വാണി ജയറാമിന്റെ അപ്രതീക്ഷിത വിയോഗം വിശ്വസിക്കാനാകാതെയിരിക്കുകയാണ് സംഗീതലോകം. വാണിജയറാമിന്റെ ഭൗതികശരീരത്തില്‍ മുഖ്യമന്ത്രിക്കും കേരള സര്‍ക്കാരിനും വേണ്ടി നോര്‍ക്കയുടെ ചെന്നൈയിലെ പ്രത്യേക ഓഫീസര്‍ റീത്ത് സമര്‍പ്പിക്കും. മലയാളികളുടെ മനസ്സില്‍ മായാത്ത ഇടം നേടിയ ഗായികയാണ് വാണി ജയറാമെന്ന് മുഖ്യമന്ത്രി അനുശോചന സന്ദേശത്തില്‍ പറഞ്ഞു.

തലമുറകളെ കീഴടക്കിയ സംഗീത ജീവിതമായിരുന്നു വാണിജയറാമിന്റേതെന്ന് പ്രതിപക്ഷ നേതാവും പറഞ്ഞു. മലയാളിയുടെ ഹൃദയത്തില്‍ പതിഞ്ഞ ശബദമാണ് വാണി ജയറാമിന്റേതെന്ന് സ്്പീക്കര്‍ എ.എന്‍.ഷംസീര്‍ അനുശോചന സന്ദേശത്തില്‍ പറഞ്ഞു. സംഗീതലോകത്ത് തന്റേതായ ഇടം കണ്ടെത്തിയ കലാകാരിയായിരുന്നു വാണി ജയറാമെന്ന് സാംസ്‌ക്കാരിക മന്ത്രി സജി ചെറിയാനും അനുസ്മരിച്ചു.

അതേസമയം വാണി ജയറാമിന്റെ വിയോഗം തനിക്ക് വിശ്വസിക്കാനാകുന്നില്ലെന്നാണ് മലയാളത്തിന്റെ വാനമ്ബാടി കെ.എസ്. ചിത്ര പ്രതികരിച്ചത്. വാണിയമ്മയുമായി കഴിഞ്ഞ ബുധനാഴ്ച സംസാരിച്ചിരുന്നുവെന്നും അത് അവസാനത്തെ സംസാരമാണെന്ന് കരുതിയില്ലെന്നും ചിത്ര പറഞ്ഞു. പത്മഭൂഷണ്‍ ലഭിച്ച വാണിയമ്മയെ ആദരിക്കുന്ന ചടങ്ങില്‍ കഴിഞ്ഞ മാസം 28ന് പങ്കെടുത്തിരുന്നു. അന്ന് അമ്മയുടെ അനുഗ്രഹം വാങ്ങി . ഒരു ഉമ്മയും സമ്മാനിച്ചാണ് അമ്മ മടങ്ങിയത്. വാണിയമ്മയുടെ വിയോഗം സംഗീതലോകത്തിന് മാത്രമല്ല, തനിക്ക് വ്യക്തിപരമായ നഷ്ടം കൂടിയാണ്ചിത്ര പറഞ്ഞു.

ഏറ്റവും കൂടുതല്‍ ഫീമെയില്‍ ഡ്യൂയറ്റ് പാടിയിട്ടുള്ളത് വാണിയമ്മയോടൊപ്പമാണെന്നും ചിത്ര അനുസ്മരിച്ചു. തന്റെ തുടക്കകാലത്ത് ഒരുപാട് പാട്ടുകള്‍ വാണിയമ്മയ്‌ക്കൊപ്പം പാടാന്‍ കഴിഞ്ഞെന്നും അവര്‍ കൂട്ടിച്ചേര്‍ത്തു. സംഗീതത്തോട് അങ്ങേയറ്റത്തെ ബഹുമാനമാണ് വാണിയമ്മയ്‌ക്കെന്നും സ്‌റ്റേജിലാണെങ്കിലും സ്റ്റുഡിയോയിലാണെങ്കിലും ചെരുപ്പ് അഴിച്ചതിന് ശേഷം മാത്രമാണ് പ്രവേശിച്ചിരുന്നുള്ളൂവെന്നും കെ.എസ്.ചിത്ര വ്യക്തമാക്കി.

പാടുന്ന ഭാഷ എല്ലാം പഠിച്ച് അര്‍ത്ഥം അറിഞ്ഞാണ് പാടിയിരുന്നതെന്നും അവര്‍ സൂചിപ്പിച്ചു.വാണി ജയറാമിനെ ആദരിക്കുന്ന ചടങ്ങില്‍ എത്തിയപ്പോള്‍ നടക്കാന്‍ ബുദ്ധിമുട്ട് ഉണ്ടായിരുന്നതായി ചിത്രയോട് പറഞ്ഞിരുന്നു. രണ്ട് പേര്‍ കൈ പിടിച്ചാണ് സ്‌റ്റേജില്‍ കയറ്റിയതെന്നും എന്നാല്‍ ഇത്ര പെട്ടെന്ന് വിയോഗം പ്രതീക്ഷിച്ചില്ലെന്നും ചിത്ര പറഞ്ഞു.