തലസ്ഥാനത്തെ മെഡിക്കല്‍ കോളജ് ആശുപത്രിയില്‍ കൂട്ടിരിക്കാനെത്തിയ 16 കാരിയെ കടത്തിക്കൊണ്ടുപോയി പീഡിപ്പിച്ച് മാഞ്ഞാലിക്കുളം റോഡില്‍ ഉപേക്ഷിച്ച കേസില്‍ ഏക പ്രതി ഓട്ടോ ഡ്രൈവര്‍ ബോംബെ ഷമീറിനെതിരെ പോക്‌സോ കോടതിയില്‍ പോലീസ് കുറ്റപത്രം സമര്‍പ്പിച്ചു.

തിരുവനന്തപുരം പോക്‌സോ കോടതിയിലാണ് സിറ്റി മെഡിക്കല്‍ കോളേജ് പോലീസ് കുറ്റപത്രം സമര്‍പ്പിച്ചത്. സഹോദരിക്ക് കൂട്ടിരിക്കാനെത്തിയ പെണ്‍കുട്ടിയെയാണ് ഭീഷണിപ്പെടുത്തി പീഡിപ്പിച്ചത്. നിരവധി ക്രിമിനല്‍ കേസുകളിലെ പ്രതിയാണ് ഇടവ കാപ്പില്‍ വടക്കേവിള വീട്ടില്‍ ബോംബൈ ഷമീര്‍ എന്ന ഷമീര്‍ (36). മാര്‍ച്ച് 25 മുതല്‍ പ്രതി റിമാന്റ് പ്രതിയായി ജയിലില്‍ കഴിയുകയാണ്.



2023 മാര്‍ച്ച് 23 ന് രാത്രി 9.30 ന് ആശുപത്രിയില്‍ വച്ച് പരിചയപ്പെട്ട പെണ്‍കുട്ടിയെ തെറ്റിദ്ധരിപ്പിച്ച് ഓട്ടോയില്‍ തട്ടിക്കൊണ്ടു കൊണ്ടുപോയി ആളൊഴിഞ്ഞ സ്ഥലത്തെത്തിച്ച് പീഡിപ്പിച്ച ശേഷം വഴിയിലുപേക്ഷിച്ചെന്നാണ് കേസ്. പെണ്‍കുട്ടിയുടെ സഹോദരി മെഡിക്കല്‍ കോളജില്‍ ചികിത്സയിലായിരുന്നു. പെണ്‍കുട്ടി കൂട്ടിരിക്കാനാണ് മുത്തശ്ശിക്കൊപ്പം ഇവിടെ എത്തിയത്.



ഷെമീറിന്റെ ഭാര്യ മെഡിക്കല്‍ കോളജ് ആശുപത്രിക്ക് സമീപമുള്ള എസ്എടി ആശുപത്രിയില്‍ ചികിത്സയിലാണ്. ഇവിടെ വച്ച് പരിചയപ്പെട്ട പെണ്‍കുട്ടിയെ ഇയാള്‍ ഭീഷണിപ്പെടുത്തി ഓട്ടോയില്‍ കയറ്റുകയായിന്നു. തുടര്‍ന്ന് മാഞ്ഞാലിക്കുളം റോഡില്‍ ഇറക്കിവിട്ടു. പരാതിയില്‍ എസ്എടി ആശുപത്രിയ്ക്ക് സമീപത്തുനിന്നാണ് മെഡിക്കല്‍ കൊളജ് പൊലീസ് ഇയാളെ മാര്‍ച്ച് 25 ന് അറസ്റ്റു ചെയ്തത്.