കൊട്ടാരക്കര താലൂക്ക് ആശുപത്രിയില്‍ യുവാവിന്റെ അതിക്രമം...ഡോക്ടറുള്‍പ്പെടെ അഞ്ചു പേരെ കുത്തി പരിക്കേല്‍പ്പിച്ചു, കുത്തേറ്റ വനിതാ ഡോക്ടര്‍ക്ക് ദാരുണാന്ത്യം , ആശുപത്രിയിലെ കത്രികയെടുത്താണ് ആക്രമണം നടത്തിയത് 

പൂയപ്പള്ളി സ്വദേശി സന്ദീപാണ് ആക്രമണം നടത്തിയത്. പുലര്‍ച്ചെ നാലു മണിയോടെയാണ് സംഭവമുണ്ടായത്.

വീട്ടില്‍ വെച്ച് സന്ദീപ് ആക്രമണങ്ങള്‍ നടത്തിയതിനെ തുടര്‍ന്ന് ബന്ധുക്കളാണ് പൊലീസിനെ വിവരമറിയിച്ചത്. തുടര്‍ന്ന് പൊലീസ് കസ്റ്റഡിയിലെടുത്ത പ്രതിയെ വൈദ്യ പരിശോധനക്ക് എത്തിച്ചപ്പോഴായിരുന്നു അക്രമമുണ്ടായത്. ബന്ധുക്കള്‍ ആശുപത്രിയില്‍ എത്തിയപ്പോഴാണ് പ്രകോപനമൊന്നുമില്ലാതെ യുവാവ് ആക്രമണം നടത്തിയതെന്നാണ് വിവരം.

ആശുപത്രിയിലെ കത്രിക കൈക്കലാക്കിയ പ്രതി ആശുപത്രിയില്‍ ഉണ്ടായിരുന്നവരെ കുത്തുകയായിരുന്നു. പുറകിലും നെഞ്ചിലും കുത്തേറ്റ് സാരമായി പരിക്കേറ്റ വനിതാ ഡോക്ടര്‍ വന്ദനയുടെ നില ഗുരുതരമായിരുന്നു. ഇവരെ തിരുവനന്തപുരം കിംസ് ആശുപത്രിയില്‍ പ്രവേശിപ്പിച്ചെങ്കിലും മരണത്തിന് കീഴടങ്ങുകയായിരുന്നു. മരിച്ചത് കോട്ടയം സ്വദേശിനി ഡോ. വന്ദന ദാസ് ആണ്. ജോലി ചെയ്തുകൊണ്ടിരിക്കെയാണ് വനിതാ ഡോക്ടറെ കുത്തിയത്.