കണ്ണീര്‍കാഴ്ചയായി..... പാറക്കുളത്തില്‍ തുണി അലക്കാന്‍ പോയ വീട്ടമ്മയും കൊച്ചുമക്കളും മുങ്ങി മരിച്ചു.... ദുരന്തം ഇടുക്കി കൊമ്പൊടിഞ്ഞാലില്‍.... മൂവരുടെയും വേര്‍പാട് ഉറ്റവരെയും ബന്ധുക്കളെയും നാട്ടുകാരെയും കണ്ണീരിലാഴ്ത്തി

അടിമാലി പണിക്കന്‍കുടി കൊമ്പൊടിഞ്ഞാലില്‍ ചിറയപ്പമ്പില്‍ വിനോയി- ജാസ്മിന്‍ ദമ്പതികളുടെ മക്കളായ അന്ന സാറാ (11), അമയ എല്‍സാ (ഏഴ്), ജാസ്മിന്റെ അമ്മ ഇണ്ടിക്കുഴിയില്‍ പരേതനായ ജോസിന്റെ ഭാര്യ എല്‍സമ്മ (55) എന്നിവരാണ് മരിച്ചത്. ഇന്നലെ വൈകുന്നേരം അഞ്ച് മണിയോടെയായിരുന്നു സംഭവം നടന്നത്.

എല്‍സമ്മയും പേരക്കുട്ടികളും അയല്‍വാസിയായ കുമ്പളവയലില്‍ അമ്മിണിയും സമീപത്തുള്ള പാറക്കുളത്തില്‍ തുണി അലക്കാനായി പോയതായിരുന്നു. തുണി അലക്കുകയായിരുന്ന എല്‍സമ്മയ്ക്ക് കുളത്തില്‍ നിന്ന് ബക്കറ്റില്‍ വെള്ളം കോരിക്കൊടുക്കുന്നതിനിടെ അന്ന സാറ കാല്‍വഴുതി കുളത്തിലേക്ക് വീണു.

പെട്ടെന്ന് തന്നെ കുട്ടിയെ രക്ഷിക്കാനായി എല്‍സമ്മയും കുളത്തിലേക്ക് ചാടി. ഇവര്‍ രണ്ടു പേരും മുങ്ങിത്താഴുന്നത് കണ്ട് അയല്‍വാസിയായ അമ്മിണി നാട്ടുകാരെ വിവരമറിയിക്കാനായി ഓടി. അമയയും പിറകേ വന്നെന്നാണ് അമ്മിണി പറയുന്നത്.

എന്നാല്‍ അമ്മിണിയറിയാതെ അമയ തിരിച്ചു കുളത്തിലേക്കു പോയിരുന്നു. കുളത്തിന്റെ കരയിലെത്തിയ അമയ മുത്തശ്ശിയെയും ചേച്ചിയെയും തെരഞ്ഞ് വെള്ളത്തിലേക്ക് ചാടിയെന്നാണ് നിഗമനത്തില്‍..

അമ്മിണി വിവരമറിയിച്ചതിനെ തുടര്‍ന്ന് ഓടിയെത്തിയ നാട്ടുകാര്‍ കുളത്തില്‍ നിന്ന് മൂന്നു പേരെയും മുങ്ങിയെടുത്ത് കരയ്‌ക്കെത്തിച്ചെങ്കിലും ജീവന്‍ നഷ്ടപ്പെട്ടിരുന്നു.


പണിക്കന്‍കുടി ഗവ. ഹയര്‍സെക്കന്‍ഡറി സ്‌കൂളിലെ 5, 2 ക്ലാസുകളിലെ വിദ്യാര്‍ത്ഥിനികളാണ് മരിച്ച അന്ന സാറയും അമയ എല്‍സയും. മൃതദേഹങ്ങള്‍ അടിമാലി താലൂക്ക് ആശുപത്രി മോര്‍ച്ചറിയില്‍.