'മെഡലുകള് ഗംഗയിലൊഴുക്കും, ഇന്ത്യാ ഗേറ്റില് മരണം വരെ നിരാഹാരം'; പിന്നോട്ടില്ലെന്ന് ഗുസ്തി താരങ്ങള്....വിയർപ്പിന് യാതൊരു വിലയുമില്ല...ആത്മാഭിമാനം പണയംവയ്ക്കില്ല..മരണം വരെ പോരാട്ടം..പ്രതിഷേധം കടുപ്പിച്ച് താരങ്ങൾ...
ഗുസ്തി ഫെഡറേഷന് തലവന് ബ്രിജ് ഭൂഷണ് ശരണ് സിങ്ങിനെതിരായ സമരത്തില് നിന്ന് പിന്നോട്ടില്ലെന്ന് ആവര്ത്തിച്ച് ഗുസ്തി താരങ്ങള്. തങ്ങളുടെ മെഡലുകള് ഗംഗാനദിയില് നിമജ്ജനം ചെയ്യുമെന്നും ഇന്ത്യാ ഗേറ്റില് അനിശ്ചിതകാല നിരാഹാര സമരം നടത്തുമെന്നും അവര് അറിയിച്ചു. ഡല്ഹിയിലെ ജന്തര് മന്തറിലെ സമരവേദിയില് നിന്ന് പൊലീസ് കസ്റ്റഡിയിലെടുത്തതിന് പിന്നാലെയാണ് പുതിയ പ്രഖ്യാപനം.ഹരിദ്വാറില് പോയി മെഡലുകള് വൈകുന്നേരം 6 മണിക്ക് ഗംഗ നദിയില് നിമജ്ജനം ചെയ്യുമെന്ന് ഗുസ്തി താരം സാക്ഷി മാലിക് ട്വിറ്ററില് പറഞ്ഞു. 'ഈ മെഡലുകള് ഞങ്ങളുടെ ജീവനാണ്, ഞങ്ങളുടെ ആത്മാവാണ്. ഇന്ന് അവ ഗംഗയില് എറിഞ്ഞതിന് ശേഷം ഞങ്ങള്ക്ക് ജീവിക്കാന് ഒരു കാരണവുമില്ല. അതിനാല്, ഞങ്ങള് മരണം വരെ ഇന്ത്യാ ഗേറ്റില് നിരാഹാര സമരം നടത്തും, താരം പ്രസ്താവനയില് വ്യക്തമാക്കി.
പ്രായപൂര്ത്തിയാകാത്ത പെണ്കുട്ടി ഉള്പ്പെടെയുള്ള വനിതാ അത്ലറ്റുകളെ ലൈംഗികമായി ചൂഷണം ചെയ്തെന്ന് ആരോപിച്ചാണ് ഡബ്ല്യുഎഫ്ഐ തലവന് ബ്രിജ് ഭൂഷണ് സിങ്ങിനെതിരെ വിനേഷ് ഫോഗട്ട്, സാക്ഷി മാലിക്, ബജ്രംഗ് പുനിയ എന്നിവരുള്പ്പെടെയുള്ള മുന്നിര ഗുസ്തിക്കാര് പ്രതിഷേധിക്കുന്നത്. പ്രായപൂർത്തിയാകാത്ത പെൺകുട്ടിയെ ലൈംഗികമായി പീഡിപ്പിച്ച കേസിലുൾപ്പെടെ ബ്രിജ് ഭൂഷൺ സിംഗിനെതിരെ രണ്ട് എഫ്ഐആറുകളാണ് നിലവിലുള്ളത്.നേരത്തെ ഏപ്രില് 23 ന് ജന്തര്മന്തറില് ആരംഭിച്ച പ്രതിഷേധം പുതിയ പാര്ലമെന്റ് മന്ദിരത്തിന്റെ ഉദ്ഘാടന ദിനത്തില് നടന്ന മാര്ച്ചിനിടെ ഡല്ഹി പോലീസ് ബലംപ്രയോഗിച്ച് അടിച്ചമര്ത്തിയിരുന്നു. പുതിയ പാര്ലമെന്റ് മന്ദിരത്തിലേക്കുള്ള മാര്ച്ച് നൂറുകണക്കിന് പോലീസും അര്ദ്ധസൈനിക ഉദ്യോഗസ്ഥരും തടഞ്ഞതോടെ നാടകീയമായ ദൃശ്യങ്ങള്ക്കാണ് രാജ്യം സാക്ഷ്യം വഹിച്ചത്. പ്രതിഷേധക്കാര് സുരക്ഷാ വലയം ഭേദിക്കാന് ശ്രമിച്ചപ്പോള് കടുത്ത ഉന്തും തള്ളുമുണ്ടായി. ഇതിനിടെ ഗുസ്തിക്കാരുടെ പ്രതിഷേധത്തില് കേന്ദ്രസര്ക്കാരിന്റെ നിഷ്ക്രിയത്വത്തെ അപലപിച്ച് കോണ്ഗ്രസിന്റെ രാഹുല് ഗാന്ധി, പ്രിയങ്ക ഗാന്ധി, ഡല്ഹി മുഖ്യമന്ത്രി അരവിന്ദ് കെജ്രിവാള്, പശ്ചിമ ബംഗാള് മുഖ്യമന്ത്രി മമത ബാനര്ജി എന്നിവരുള്പ്പെടെയുള്ള പ്രതിപക്ഷ നേതാക്കള് രംഗത്തെത്തി. ലൈംഗികാതിക്രമ ആരോപണങ്ങൾ അന്വേഷിക്കാൻ ഈ മാസം ആദ്യം ഡൽഹി പോലീസ് പ്രത്യേക അന്വേഷണ സംഘത്തെ (എസ്ഐടി) രൂപീകരിച്ചിരുന്നു. അതിനിടെ, ഗുസ്തി താരങ്ങളുടെ ആരോപണത്തിൽ അന്വേഷണം പൂർത്തിയാകുന്നതുവരെ ഗുസ്തി ഫെഡറേഷന്റെ എല്ലാ പ്രവർത്തനങ്ങളും കായിക മന്ത്രാലയം റദ്ദാക്കി.
അതേസമയം ഇന്നലെ നടന്ന സംഘർഷങ്ങൾക്ക് പിന്നാലെ ഗുസ്തി താരങ്ങളുടെ സമരവേദി ദില്ലി പൊലീസ് പൂർണ്ണമായും പൊളിച്ചുമാറ്റിയതോടെ സമരത്തിന്റെ ഭാവി അനിശ്ചിതത്തിൽ ആയിരിക്കുകയാണ്. സംഘർഷത്തിൽ ഗുസ്തി താരങ്ങൾക്ക് എതിരെ പൊലീസ് കേസെടുത്തിട്ടുണ്ട്.അതേസമയം ദില്ലി പൊലീസ് കസ്റ്റഡിയിലെടുത്ത ഗുസ്തി താരം ബജ്റംഗ് പുനിയയെ വിട്ടയച്ചു.രാത്രി ഏറെ വൈകിയാണ് പുനിയയെ വിട്ടയച്ചത്. ലൈംഗിക പീഡനക്കേസിൽ പ്രതിയായ ആൾ പുതിയ പാർലമെന്റ് മന്ദിരത്തിന്റെ ഉദ്ഘാടനച്ചടങ്ങിൽ പങ്കെടുത്തത് നിർഭാഗ്യകരമെന്ന് ബജ്റംഗ് പുനിയ പ്രതികരിച്ചു. വനിതാ ഗുസ്തി താരങ്ങളെ പൊലീസ് നേരത്തേ വിട്ടയച്ചിരുന്നു.
https://www.facebook.com/Malayalivartha
