സ്കൂള് വാഹനങ്ങളുടെ സുരക്ഷ ഉറപ്പുവരുത്തുന്നതിന് കര്ശന നിര്ദേശങ്ങളുമായി മോട്ടോര് വാഹനവകുപ്പ് രംഗത്ത്
സ്കൂള് വാഹനങ്ങളുടെ സുരക്ഷ ഉറപ്പുവരുത്തുന്നതിന് കര്ശന നിര്ദേശങ്ങളുമായി മോട്ടോര് വാഹനവകുപ്പ് രംഗത്ത്
സ്കൂള് വാഹനങ്ങളുടെ സുരക്ഷ ഉറപ്പുവരുത്തുന്നതിന് കര്ശന നിര്ദേശങ്ങളുമായി മോട്ടോര് വാഹനവകുപ്പ്. പരമാവധി 50 കിലോമീറ്ററില് വേഗം നിജപ്പെടുത്തിയ സ്പീഡ് ഗവേണറുകള് സ്കൂള് വാഹനങ്ങളില് നിര്ബന്ധമാക്കി.
സ്കൂള് മേഖലയില് പരമാവധി മണിക്കൂറില് 30 കിലോമീറ്ററും മറ്റ് റോഡുകളില് പരമാവധി 50 കിലോമീറ്ററുമായി വേഗം നിജപ്പെടുത്തി. വാഹനത്തിന്റെ ഡ്രൈവര് മദ്യപിച്ച് വാഹനമോടിച്ചതിനോ അമിതവേഗത്തിനോ അപകടകരമായി വാഹനമോടിക്കുന്നതിനോ മറ്റ് കുറ്റകൃത്യങ്ങള്ക്കോ ശിക്ഷിക്കപ്പെട്ടവരാകാന് പാടില്ല. വാഹനങ്ങളില് ജി.പി.എസ് സംവിധാനവും ഒപ്പം ഇവ സുരക്ഷ മിത്ര സോഫ്റ്റ്വെയറുമായി ബന്ധിപ്പിച്ചിട്ടുണ്ടെന്നതും ഉറപ്പാക്കേണ്ടതാണ്.
സ്കൂള് മാനേജ്മെന്റിനും രക്ഷാകര്ത്താക്കള്ക്കും സ്കൂള് വാഹനങ്ങളെ തത്സമയം നിരീക്ഷിക്കുന്നതിനായി 'വിദ്യാ വാഹന്' എന്ന മൊബൈല് ആപ് മോട്ടോര് വാഹന വകുപ്പ് തയ്യാറാക്കിയിട്ടുണ്ട്.
സ്കൂള് തുറക്കുന്നതിനു മുമ്പ് തന്നെ വാഹനത്തിന്റെ അറ്റകുറ്റപ്പണി പൂര്ത്തിയാക്കി ഫിറ്റ്നസ് പരിശോധനക്ക് ഹാജരാക്കേണ്ടതാണ്. വാതിലുകളുടെ എണ്ണത്തിന് തുല്യമായ ഡോര് അറ്റന്ഡര്മാര് (ആയമാര്) എല്ലാ സ്കൂള് ബസിലും വേണം.
സീറ്റിങ് കപ്പാസിറ്റിക്ക് അനുസരിച്ച് മാത്രമേ കുട്ടികളെ യാത്ര ചെയ്യാന് അനുവദിക്കാവൂ. 12 വയസ്സിന് താഴെ പ്രായമുള്ള കുട്ടികളാണെങ്കില് ഒരു സീറ്റില് രണ്ടുപേര്ക്ക് യാത്ര ചെയ്യാന് അനുവദിക്കാവുന്നതാണ്. ഓരോ ട്രിപ്പിലും യാത്ര ചെയ്യുന്ന കുട്ടികളുടെ പേര്, ക്ലാസ്, അഡ്രസ്സ് ബോര്ഡിങ് പോയന്റ് , രക്ഷാകര്ത്താവിന്റെ പേര്, വിലാസം, ഫോണ് നമ്പര് എന്നിവ രേഖപ്പെടുത്തിയ ലിസ്റ്റ് ലാമിനേറ്റ് ചെയ്ത് വാഹനത്തില് പ്രദര്ശിപ്പിക്കണം. ഓരോ വിദ്യാഭ്യാസ സ്ഥാപനത്തിലും എല്ലാ കുട്ടികളുടെയും യാത്രാ മാര്ഗങ്ങള് സംബന്ധിച്ചുള്ള കാര്യങ്ങള് രേഖപ്പെടുത്തിയ രജിസ്റ്റര് സൂക്ഷിക്കണം. ഇവ മോട്ടോര് വാഹന വകുപ്പ്-പൊലീസ് ഉദ്യോഗസ്ഥര് എന്നിവരുടെ പരിശോധനാ സമയത്ത് ഹാജരാക്കണം.
https://www.facebook.com/Malayalivartha
