സംസ്ഥാന ബജറ്റിനെതിരെ പ്രതിഷേധം കടുപ്പിച്ച് കോണ്‍ഗ്രസ്. ധനമന്ത്രി കെ എന്‍ ബാലഗോപാല്‍ ഇന്നലെ നിയമസഭയില്‍ അവതരിപ്പിച്ച ബജറ്റിലെ കടുത്ത നികുതി നിര്‍ദേശങ്ങള്‍ക്കെതിരെ ഇന്ന് സംസ്ഥാന വ്യാപകമായി കോണ്‍ഗ്രസ് കരിദിനം ആചരിക്കും. ഇന്നലെ വൈകിട്ട് ചേര്‍ന്ന കെപിസിസിയുടെ അടിയന്തര ഓണ്‍ലൈന്‍ യോഗത്തിലാണ് തീരുമാനം.

ബജറ്റിനെതിരെ പൊതുജനമധ്യത്തില്‍ ശക്തമായ പ്രചാരണം അഴിച്ചു വിടാനാണ് കെപിസിസി യോഗത്തില്‍ തീരുമാനിച്ചത്. കൂടുതല്‍ സമരപരിപാടികള്‍ ഇന്ന് കെപിസിസി അധ്യക്ഷന്‍ പ്രഖ്യാപിക്കും. ഹൈക്കോടതി നിര്‍ദേശ പ്രകാരം മുന്‍ കൂട്ടി നോട്ടീസ് നല്‍കി ഹര്‍ത്താല്‍ ആചരിക്കുന്ന കാര്യവും നേതൃത്വം പരിഗണിക്കുന്നുണ്ട്.


അതേസമയം സംസ്ഥാന ബജറ്റിനെതിരെ പ്രതിപക്ഷ പ്രതിഷേധം. ഇന്നലെ സെക്രട്ടറിയേറ്റിനു പുറത്തു പ്രതിഷേധിച്ച യുവമോര്‍ച്ച, യൂത്ത് കോണ്‍ഗ്രസ് പ്രവര്‍ത്തകര്‍ക്കുനേരെ പോലീസ് ജലപീരങ്കി പ്രയോഗിച്ചു. ബജറ്റ് പേപ്പര്‍ കത്തിച്ചു യൂത്ത് കോണ്‍ഗ്രസ് പ്രതിഷേധിച്ചു. കോട്ടയത്ത് കെ സുരേന്ദ്രന്റെ നേതൃത്വത്തില്‍ ബിജെപി പ്രവര്‍ത്തകര്‍ മുഖ്യമന്ത്രിയുടെ കോലം കത്തിച്ചു. കൊച്ചിയില്‍ മുഖ്യമന്ത്രി പിണറായി വിജയനെതിരെ കരിങ്കൊടി പ്രതിഷേധമുണ്ടായി. ആലുവയില്‍ വെച്ചാണ് മുഖ്യമന്ത്രിക്കുനേരെ യൂത്ത് കോണ്‍ഗ്രസ് പ്രതിഷേധം ഉണ്ടായത്. ബജറ്റ് പ്രഖ്യാപനങ്ങളിലാണ് പ്രതിഷേധമുണ്ടായത്.