അടുത്തിടെ ഫേണ്‍ പൊട്ടിത്തെറിച്ചുള്ള പെണ്‍കുട്ടിയുടെ മരണം ഏറെ ദുഖിപ്പിച്ചിരുന്നു. രണ്ടാഴ്ച മുന്‍പ് തൃശൂര്‍ തിരുവില്വാമല പട്ടിപ്പറമ്പ് കുന്നത്ത് അശോകിന്റെ മകള്‍ ആദിത്യശ്രീ (8) മൊബൈല്‍ഫോണ്‍ പൊട്ടിത്തെറിച്ചു മരിച്ചിരുന്നു. ഇപ്പോഴിതാ കോഴിക്കോട് നിന്നും സമാനമായ വാര്‍ത്ത. മൊബൈല്‍ ഫോണ്‍ പൊട്ടിത്തെറിച്ച് വീണ്ടും അപകടം; യുവാവിനു പരുക്ക്. റെയില്‍വേയിലെ കരാര്‍ ജീവനക്കാരനായ പയ്യാനക്കല്‍ ഫാരിസ് റഹ്‌മാനാണ് (23) ജീന്‍സിന്റെ പോക്കറ്റില്‍ സൂക്ഷിച്ചിരുന്ന ഫോണ്‍ പൊട്ടിത്തെറിച്ചു പൊള്ളലേറ്റത്.

ഇന്നലെ രാവിലെ ഏഴോടെയാണ് സംഭവം. ഫോണിന്റെ ബാറ്ററിക്കു തീപിടിച്ചതാണ് അപകടകാരണമെന്നു കരുതുന്നു. തകരാറിലായതിനാല്‍ ഫോണിന്റെ ഡിസ്‌പ്ലേ രണ്ടാഴ്ച മുന്‍പു മാറ്റിയിരുന്നു. എന്നാല്‍, ഫോണിന്റെ പ്രവര്‍ത്തനത്തില്‍ തകരാറുണ്ടായിരുന്നില്ല. പതിവുപോലെ തലേന്നു രാത്രി ഫോണ്‍ ചാര്‍ജ് ചെയ്തിരുന്നു.

ഓഫിസില്‍ ജോലിക്കിടെ മുഖം കഴുകുമ്പോഴാണ് ജീന്‍സിന്റെ പോക്കറ്റില്‍നിന്നു പുക ഉയരുന്നതു ഫാരിസ് ശ്രദ്ധിച്ചത്. അടുത്ത നിമിഷം തീപിടിക്കുകയും ചെയ്തു. പെട്ടെന്ന് പോക്കറ്റില്‍നിന്നു ഫോണ്‍ പുറത്തെടുക്കുകയായിരുന്നു. കൈക്കും കാലിനും പൊള്ളലേറ്റിട്ടുണ്ട്. ഉടന്‍ തന്നെ യുവാവിനെ ബീച്ച് ആശുപത്രിയില്‍ പ്രവേശിപ്പിച്ചു. പോക്കറ്റിന്റെ ഭാഗം പൂര്‍ണമായും കത്തിക്കരിഞ്ഞു. പ്രാഥമിക ചികിത്സയ്ക്ക് ശേഷം ഫാരിസ് ആശുപത്രി വിട്ടു.

ഈ സാഹചര്യത്തില്‍ ഫോണ്‍ ഉപയോഗിക്കുമ്പോള്‍ ശ്രദ്ധിക്കേണ്ടതുണ്ട്. നിലവാരമുള്ള ഫോണുകള്‍ മാത്രം ഉപയോഗിക്കുക. ബാറ്ററികള്‍ മാറുമ്പോഴും നല്ല ബ്രാന്‍ഡാണെന്ന് ഉറപ്പാക്കുക. ചാര്‍ജര്‍ വാങ്ങുമ്പോഴും സുരക്ഷയ്ക്കു മുന്‍ഗണന നല്‍കണം. ചാര്‍ജ് ചെയ്തുകൊണ്ട് ഫോണ്‍ ഉപയോഗിക്കരുത്. ഫോണ്‍ ചൂടായിക്കഴിഞ്ഞാല്‍ ഉപയോഗിക്കരുത്. കുറച്ചു നേരത്തെ ഉപയോഗം കൊണ്ട് പെട്ടെന്നു ചൂടാകുന്നുണ്ടെങ്കില്‍ ഫോണ്‍ സുരക്ഷിതമല്ല. തുടര്‍ച്ചയായി ദീര്‍ഘനേരം ഫോണ്‍ ഉപയോഗിക്കുന്നത് ഒഴിവാക്കുക. ഫോണ്‍ ചൂടായിട്ടില്ലെങ്കിലും ബാറ്ററി ചൂടാകാന്‍ സാധ്യതയുണ്ട്. അന്തരീക്ഷത്തിലെ കൂടിയ താപനിലയും ഫോണ്‍ ചൂടാകാന്‍ കാരണമാണ്.

സ്മാര്‍ട് ഫോണ്‍ ഉപയോഗം ഇപ്പോള്‍ മുതിര്‍ന്നവരില്‍ നിന്ന് കുട്ടികളിലേക്കും അതിവേഗം വ്യാപിച്ചുകഴിഞ്ഞിട്ടുണ്ട്. അതും സ്‌കൂള്‍ വിദ്യാര്‍ത്ഥികള്‍ മാത്രമല്ല, പഠനത്തിലേക്ക് പോലും കടന്നിട്ടില്ലാത്ത അത്രയും ചെറിയ കുഞ്ഞുങ്ങളും ഫോണ്ഡ വ്യാപകമായി ഉപയോഗിക്കുന്നുണ്ട്.

പലപ്പോഴും കുട്ടികള്‍ വാശി പിടിച്ച് കരയുമ്പോഴോ, ഭക്ഷണം കഴിക്കാതിരിക്കുമ്പോഴോ, മുതിര്‍ന്നവരെ ശല്യപ്പെടുത്തുമ്പോഴോ എല്ലാം ഒരു പോംവഴിയായി ഇവരുടെ ശ്രദ്ധ ഫോണിലേക്ക് തിരിക്കാന്‍ ശ്രമിക്കുന്ന മാതാപിതാക്കളെ നാം എത്രയോ കാണാറുണ്ട്.

എന്നാലിത്തരത്തില്‍ കുട്ടികളെ അധികം ഫോണില്‍ കളിപ്പിക്കുന്നത് അത്ര നല്ലതല്ല. ഇതിന് പല വിധത്തിലുള്ള ദോഷവശങ്ങളുണ്ടെങ്കിലും അവരുടെ കണ്ണിന്റെ ആരോഗ്യത്തെ പ്രതികൂലമായി ബാധിക്കുന്നു എന്നതാണ് ഏറ്റവും പ്രധാനം.

മുതിര്‍ന്നവരുടേതില്‍ നിന്ന് വ്യത്യസ്തമായി വളരെ 'സെന്‍സിറ്റീവ്' ആയ കണ്ണുകളായിരിക്കും കുട്ടികളുടേത്. അവരുടെ കണ്ണുകള്‍ മുഴുവനായി വികസിക്കുകയോ, പാകപ്പെടുകയോ ചെയ്തിട്ടുണ്ടാകില്ല. അതുകൊണ്ട് തന്നെ അവരുടെ കണ്ണുകള്‍ എളുപ്പത്തില്‍ ബാധിക്കപ്പെടാം.

കാഴ്ചാപ്രശ്‌നം, കണ്ണ് വേദന, ഡ്രൈ ഐസ്, കണ്ണില്‍ അസ്വസ്ഥത എന്നിങ്ങനെ പല പ്രശ്‌നങ്ങളും കുട്ടികളുടെ കണ്ണുകളെ ഈ രീതിയില്‍ ബാധിക്കാം. അതിനാല്‍ തന്നെ കുട്ടികള്‍ക്ക് പരമാവധി ഫോണ്‍ നല്‍കി അവരെ സന്തോഷപ്പെടുത്താന്‍ മാതാപിതാക്കള്‍ ശ്രമിക്കാതിരിക്കുക. ഇത് ചെറുതിലേ തൊട്ട് ശീലിപ്പിച്ചില്ലെങ്കില്‍ പിന്നീട് ശീലിപ്പിക്കാനും പ്രയാസമായിരിക്കും. കുട്ടികളുടെ കണ്ണിനേല്‍ക്കുന്ന പ്രശ്‌നങ്ങള്‍ അവരുടെ പഠനം, സാമൂഹികമായ പെരുമാറ്റം, വ്യക്തിത്വം എന്നിവയെ എല്ലാം ദോഷകരമായി ബാധിക്കുന്നതായി വിവിധ പഠനങ്ങളും ചൂണ്ടിക്കാട്ടിയിട്ടുണ്ട്.

കുട്ടികളെ കഴിയുന്നതും വീടിന് പുറത്തിറക്കി നടക്കാനും മറ്റ് കാര്യങ്ങള്‍ ചെയ്യാനും പരിശീലിപ്പിക്കുക. ഇതോടൊപ്പം തന്നെ കുട്ടികളില്‍ കൃത്യമായ ഇടവേളകളില്‍ കണ്ണ് പരിശോധന നടത്തുന്നതും ഏറെ നല്ലതാണ്.