തലശേരിയിൽ കാറിൽ ചാരിനിന്നതിന്റെ പേരിൽ രാജസ്ഥാൻ സ്വദേശിയായ ആറ് വയസുകാരനെ തൊഴിച്ച് തെറിപ്പിച്ച മുഹമ്മദ് ശിഹ്‌ഷാദിനെതിരെ(20) വധശ്രമത്തിന് കേസെടുത്തിരിക്കുകയാണ് പൊലീസ്. സംഭവം വാർത്തയായതോടെ പൊലീസ് ഇയാളെ അറസ്‌റ്റ് ചെയ്‌തിട്ടുണ്ട്. തലശേരിയിൽ തിരക്കേറിയ തെരുവിൽ നോ പാർക്കിംഗ് ഏരിയയിൽ ഇയാൾ വാഹനം നിർത്തിയ സമയത്താണ് കുട്ടി ചാരി നിന്നത്. ഇപ്പോഴിതാ ഇതിനെതിരെ പ്രതികരിച്ചുകൊണ്ട് രംഗത്ത് എത്തിയിരിക്കുകയാണ് ജസ്ല മാടശ്ശേരി.

ഫേസ്ബുക്ക് കുറിപ്പ് ഇങ്ങനെ;

ഗോത്ര കാലം മുതൽ മനുഷ്യൻ അവന് അപരനെന്നു തോന്നുന്നവരോടുള്ള വെറുപ്പ് തലയിൽ കൊണ്ടു നടക്കുന്നവനാണ്. ഗോത്രീയതയും മതവും ആ വെറുപ്പിനെ ഊട്ടി ഉറപ്പിക്കുന്നവയാണ്. ഇണകളെപ്പോലും ജാതി മത കോളങ്ങളിൽ തിരയുന്ന മനുഷ്യർ ഇങ്ങനെയൊക്കെ ചെയ്തില്ലങ്കിലേ അത്ഭുതമുള്ളു. സ്വഗോത്ര സ്നേഹവും പര ഗോത്ര വിദ്വേഷവും തലച്ചോറിൽ ഏറ്റി നടന്ന് വെറുപ്പ് മാത്രം പ്രസരിക്കുന്നവർക്ക് എന്ത് മനുഷ്യത്വം.? എന്ത് മാനവികത.!?

മതം, ജാതി, നിറം, വസ്ത്രം, ജോലി, പ്രിവിലേജ് അങ്ങനെ എല്ലാത്തിലും വിവേചനം മാത്രം കാണുന്നവർ ഈ സംഭവത്തിൽ സ്വയം വലുതാകാനും മാനവികത പറയാനും തുടങ്ങിയിട്ടുണ്ട്. കുറ്റക്കാരൻ നിയപരമായി ശിക്ഷിക്കപ്പെടുന്നതിനോടൊപ്പം മനുഷ്യർ ഒന്നായി ചിന്തിക്കേണ്ട വിഷയം.