മ്യൂസിയം വളപ്പില്‍ പ്രഭാത സവാരിക്കെത്തിയ വനിതാ ഡോക്ടര്‍ക്ക് നേരെ നടത്തിയ ലൈംഗിക അതിക്രമക്കേസില്‍ കുറവന്‍കോണം വീടാക്രമണ കേസ് പ്രതി മലയിന്‍കീഴ് സന്തോഷിന് പ്രൊഡക്ഷന്‍ വാറണ്ട്. തിരുവനന്തപുരം ചീഫ് ജുഡീഷ്യല്‍ മജിസ്‌ട്രേട്ട് കോടതിയുടേതാണുത്തരവ്. പ്രതിയെ കോടതിയില്‍ ഹാജരാക്കാന്‍ ജയില്‍ സൂപ്രണ്ടിനോട് കോടതി ഉത്തരവിട്ടു.

കുറവന്‍കോണം വീടാക്രമണക്കേസില്‍ നവംബര്‍ 2 മുതല്‍ റിമാന്റില്‍ കഴിയുന്ന സന്തോഷിനെ ഒക്ടോബര്‍ 26 ന് പുലര്‍ച്ചെ നടന്ന മ്യൂസിയം കേസില്‍ അറസ്റ്റ് രേഖപ്പെടുത്താന്‍ ഇയാളുടെസാന്നിധ്യം അത്യന്താപേക്ഷിതമാകയാല്‍ കോടതിയില്‍ വച്ച് അറസ്റ്റ് രേഖപ്പെടുത്താന്‍ അനുവദിക്കണമെന്ന മ്യൂസിയം പോലീസിന്റെ അപേക്ഷയിലാണ് സി ജെ എം ആര്‍. രേഖയുടെ ഉത്തരവ്.
കുറവന്‍കോണത്തെ വീട്ടില്‍ അതിക്രമിച്ച് കടന്ന് പൂട്ട് തകര്‍ത്ത് ക്യാമറ നശിപ്പിച്ച പേരൂര്‍ക്കട കേസിലാണ് പ്രതി നിലവില്‍ റിമാന്റില്‍ കഴിയുന്നത്.

അതേ സമയം മ്യൂസിയം കേസിലെ പ്രതി സന്തോഷ് തന്നെയാണ് പേരൂര്‍ക്കടയില്‍ വീട്ടില്‍ കയറി പെണ്‍കുട്ടിയെ ആക്രമിച്ചതെന്നും തെളിഞ്ഞു. വിരളടയാള പരിശോധനയിലാണ് സന്തോഷ് തന്നെയാണ് മാസങ്ങള്‍ക്ക് മുമ്പ് പെണ്‍കുട്ടിയെ ഉപദ്രവിക്കാന്‍ ശ്രമിച്ചതെന്ന് കണ്ടെത്തിയത്.

2021 ഡിസംബറിലായിരുന്നു കേസിന് ആസ്പദമായ സംഭവമുണ്ടായത്. നഗരത്തില്‍ പഠനാവശ്യത്തിനെത്തിയ പെണ്‍കുട്ടി താമസിക്കുന്ന സ്ഥലത്താണ് പ്രതി അതിക്രമിച്ച് കയറിയത്. വീട്ടില്‍ കയറിയ ഇയാള്‍ യുവതിയോട് മോശമായി പെരുമാറാന്‍ ശ്രമിച്ചു. പെണ്‍കുട്ടിയുടെ പരാതിയില്‍ ഡിസംബറില്‍ പൊലീസ് കേസെടുത്തുവെങ്കിലും പ്രതിയെ പിടികൂടിയിരുന്നില്ല.

മ്യൂസിയത്തിനുള്ളില്‍ വനിതാ ഡോക്ടര്‍ക്കെതിരെ ലൈംഗികാതിക്രമം നടത്തിയ കേസില്‍ സന്തോഷിനെ പിടികൂടിയതോടെ മാധ്യമങ്ങളില്‍ ചിത്രം വന്നതോടെയാണ് യുവതി സന്തോഷിനെ തിരിച്ചറിഞ്ഞത്. ഇതേ തുടര്‍ന്നാണ് പൊലീസ് അന്വേഷണം നടത്തിയത്. വിരല്‍ അടയാള (ഫിംഗര്‍ പ്രിന്റ്‌സ്) പരിശോധനയിലാണ് പ്രതി സന്തോഷ് തന്നെയാണെന്ന് തിരിച്ചറിഞ്ഞത്. ശാസ്ത്രീയമായ തെളിവുകള്‍ അന്ന് തന്നെ പൊലീസ് ശേഖരിച്ചിരുന്നു. അതാണ് സന്തോഷിനെ കുടുക്കിയത്.
മന്ത്രി റോഷി അഗസ്റ്റിന്റെ പ്രൈവറ്റ് സെക്രട്ടറിയുടെ ഡ്രൈവറാണ് സന്തോഷ്. കുറവംകോണത്തെ വീട്ടില്‍ അതിക്രമിച്ച് കയറിയതും ഇയാള്‍ തന്നെയാണെന്ന് തെളിഞ്ഞിരുന്നു.