കാര്‍ഷിക മേഖലക്കായി ഈ വര്‍ഷം 156.3 കോടി രൂപ ബജറ്റില്‍ വകയിരുത്തി. ഇതില്‍ 95.10 കോടി നെല്‍കൃഷിക്കായിട്ടാണ് മാറ്റിവച്ചിരിക്കുന്നത്. നാളികേരം താങ്ങുവില ഉയര്‍ത്തിയിട്ടുണ്ട്. നാളികേരത്തിന്റെ താങ്ങുവില 32ല്‍ നിന്നും 34 ആക്കിയാണ് ഉയര്‍ത്തിയത്.സുഗന്ധവ്യജ്ഞനങ്ങള്‍ക്കായി 4.6 കോടിയും ഞങ്ങളും കൃഷി പദ്ധതിക്ക് 6 കോടിയും ബജറ്റില്‍ വകയിരുത്തിയിട്ടുണ്ട്. വിള ഇന്‍ഷുറന്‍സിന് 31 കോടി അനുവദിച്ചു.

കുട്ടനാട്ടിലെ കര്‍ഷകര്‍ക്കായി 17 കോടിയും പ്രഖ്യാപിച്ചിട്ടുണ്ട്. മണ്ണ് ജല വികസനത്തിനായി 87.75 കോടിയും ക്ഷീരവകുപ്പിന് 114 കോടി രൂപയും വകയിരുത്തി. മൃഗചികിത്സ മെച്ചപ്പെടുത്തുന്നതിനായി 41 കോടി അനുവദിച്ചു. കൊല്ലം, കാസര്‍കോട് ജില്ലകളില്‍ പെറ്റ് ഫുഡ് കമ്പനിക്കായി 20 കോടി, ഉള്‍നാടന്‍ മത്സ്യബന്ധനത്തിനായി 5 കോടി, ശുചിത്വ സാഗരം പദ്ധതി 5.5 കോടി,മത്സ്യത്തൊഴിലാളിക്ക് സഹായം ലഭ്യമാക്കുന്ന സമ്പാദ്യസമാശ്വാസ പദ്ധതിക്കായി 27 കോടി എന്നിവയാണ് ബജറ്റിലെ മറ്റു പ്രഖ്യാപനങ്ങള്‍.

കൊല്ലം, കാസര്‍കോട് ജില്ലകളില്‍ പെറ്റ് ഫുഡ് കമ്പനിക്കായി 20 കോടി വകയിരുത്തി. വന്യജീവി ആക്രമണത്തില്‍ നഷ്ടപരിഹാരം ഉള്‍പ്പെടെയുള്ള പ്രവര്‍ത്തനങ്ങള്‍ക്കായി 50.85 കോടി രൂപ മാറ്റിവെച്ചു. അതിജീവനത്തിന്റെയും വീണ്ടെടുപ്പിന്റെയും പ്രതീക്ഷകള്‍ യാഥാര്‍ഥ്യമായ വര്‍ഷമാണിതെന്ന് ധനമന്ത്രി പറഞ്ഞു. നോട്ട് നിരോധനം അടക്കമുള്ള വെല്ലുവിളികളെ അതിജീവിക്കാന്‍ കഴിഞ്ഞു. കാര്‍ഷിക വ്യവസായ മേഖലയിലെ വളര്‍ച്ച സമീപ കാലത്ത് ഇതാദ്യമാണ്.

കാര്‍ഷിക മേഖലയില്‍ 6.7 ശതമാനം വളര്‍ച്ചയുണ്ടായി. ഇത്തരത്തില്‍ സമ്പദ് വ്യവസ്ഥയെ പുനരുജ്ജീവിപ്പിച്ച് ഉത്പാദനവും അതുവഴി വരുമാനവും വര്‍ധിപ്പിക്കുക എന്നതാണ് ഇടത് സര്‍ക്കാരിന്റെ നയം. തനത് വരുമാനവും കൂടി. വ്യവസായ മേഖലയില്‍ ഉല്‍പന്ന നിര്‍മാണ മേഖലയില്‍ വളര്‍ച്ച ഉണ്ടായി. തനത് വരുമാനം 68,803.5 കോടിയായെന്നും ധനമന്ത്രി പറഞ്ഞു. എന്നാല്‍ നെല്ല് സംഭരണത്തിന് കഴിഞ്ഞ വര്‍ഷം നീക്കി വെച്ച പണം പോലും ഇതുവരെ നല്കിയിട്ടില്ല.