കേന്ദ്ര ബജറ്റില്‍ കേരളത്തിന് എയിംസ് പോലെ പലതും പ്രതീക്ഷിച്ചെങ്കിലും ഒന്നും നടന്നില്ല. ഇനി പ്രതീക്ഷയുള്ളത് റെയില്‍വേ ബജറ്റാണ്. തിങ്ങിനിറഞ്ഞുള്ള യാത്രാ ക്ലേശം അവസാനിപ്പിക്കാന്‍ സഹായിക്കണം എന്ന അഭ്യര്‍ത്ഥനയാണ് കേരളത്തിനുള്ളത്. കേരളത്തിലേക്ക് ആദ്യ വന്ദേഭാരത് തീവണ്ടി ഉടന്‍തന്നെ പ്രഖ്യാപിക്കുമെന്ന് റെയില്‍വേ മന്ത്രി അശ്വിനി വൈഷ്ണവ് അറിയിച്ചു.

സംസ്ഥാനത്തെ സുപ്രധാനപാതകള്‍ ഇരട്ടിപ്പിക്കുന്നതിനും തുക വകയിരുത്തിയതായി വെള്ളിയാഴ്ച പുറത്തുവിട്ട ബജറ്റ് വിശദാംശങ്ങളില്‍ വ്യക്തമാക്കി. കേരളത്തില്‍ വന്ദേ ഭാരത് എക്‌സ്പ്രസ് വൈകാതെ എത്തുമെന്ന് കേന്ദ്ര റെയില്‍വേ മന്ത്രി അശ്വിനി വൈഷ്ണവ് പറഞ്ഞു. ശബരി പാതയ്ക്ക് നൂറു കോടിയുള്‍പ്പടെ ഈ വര്‍ഷത്തെ ബജറ്റില്‍ കേരളത്തിന് 2033 കോടി രൂപ കേന്ദ്രം അനുവദിച്ചു. സില്‍വര്‍ ലൈനില്‍ ജനങ്ങളുടെ വികാരം കണക്കിലെടുക്കണമെന്നും, കേരളത്തിലെത്തി മുഖ്യമന്ത്രിയുമായി ഉടന്‍ ചര്‍ച്ച നടത്തുമെന്നും മന്ത്രി ദില്ലിയില്‍ വ്യക്തമാക്കി.

കേന്ദ്രസര്‍ക്കാറിന്റെ അഭിമാന പദ്ധതിയായ വന്ദേ ഭാരത് എക്‌സ്പ്രസ് ഒടുവില്‍ കേരളത്തിലേക്കും എത്തുകയാണ്. കര്‍ണാടകത്തിനും തമിഴ്‌നാടിനും നല്‍കിയ വന്ദേ ഭാരത് എക്‌സ്പ്രസ് വൈകാതെ കേരളത്തിലുമെത്തുമെന്നാണ് കേന്ദ്ര റെയില്‍വേ മന്ത്രി അശ്വിനി വൈഷ്ണവ് ഇന്ന് ദില്ലിയില്‍ വ്യക്തമാക്കിയത്.

കേരളത്തിന് 2033 കോടി രൂപ ഈ ബജറ്റില്‍ വകയിരുത്തിയിട്ടുണ്ടെന്നും, കഴിഞ്ഞ വര്‍ഷത്തെ അപേക്ഷിച്ച് ഇത് കൂടുതലാണെന്നും മന്ത്രി പറഞ്ഞു. സംസ്ഥാനം ഏറെക്കാലമായി കേന്ദ്രത്തോട് സഹായം ആവശ്യപ്പെടുന്ന പദ്ധതിയാണ് അങ്കമാലി ശബരി റെയില്‍പാത. 116 കിമീ വരുന്ന പാതയ്ക്കായി ഇത്തവണ 100 കോടി രൂപയാണ് ബജറ്റില്‍ വകയിരുത്തിയിട്ടുള്ളത്. തിരുവനന്തപുരം കന്യാകുമാരി പാതയിരട്ടിപ്പിക്കലിന് 808 കോടിയും, എറണാകുളം - കുമ്പളം പാത ഇരട്ടിപ്പിക്കലിന് 101 കോടിയും കഴിഞ്ഞ ദിവസം അവതരിപ്പിച്ച ബജറ്റില്‍ വകയിരുത്തിയിട്ടുണ്ട്.

സില്‍വര്‍ ലൈനിനെ കുറിച്ചുള്ള കേന്ദ്ര നിലപാട് മന്ത്രി ആവര്‍ത്തിച്ചു. കേരളം സമര്‍പ്പിച്ച സില്‍വര്‍ ലൈന്‍ പദ്ധതിയെ വളരെ സുതാര്യമായാണ് കേന്ദ്രം പരിഗണിച്ചത്, ജനങ്ങളുടെ വികാരം കണക്കിലെടുക്കാതെ പറ്റില്ല, പദ്ധതിക്കായി കണക്കാക്കിയ തുക വളരെ അധികമാണ്, ഇത് വളരെ ഗൗരവമുള്ളതാണ്, വൈകാതെ കേരളത്തിലെത്തി മുഖ്യമന്ത്രി പിണറായി വിജയനുമായി ചര്‍ച്ച നടത്തുമെന്നും മന്ത്രി വ്യക്തമാക്കി.

കേരളത്തിലേക്ക് പോകുന്ന റെയില്‍വേ മന്ത്രി സംസ്ഥാനത്ത് കൂടുതല്‍ വലിയ പ്രഖ്യാപനങ്ങളുണ്ടാകുമെന്ന സൂചനയും നല്‍കി. വന്ദേ മെട്രോയും, ഹൈഡ്രജന്‍ ട്രെയിനും ഈ വര്‍ഷം രാജ്യത്ത് അവതരിപ്പിക്കുമെന്നും മന്ത്രി പറഞ്ഞു. കെ-റെയില്‍ പദ്ധതിക്ക് അനുമതി നല്‍കുമോയെന്ന് വ്യക്തമാക്കാന്‍ മന്ത്രി തയ്യാറായില്ല. യഥാര്‍ഥചെലവിനെക്കാള്‍ വളരെ കുറഞ്ഞ തുകയാണ് സംസ്ഥാനസര്‍ക്കാര്‍ സമര്‍പ്പിച്ചതിലുള്ളതെന്നും ജനങ്ങളുടെ ആശങ്കയും പരിസ്ഥിതിവിഷയങ്ങളുമെല്ലാം കണക്കിലെടുക്കേണ്ടതുണ്ടെന്നും മന്ത്രി പറഞ്ഞു.

യു.പി.എ. സര്‍ക്കാരിന്റെ കാലത്ത് 2009മുതല്‍ 2013വരെ 372 കോടി രൂപ മാത്രമാണ് റെയില്‍വേ ബജറ്റുകളില്‍ കേരളത്തിന് വകയിരുത്തിയതെന്നും മന്ത്രി ചൂണ്ടിക്കാട്ടി. തിരുവനന്തപുരം-കന്യാകുമാരി പാതയിരട്ടിപ്പിക്കലിന് 808 കോടിയും എറണാകുളം-കുമ്പളം പാതയിരട്ടിപ്പിക്കലിന് 101.80 കോടിയും ബജറ്റില്‍ വകയിരുത്തി. കൊല്ലം-തിരുനെല്‍വേലി- തിരുച്ചെന്തൂര്‍, തെങ്കാശി-വിരുതുനഗര്‍ (357 കിലോമീറ്റര്‍.), ദിണ്ടിഗല്‍- പൊള്ളാച്ചി- പാലക്കാട്, പൊള്ളാച്ചി- കോയമ്പത്തൂര്‍ (224 കിലോമീറ്റര്‍) പാതകളുടെ ഗേജ് മാറ്റത്തിന് യഥാക്രമം 7.40 കോടിയും 55 കോടിയും അനുവദിച്ചു.

സംസ്ഥാനത്തെ 34 സ്റ്റേഷനുകള്‍ നവീകരിക്കും. സംസ്ഥാനത്തിന്റെ സംസ്‌കാരവും പാരമ്പര്യവുമായി ചേര്‍ന്നുപോകുന്ന മനോഹര രൂപകല്പനയാകും സ്റ്റേഷനുകളിലുണ്ടാവുക.