രാജ്ഭവനില് ആഘോഷം... വൈസ് ചാന്സലര്മാരുടെ ഹിയറിങ് ഇന്ന്; പുറത്താകാതിരിക്കാന് കാരണം കാണിക്കണം; യോഗ്യത ഇല്ലാത്തവരെ പുറത്താക്കാന് ഉറച്ച് ഗവര്ണര്; നിര്ണായക നീക്കത്തിനിടെ മുഖ്യമന്ത്രിയെയും മന്ത്രിമാരെയും ക്രിസ്തുമസ് വിരുന്നിനുക്ഷണിച്ച് ഗവര്ണര്
ഗവര്ണറും സര്ക്കാരും തമ്മിലുള്ള പോരില് മറ്റൊരു നിര്ണായക ഘട്ടത്തിലേക്ക്. ഒരേസമയം ശക്തമായ നടപടിയും അതേസമയം മഞ്ഞുരുകലും കാണാം. പുറത്താക്കാതിരിക്കാന് കാരണം കാണിക്കല് നോട്ടീസ് നല്കിയ വൈസ് ചാന്സലര്മാരുടെ ഹിയറിങ് ഗവര്ണര് ഇന്ന് നടത്തും. രാജ്ഭവനില് 11 മണി മുതലാണ് ഹിയറിങ്.
വിസിമാര് നേരിട്ടോ അല്ലെങ്കില് വിസിമാര് ചുമതലപ്പെടുത്തിയ അഭിഭാഷകരോ ഹിയറിങ്ങിന് എത്തും. വിദേശത്തുള്ള എംജി വിസിയുടെ ഹിയറിങ് പിന്നീട് നടത്തും. ഇന്നെത്താന് പ്രയാസം ഉണ്ടെന്നാണ് കണ്ണൂര് വിസി അറിയിച്ചിരിക്കുന്നത്. കെടിയു വിസി രാജശ്രീയെ പുറത്താക്കിയ സുപ്രീം കോടതി വിധിയുടെ പശ്ചാത്തലത്തില് ആണ് ഹിയറിങ്. യുജിസി മാര്ഗ്ഗനിര്ദേശപ്രകാരമുള്ള യോഗ്യത ഇല്ലാത്ത മുഴുവന് വിസിമാരെയും പുറത്താക്കാന് ആണ് ഗവര്ണറുടെ നീക്കം.
ഹിയറിങ്ങ് കഴിഞ്ഞാലും കോടതിയില് വിസിമാര് നല്കിയ കേസ് കൂടി പരിഗണിച്ചാകും ഗവര്ണര് അന്തിമ നിലപാട് എടുക്കുക. ഗവര്ണറുടെ കാരണം കാണിക്കല് നോട്ടീസിനെതിരെ വൈസ് ചാന്സലര്മാര് സമര്പ്പിച്ച ഹര്ജി ഹൈക്കോടതി ഇന്ന് വീണ്ടും പരിഗണിച്ചേക്കും. കാരണം കാണിക്കല് നോട്ടീസ് നല്കാന് ചാന്സലറായ ഗവര്ണര്ക്ക് അധികാരമില്ലെന്നാണ് വിസിമാരുടെ വാദം. ചാന്സലറുടെ അധികാര പരിധി സംബന്ധിച്ച് വിശദമായ വാദം കേള്ക്കണമെന്നും വിസിമാര് ആവശ്യപ്പെട്ടിരുന്നു. ഉച്ചയ്ക്ക് 1.45ന് ജസ്റ്റിസ് ദേവന് രാമചന്ദ്രന് ആണ് ഹര്ജികള് പരിഗണിക്കുക.
അതേസമയം കേന്ദ്രസര്ക്കാരിനു വേണ്ടി ഗവര്ണ്ണര്മാര് അധികാര ദുര്വിനിയോഗം നടത്തുന്നു എന്ന് സിപിഎം എംപി വി ശിവദാസന് രാജ്യസഭയില് ആരോപിച്ചു. കേരളത്തില് ധനമന്ത്രിയിലുള്ള പ്രീതി നഷ്ടമായെന്ന് ഗവര്ണ്ണര് കത്തു നല്കിയത് ഇതിന് ഉദാഹരണമാണെന്ന് ശിവദാസന് പറഞ്ഞു. ഗവര്ണ്ണര്മാരെ നിയമിക്കുന്ന ചട്ടങ്ങളില് മാറ്റം നിര്ദ്ദേശിക്കുന്ന സ്വകാര്യ ബില്ല് അവതരിപ്പിച്ച് സംസാരിക്കുകയായിരുന്നു വി. ശിവദാസന്. കേരളത്തിലും തമിഴ്നാട്ടിലും നിയമസഭ പാസാക്കിയ ബില്ലുകള്ക്ക് അംഗീകാരം നല്കാതെ ഗവര്ണ്ണര്മാര് പിടിച്ചു വയ്ക്കുകയാണെന്നും ശിവദാസന് കുറ്റപ്പെടുത്തി. ബില്ലിന്മേലുള്ള ചര്ച്ച അടുത്തയാഴ്ചയും തുടരും.
അതേസമയം ഗവര്ണര് സര്ക്കാര് വിഷയത്തില് മഞ്ഞുരുകുന്ന കാഴ്ചയും കാണാം. മുഖ്യമന്ത്രിയെയും മന്ത്രിമാരെയും ക്രിസ്തുമസ് വിരുന്നിനു ക്ഷണിച്ച് ഗവര്ണര് ആരിഫ് മുഹമ്മദ് ഖാന്. സര്ക്കാരുമായി ഏറ്റുമുട്ടുന്നതിനിടയില് മുഖ്യമന്ത്രിയെ വിരുന്നിനുക്ഷണിക്കുന്നത് ഗവര്ണറുടെ ഭാഗത്തുനിന്നുള്ള അപ്രതീക്ഷിത നീക്കമാണ്. 14-ന് വൈകീട്ട് അഞ്ചിന് രാജ്ഭവനിലാണ് വിരുന്നൊരുക്കുന്നത്.
വിവിധ ക്രൈസ്തവ വിഭാഗത്തിലെ മതമേലധ്യക്ഷന്മാര്, ചീഫ് സെക്രട്ടറിയടക്കമുള്ള ഉന്നത ഉദ്യോഗസ്ഥര് എന്നിവരെയും ക്ഷണിക്കുന്നുണ്ട്. മുഖ്യമന്ത്രിയും മറ്റുമന്ത്രിമാരും വിരുന്നില് പങ്കെടുക്കുന്ന കാര്യത്തില് വ്യക്തത വന്നിട്ടില്ല. ഓണാഘോഷത്തിന് സര്ക്കാര് ഗവര്ണറെ ക്ഷണിക്കാത്തത് വിവാദമായിരുന്നു. സാധാരണ ഗവര്ണറും ഭാര്യയുമാണ് മുഖ്യാതിഥികള്. ക്ഷണിക്കാത്തതിനാല് ഗവര്ണര് ആ ദിവസം അട്ടപ്പാടിയിലെ ആദിവാസികള്ക്കൊപ്പമാണ് ഓണമാഘോഷിച്ചത്.
അതേസമയം യുജിസി മാനദണ്ഡ ലംഘിച്ച് നിയമിക്കപ്പെട്ട ഒന്പത് സര്വകലാശാല വി.സിമാരെ പുറത്താക്കാനായിരുന്നു ചാന്സലര് കൂടിയായ ഗവര്ണര് ആരിഫ് മുഹമ്മദ് ഖാന് നോട്ടീസ് നല്കിയത്. നിശ്ചയിക്കപ്പെട്ട സമയത്തിനകം വിസിമാര് എല്ലാവരും വിശദീകരണം നല്കിയിരുന്നു. ഇതിന്റെ തുടര് നടപടിയായി വിസിമാരുടെ ആവശ്യം കൂടി കണക്കിലെടുത്താണ് ഇന്ന് ഹിയറിങ് നടത്തുന്നത്. സര്വീസില് നിന്നും വിരമിച്ച കേരള വി.സി വി പി മഹാദേവന് പിള്ളക്കും ഹിയറിങിന് നോട്ടീസ് നല്കിയിട്ടുണ്ട്. രാവിലെ 11ന് ആദ്യം അദ്ദേഹത്തിനാണ് ഹിയറിംഗിന് സമയം അനുവദിച്ചിട്ടുള്ളത്. ഇത്തരത്തില് അര മണിക്കൂര് വീതമാണ് ഓരോ വി.സിക്കും അനുവദിച്ചിട്ടുള്ളത്.
കുസാറ്റില് പരിപാടിയുള്ളതിനാല് സംസ്കൃതം സര്വകലാശാല വി.സി എം.വി നാരായണന് ഓണ്ലൈന് വഴി ഹിയറിങിന് ഹാജരാകാം. ഉച്ചയ്ക്ക് ശേഷം ഓണ്ലൈന് ഹിയറിങ് നടത്താമെന്ന് രാജ്ഭവന് വി.സിയെ അറിയിച്ചു. റഷ്യന് സന്ദര്ശനത്തിലുള്ള എം.ജി വി.സിക്ക് ജനുവരിയില് ഹിയറിങ് നടത്തും. ഗവര്ണര് കാരണം കാണിക്കല് നോട്ടീസ് നല്കിയ ഫിഷറീസ് സര്വകലാശാല വി.സി റിജി ജോണിനെ ഹൈക്കോടതി പുറത്താക്കിയിരുന്നു. അതിനാല് തന്നെ അദ്ദേഹം ഹിയറിങ്ങിന് എത്തേണ്ടതില്ല. ബാക്കിയുള്ള എട്ട് സര്വകലാശാല വി.സിമാര്ക്കാണ് ഹിയറിംഗ് നടത്തുക.
"
https://www.facebook.com/Malayalivartha
