സ്കൂള് പ്രവേശനോത്സവം സംസ്ഥാനത്ത് ജൂണ് ഒന്നിന് രാവിലെ 10 മണിക്ക് എല്ലാ സ്കൂളുകളിലും നടക്കുമെന്ന് വിദ്യാഭ്യാസമന്ത്രി വി ശിവന്കുട്ടി... സംസ്ഥാനതല ഉദ്ഘാടനം തിരുവനന്തപുരം മലയിന്കീഴ് ഗവണ്മെന്റ് വിഎച്ച്എസ്എസില് മുഖ്യമന്ത്രി പിണറായി വിജയന് നിര്വഹിക്കും
ഇത്തവണത്തെ സ്കൂള് പ്രവേശനോത്സവം സംസ്ഥാനത്ത് ജൂണ് ഒന്നിന് രാവിലെ 10 മണിക്ക് എല്ലാ സ്കൂളുകളിലും നടക്കുമെന്ന് വിദ്യാഭ്യാസമന്ത്രി വി ശിവന്കുട്ടി.
സ്കൂള്തലം, ജില്ലാതലം, സംസ്ഥാനതലം എന്നിങ്ങനെ മൂന്നു തലങ്ങളിലായി ഒരേ സമയം ഉദ്ഘാടനം നടക്കും. സംസ്ഥാനതല ഉദ്ഘാടനം തിരുവനന്തപുരം മലയിന്കീഴ് ഗവണ്മെന്റ് വിഎച്ച്എസ്എസില് മുഖ്യമന്ത്രി പിണറായി വിജയന് നിര്വഹിക്കും.
പൊതുവിദ്യാഭ്യാസ മന്ത്രി അധ്യക്ഷത വഹിക്കുന്ന പരിപാടിയില് മന്ത്രിമാരായ ആന്റണി രാജു, ജി ആര് അനില് എന്നിവര് പങ്കെടുക്കും. സ്കൂള് പ്രവേശനത്തിന്റെ എല്ലാ മുന്നൊരുക്കങ്ങളും പൂര്ത്തിയായതായി മന്ത്രി .ഗതാഗതം, ശുചീകരണം, കുടിവെള്ളം, സ്കൂള് വാഹനങ്ങളുടെ ഫിറ്റ്നസ്, മാലിന്യനിര്മാര്ജനം, ദുരന്തനിവാരണ ബോധവല്ക്കരണം, കൗണ്സിലിങ് തുടങ്ങിയ കാര്യങ്ങളെല്ലാം പൂര്ത്തിയായി വരുന്നെന്നും മന്ത്രി അറിയിച്ചു.
ലഹരിവിരുദ്ധ പ്രവര്ത്തനങ്ങള്ക്ക് പ്രത്യേക ഊന്നല് നല്കുമെന്നും എല്ലാ സ്കൂളുകളിലും ലഹരിവിരുദ്ധ ജനജാഗ്രതാ സമിതികള് രൂപീകരിക്കാന് തീരുമാനിച്ചിട്ടുണ്ടെന്നും അദ്ദേഹം പറഞ്ഞു. കുട്ടികള്ക്കുള്ള പാഠപുസ്തക വിതരണം, യൂണിഫോം വിതരണം എന്നിവ 95 ശതമാനവും പൂര്ത്തിയായതായി മന്ത്രി അറിയിച്ചു.
കേന്ദ്രവിദ്യാഭ്യാസ നയപ്രകാരം എല്പി വിഭാഗത്തില് ഒരു അധ്യായന വര്ഷം 800 മണിക്കൂറുകളും യുപിയില് 1000 മണിക്കൂറുകളും ഹൈസ്കൂള്, ഹയര് സെക്കന്ഡറി വിഭാഗങ്ങളില് 1200 മണിക്കൂറുകള് വീതവുമാണ് അധ്യയനം വിഭാവനം ചെയ്തിട്ടുള്ളത്. ഇക്കാര്യത്തില് അധ്യാപക സംഘടനകള്, മറ്റ് വിദഗ്ധര് എന്നിവരുമായി ആലോചിച്ച് സര്ക്കാര് തീരുമാനമെടുക്കുമെന്നും മന്ത്രി അറിയിച്ചു.
കവി മുരുകന് കാട്ടാക്കട രചിച്ച 'മിന്നാമിനുങ്ങിനെ പിടിക്കലല്ല ജീവിതം, സൂര്യനെ പിടിക്കണം...' എന്ന പ്രവേശനോത്സവ ഗാനത്തിന്റെ സിഡി കുട്ടികള്ക്ക് നല്കി മന്ത്രി ശിവന്കുട്ടി വാര്ത്താസമ്മേളനത്തില് പ്രകാശനം ചെയ്തു. പ്രശസ്ത ഗായിക മഞ്ജരിയാണ് വിജയ് കരുണ് സംഗീതം പകര്ന്ന ഗാനം ആലപിച്ചിരിക്കുന്നത്.
https://www.facebook.com/Malayalivartha
