വിദ്യാഭ്യാസത്തിനും തൊഴിലിനുമായി വിദേശ രാജ്യങ്ങള്‍ തേടി പോകുന്നതില്‍ പണക്കാരോ പാവങ്ങളെന്നോ വ്യത്യാസമില്ല. വലിയ സമ്പത്തില്ലാത്തവരുടെ വീടുകളില്‍ നിന്നുമുള്ള കു്ട്ടികള്‍ പോലം സ്റ്റഡി ആന്റ് ജോബ് വിസയില്‍ വിദേശത്തെത്തി പഠിച്ച് അവിടെ തന്നെ സ്ഥിരതമാസമാക്കുന്ന രീതിയാണ് കണ്ടു വരുന്നത്. എന്നാല്‍ ഇവരെല്ലാം കേരളം വിട്ടോടി പോകുന്നതെന്തിനെന്ന് ഈ അവസാന വേളയിലാണ് നമ്മുടെ രാഷ്ട്രീയക്കാര്‍ ചിന്തിച്ചു തുടങ്ങിയത്. കാരണം കേരളത്തിലെ അമിത രാഷ്ട്രീയവും സമാധാനമില്ലാത്ത വിദ്യാഭ്യാസാന്തരീക്ഷവുമാണ് നിരവധി പേരെ വിദേശത്തേയ്ക്ക് ആകര്‍ഷിക്കുന്നതെന്ന സത്യം എത്രയോ കാലമായി ഇവിടെത്തെ രാഷ്ട്രീയ പാര്‍ട്ടികള്‍ മനസിലാക്കിയിരുന്നു.

എങ്കിലും ഒരു ചെറിയ പ്രശ്‌നം ഉണ്ടായാലും അത് വിദ്യാഭ്യാസത്തില്‍ കുഴപ്പിച്ച് നേട്ടം ഉണ്ടാക്കാനാണ് എല്ലാ രാഷ്ട്രീയ പാര്‍ട്ടികളും ശ്രമിച്ചു കൊണ്ടിരിക്കുന്നത്. ഈ അവസ്ഥയില്‍ ഇവിടെ ഉന്നത വിദ്യാഭ്യാസം കിട്ടാഞ്ഞിട്ടല്ല. പഠിക്കാനുള്ള അസൗകര്യവും അസ്വസ്ഥതയും കരുതിയാണ് പലരും നാടുവിടുന്നതെന്നും മനസിലാക്കാം. സിപിഎം നേതാക്കളുടെ മക്കളില്‍ പലരും വിദേശ പഠനം നടത്തിയവരാണ്. സിപിഎം നേതാക്കളുടെ കുടുംബാംഗങ്ങള്‍ പൊതുവിദ്യാലയത്തില്‍  സ്‌കൂള്‍ വിദ്യാഭ്യാസം നടത്താതെ സ്വാകാര്യ സ്‌കൂളുകളിലാണ് ചേക്കേറുന്നത്. നിലവിലെ മന്ത്രിമാരുടെ മക്കളാണെങ്കിലും സ്ഥിതി മറിച്ചല്ല. മുഖ്യമന്ത്രി പിണറായി വിജയന്റെ മകന്‍ പോലും വിദേശത്താണ് പഠിച്ചതും വിദേശത്താണ് ജോലി ചെയ്യുന്നതും.

എന്നാല്‍ സിപിഎം പോളിറ്റ്ബ്യുറോ അംഗ്ം വിജയരാഘന്‍ കഴിഞ്ഞ ദിവസങ്ങളില്‍ വിദേശ പഠനത്തിനെതിരെ ശക്തമായി രംഗത്ത് വന്നിരുന്നു. മക്കളെ ഒരു ബന്ധവുമില്ലാത്ത രാജ്യത്തേയ്ക്ക് പറഞ്ഞു വിട്ടിട്ട് രക്ഷിതാക്കള്‍ എങ്ങനെയാണ് വീടുകളില്‍ സ്വസ്ഥമായിരിക്കുന്നതെന്ന വിജയരാഘന്റെ ചോദ്യത്തെ സോഷ്യല്‍ മീഡിയ ട്രോളി കൊല്ലുകയായിരുന്നു. ഇവിടെ പഠിക്കാനും ജീവിക്കാനും രാഷ്ട്രീയക്കാര്‍ സമ്മതിക്കാത്തതു കൊണ്ട് ലോകത്തിന്റെ എതെങ്കിലും മൂലയില്‍ ഓടി ഒളിച്ച് ജീവിക്കാന്‍ അനുവദിക്കണമെന്ന അഭ്യര്‍ത്ഥനയാണ് വിജയരാഘവനോട് യുജനത നല്കിയിട്ടുള്ളത്. എന്നാല്‍ കേരളത്തില്‍ യുവജനങ്ങള്‍ കുറയുകയും വയോജനങ്ങള്‍ കൂടുകയും ചെയ്യുന്നുവെന്ന വിവരം ധനമന്ത്രിയുടെ ബജറ്റ് പ്രസംഗത്തിലൂടെ പുറത്തു വന്നതോടെ സിപിഎം ന്റെ പ്രവണതകള്‍ക്കെതിരെ കടുത്ത വിമര്‍ശനമാണുയരുന്നത്.

സംസ്ഥാനത്തു യുവാക്കളുടെ എണ്ണം കുറയുകയും 60 വയസ്സ് കഴിഞ്ഞവര്‍ വര്‍ധിക്കുകയുമാണെന്നു ബജറ്റ് പ്രസംഗത്തില്‍ മന്ത്രി കെ.എന്‍.ബാലഗോപാല്‍ പറഞ്ഞത്.. വിദ്യാഭ്യാസത്തിനും തൊഴിലിനും വിദേശത്തേക്കു പോകുന്ന ചെറുപ്പക്കാര്‍ അവിടെ സ്ഥിരതാമസമാക്കുന്നു. ഇതുമൂലം തൊഴിലെടുക്കാന്‍ ശേഷിയുള്ള യുവജനങ്ങള്‍ കുറയുന്നു. കേന്ദ്ര  സ്റ്റാറ്റിസ്റ്റിക്സ് ആന്റ് പ്രോഗ്രാം ഇംപ്ലിമെന്റിങ് മന്ത്രാലയം പുറത്തു വിട്ട 'ഇന്ത്യന്‍ യുവത 2022' റിപ്പോര്‍ട്ടിലെ വിവരങ്ങളാണ് മന്ത്രി അതേപടി ബജറ്റ് പ്രസംഗത്തില്‍ ഉള്‍പ്പെടുത്തിയത്.

2021ലെ കണക്ക് അനുസരിച്ച് ജനസംഖ്യയുടെ 16.5% പേര്‍ 60 വയസ്സ് പിന്നിട്ടവരാണ്. 2031 ആകുമ്പോള്‍ ഇത് 20% ആകും. ജനന നിരക്ക് കുറയുകയാണ്. എണ്‍പതുകളിലും തൊണ്ണൂറുകളിലും ശരാശരി 6.5 ലക്ഷവും 5.3 ലക്ഷവും കുട്ടികള്‍ ജനിച്ചിരുന്ന സ്ഥാനത്ത് 2021 ല്‍ 4.6 ലക്ഷം ആയി കുറഞ്ഞു. 2031 ആകുമ്പോള്‍ ജനന നിരക്ക് 3.6 ലക്ഷത്തിലേക്കു താഴും. ആശ്രിത ജനസംഖ്യ ഏറ്റവും കൂടുതലുള്ള സംസ്ഥാനമായി കേരളം മാറിയേക്കാം. ഇതെക്കുറിച്ച് ശാസ്ത്രീയമായി പഠിക്കുമെന്നും മന്ത്രി പറഞ്ഞതിനും സോഷ്യല്‍ മീഡിയ ട്രോളിയിട്ടുണ്ട്.
2021 ല്‍ കേരളത്തില്‍ നേരത്തെ 16.5 ശതമാനം വയോജനങ്ങളും 22.1 യുവജനങ്ങളുമായിരുന്നു. എന്നാല്‍ 2036 ആകുമ്പോഴേക്കും വയോജനങ്ങളുടെ എണ്ണം 22.8 ശതമാനം കൂടുകയും  യുവജനങ്ങളുടെ എണ്ണത്തെ ) മറികടക്കുകയും ചെയ്യും.. അതിനാല്‍ കൂടുതല്‍ ആരോഗ്യ സംരക്ഷണ പരിപാടികളും ക്ഷേമ പ്രവര്‍ത്തനങ്ങളും സംഘടിപ്പിക്കേണ്ടതുണ്ടെന്ന് കേന്ദ്രം പുറത്തു വിട്ട റിപ്പോര്‍ട്ട് ചൂണ്ടിക്കാട്ടിയിരുന്നു.

വിദ്യാഭ്യാസത്തിനും തൊഴിലിനും വിദേശത്തേക്കു പോകുന്ന ചെറുപ്പക്കാര്‍ അവിടെ സ്ഥിരതാമസമാക്കുന്നതുമൂലം തൊഴിലെടുക്കാന്‍ ശേഷിയുള്ള യുവജനങ്ങള്‍ കുറയുന്നതായും  ബജറ്റ് പ്രസംഗത്തില്‍ പറയുന്നു. ഒരു സ്‌കൂള്‍ വിദ്യാര്‍ഥിക്കു വേണ്ടി പ്രതിവര്‍ഷം സര്‍ക്കാര്‍ മുടക്കുന്നത് 50,000 രൂപയാണ്. ഉന്നത വിദ്യാഭ്യാസ രംഗത്ത് ഇതിന്റെ പലമടങ്ങ് ചെലവഴിക്കുന്നു. വലിയ നിക്ഷേപം നടത്തി സര്‍ക്കാര്‍ വളര്‍ത്തിയെടുക്കുന്ന യുവാക്കളെ പരമാവധി നാട്ടില്‍ നിലനിര്‍ത്താനും തൊഴില്‍ നല്‍കാനും കഴിയണം. അതിനു വേണ്ടതു ചെയ്യുമെന്ന് ബാലഗോപാല്‍ അറിയിച്ചു.

സിപിഎംന്റെ യുവജന സംഘടനകളും ഇത്തരം നിര്‍ദ്ദേശങ്ങള്‍ മുന്നോട്ട് വെച്ചിട്ടുണ്ട്. യുവാക്കള്‍ നാട് വിടാതിരിക്കാനുള്ള അന്തരീക്ഷം ഉണ്ടാക്കി കൊടുക്കേണ്ടത് രാഷ്ട്രീയ പ്രസ്ഥാനങ്ങളുടെ നിലനില്പിനും സമഗ്രപുരോഗതിയ്ക്കും ആവശ്യമാണെന്നാണ് അവരുടെ വിലയിരുത്തലും.