ബ്രഹ്മപുരത്തെ തീപിടിത്തം.... പ്രായമായവരും കുട്ടികളും രോഗികളും ഗര്ഭിണികളും പ്രത്യേകം ശ്രദ്ധിക്കണം.... പുക പടര്ന്ന പശ്ചാത്തലത്തില് കൊച്ചിയില് മാസ്ക് നിര്ബന്ധമായി ധരിക്കണമെന്ന് ആരോഗ്യമന്ത്രി
ബ്രഹ്മപുരത്തെ തീപിടിത്തത്തെ തുടര്ന്ന് പുക പടര്ന്ന പശ്ചാത്തലത്തില് കൊച്ചിയില് മാസ്ക് നിര്ബന്ധമായി ധരിക്കണമെന്ന് ആരോഗ്യമന്ത്രി വീണാ ജോര്ജ്. പുക പടര്ന്നതിനെ തുടര്ന്ന് ജില്ലയിലെ ആരോഗ്യസ്ഥിതി വിലയിരുത്താന് ചേര്ന്ന അവലോകന യോഗം ശേഷം മാധ്യമങ്ങളെ കാണുകയായിരുന്നു.
മുന്കരുതലിന്റെ ഭാഗമായി കൊച്ചിയിലുള്ളവര് പുറത്തിറങ്ങുമ്പോള് മാസ്ക് നിര്ബന്ധമായി ധരിക്കണം. പ്രായമായവരും കുട്ടികളും രോഗികളും ഗര്ഭിണികളും പ്രത്യേകം ശ്രദ്ധിക്കണം. പരീക്ഷയെഴുതാന് പോകുന്ന കുട്ടികള് അടക്കം മാസ്ക് ധരിക്കണമെന്നും ആരോഗ്യമന്ത്രി പറഞ്ഞു.
ഇതുവരെ പുകയെ തുടര്ന്നുള്ള ആരോഗ്യപ്രശ്നങ്ങളുമായി 899 പേരാണ് ചികിത്സ തേടിയത്. തലവേദന, കണ്ണുനീറ്റല്, തൊണ്ടവേദന എന്നിവയാണ് പ്രധാന ലക്ഷണങ്ങള്. ഏത് സാഹചര്യവും നേരിടാന് ആരോഗ്യവകുപ്പ് സജ്ജമാണ്. ആശങ്ക ജനിപ്പിക്കുന്ന വാര്ത്തകള് കണ്ട് ഭയപ്പെടരുതെന്നും ആരോഗ്യമന്ത്രി അറിയിച്ചു.
അതേസമയം എറണാകുളം ബ്രഹ്മപുരത്തെ തീപിടിത്തത്തിന്റെ പശ്ചാത്തലത്തില് ആരോഗ്യ വകുപ്പ് തീരുമാനിച്ച ആരോഗ്യ സര്വേ ചൊവ്വാഴ്ച മുതല് ആരംഭിക്കുമെന്ന് ആരോഗ്യ വകുപ്പ് മന്ത്രി വീണാ ജോര്ജ് പറഞ്ഞു. ആരോഗ്യ പ്രവര്ത്തകര് വീടുകളിലെത്തി സര്വേ നടത്തും. പുക ശ്വസിച്ചതുമായി ബന്ധപ്പെട്ട് ഏതെങ്കിലും തരത്തിലുള്ള അസ്വസ്ഥതകള് ഉള്ളവരുണ്ടെങ്കില് അവരെ കണ്ടെത്തി വിദഗ്ധ ചികിത്സ ഉറപ്പാക്കും. ജനങ്ങളുടെ ആശങ്കയകറ്റാന് മെഡിക്കല് ക്യാമ്പുകള് സംഘടിപ്പിക്കും. മൊബൈല് യൂണിറ്റുകളുടെ സേവനവും ലഭ്യമാക്കുമെന്നും മന്ത്രി വ്യക്തമാക്കി. കൊച്ചിയില് ആരോഗ്യ വകുപ്പിന്റെ സമഗ്ര അവലോകന യോഗത്തിന് ശേഷം സംസാരിക്കുകയായിരുന്നു മന്ത്രി.
കളമശേരി മെഡിക്കല് കോളേജിലെ സ്പെഷ്യലിസ്റ്റ് ഡോക്ടര്മാരുടെ സേവനം കാക്കനാട് ഹെല്ത്ത് സെന്ററില് ലഭ്യമാക്കും. മെഡിസിന്, പള്മണോളജി, ഒഫ്ത്താല്മോളജി, പീഡിയാട്രിക്, സൈക്യാട്രി, ഡെര്മറ്റോളജി എന്നീ വിഭാഗം ഡോക്ടര്മാരുടെ സേവനം ലഭ്യമാക്കും.
എല്ലാ അര്ബന് ഹെല്ത്ത് സെന്ററുകളിലും ശ്വാസ് ക്ലിനിക്കുകള് ആരംഭിക്കും. ഇവിടെ പള്മണറി ഫങ്ഷന് ടെസ്റ്റ് നടത്താനാകും. മൊബൈല് ലാബുകളില് നെബുലൈസേഷനും പള്മണറി ഫങ്ഷന് ടെസ്റ്റിനുമുള്ള സൗകര്യങ്ങളുണ്ടാകും. എന്തെങ്കിലും ബുദ്ധിമുട്ടുകള് ഉണ്ടെങ്കില് കണ്ടെത്തി ചികിത്സിയ്ക്കുന്നതിനും ആശങ്കയകറ്റുന്നതിനുമാണ് നടപടി. ആരോഗ്യ വകുപ്പിലേയും മെഡിക്കല് വിദ്യാഭ്യാസ വകുപ്പിലേയും ഡോക്ടര്മാരുടെ നേതൃത്വത്തിലായിരിക്കും ഈ പ്രവര്ത്തനങ്ങളെല്ലാം നടക്കുക.
"
https://www.facebook.com/Malayalivartha
