോ മുദ്രവച്ചതോ
ആയ ഏതെങ്കിലുമോ കൊടുക്കുവാന്‍ പ്രചോദിപ്പിച്ച് ക്ഷതി നേരിടുമെന്ന ഭയം ഉളവാക്കി അപഹരിക്കല്‍) , 323 (സ്വേച്ഛയാ ദേഹോപദ്രവം ഏല്‍പ്പിക്കല്‍) , 294 ( ബി ) (അസഭ്യ വാക്കുകള്‍ വിളിക്കുക), 34 (കൃത്യത്തിന് പരസ്പരം ഉത്സാഹികളുമായി നിന്ന് പ്രവര്‍ത്തിക്കല്‍) എന്നീ വകുപ്പുകള്‍ ആണ് അഡീ. റിപ്പോര്‍ട്ടില്‍ എല്‍ദോസുള്‍പ്പെടെ 5 പ്രതികള്‍ക്കെതിയും ചുമത്തിയിട്ടുള്ളത്. എഫ്‌ഐആറിലെ സെക്ഷന്‍ ഓഫ് ലോ ആള്‍ട്ടര്‍ (നിയമത്തിലെ വകുപ്പുകള്‍ മാറ്റി ഭേദഗതി) ചെയ്യാനും എഫ് ഐ ആറിലെ സെക്ഷന്‍ ഓഫ് ലോയ് ഒപ്പം ചേര്‍ത്തു വായിക്കാനും പ്രത്യേക അപേക്ഷയും പോലീസ് ഫയലിംഗ് കോടതിയായ പതിനൊന്നാം മജിസ്‌ട്രേട്ട് കോടതി മുമ്പാകെ സമര്‍പ്പിച്ചിട്ടുണ്ട്.