ഒന്‍പതു വര്‍ഷം മുമ്പ് വൃദ്ധ ദമ്പതികളെ കൊലപ്പെടുത്തിയ തമിഴ്‌നാട് സ്വദേശികളായ അച്ഛനും മകനും ജീവപര്യന്തം കഠിനതടവ്. തമിഴ്‌നാട് കമ്പം വടക്കുപെട്ടി സ്വദേശികളായ ജയരാജ് മകന്‍ കറുപ്പ് സ്വാമി എന്നിവരെയാണ് മുട്ടം മൂന്നാം അഡീഷണല്‍ സെഷന്‍സ് കോടതി ശിക്ഷിച്ചത്. ഇടുക്കി പൊട്ടന്‍കാട് സ്വദേശികളാണ് കൊല്ലപ്പെട്ടത്. 2014 ലാണ് കേസിന് ആസ്പദമായ സംഭവമുണ്ടായത്.


വൃദ്ധ ദമ്പതികളായ പൊട്ടന്‍കാട് സ്വദേശി അപ്പുക്കുട്ടനെയും ഭാര്യ ശാന്തമ്മയേയുമാണ് ജയരാജും മകന്‍ കറുപ്പ് സ്വാമിയും ചേര്‍ന്ന് കൊലപ്പെടുത്തിയത്. തമിഴ്‌നാട്ടിലെ കമ്പം വടക്കുപെട്ട് സ്വദേശികളും നിരവധി കേസുകളില്‍ പ്രതികളുമായ ജയരാജും കുടുംബവും 2003 ലാണ് പൊട്ടന്‍കാട് എത്തുന്നത്.

കൊല്ലപ്പെട്ട അപ്പുക്കുട്ടന്റെ വസ്തുവിലായിരുന്നു ഇവര്‍ താമസിച്ചിരുന്നത്. ഇരുകൂട്ടരും തമ്മിലുണ്ടായ അതിര്‍ത്തി തര്‍ക്കവും വാക്കേറ്റവുമാണ് കൊലപാതകത്തിലേക്ക് നയിച്ചത്.

കോളിളക്കം സൃഷ്ടിച്ച കേസിലെ പ്രതികള്‍ക്ക് ഒന്‍പത് വര്‍ഷത്തിനു ശേഷമാണ് ശിക്ഷ വിധിച്ചത്. . കേസില്‍ ഒന്നാം പ്രതി ജയരാജനും, രണ്ടാം പ്രതി കറുപ്പ് സ്വാമിക്കും മൂന്ന് ജീവപര്യന്തവും, ഇരുപതിനായിരം രൂപ വീതം പിഴയുമാണ് ശിക്ഷ.

മൂന്നാം പ്രതിയും, ജയരാജിന്റെ ഭാര്യയുമായ സരസ്വതിയെ കോടതി വെറുതെ വിട്ടു. കേസില്‍ 48 സാക്ഷികളാണ് ഉണ്ടായിരുന്നത്. സാഹചര്യ തെളിവിനൊപ്പം ശാസ്ത്രിയ തെളിവുകളും പ്രതികള്‍ക്ക് ശിക്ഷ ലഭിക്കാന്‍ കാരണമായി.

വൃദ്ധ ദമ്പതികളുടെ മകന്‍ ബൈജുവിനെയാണ് പ്രതികള്‍ ആദ്യം കൊലപ്പെടുത്താനായി ശ്രമിച്ചത്. വീടിന് സമീപത്തെ ഇടവഴിയില്‍ വെച്ച് പ്രതികള്‍ ബൈജുവിനെ വെട്ടിവിഴ്ത്തി. ഇത് കണ്ടുവന്ന വൃദ്ധ ദമ്പതികളെ മൂവര്‍ സംഘം ആക്രമിച്ചു. ഭയന്ന് വീടിനുള്ളില്‍ കയറിയ അയ്യപ്പനെയും ശാന്തമ്മയെയും പ്രതികള്‍ പിന്നാലെ എത്തി വെട്ടി. ശരീരഭാഗങ്ങള്‍ അറ്റുപോയ ഇരുവരും സംഭവസ്ഥലത്ത് വെച്ച് തന്നെ മരിച്ചു. സരസ്വതിയെ വെറുതെവിട്ട വിധിക്കെതിരെ ബന്ധുക്കള്‍ അപ്പീല്‍ നല്‍കിയേക്കും.