ഞെട്ടലോടെ വീണ്ടും... ആലപ്പുഴ കണ്ണൂര് എക്സിക്യൂട്ടീവ് എക്സ്പ്രസ് ട്രെയിനില് വീണ്ടും തീപിടിത്തം; ഒരു ബോഗി കത്തിനശിച്ചു: തീയിട്ടതെന്നു സംശയം; കോഴിക്കോട് എലത്തൂരില് തീവയ്പുണ്ടായ അതേ ട്രെയിനിലാണ് തീപിടിത്തമുണ്ടായത്
കേരളത്തെ ഞെട്ടിപ്പിക്കുന്ന മറ്റൊരു സംഭവം കൂടി. കോഴിക്കോട് എലത്തൂരില് തീവയ്പുണ്ടായ അതേ ട്രെയിനില് വീണ്ടും തീപിടിത്തം. കണ്ണൂര് റെയില്വേ സ്റ്റേഷനില് നിര്ത്തിയിട്ട ട്രെയിനിന്റെ ബോഗി കത്തിനശിച്ചു. മൂന്നാം പ്ലാറ്റ് ഫോമിനു സമീപം ഏട്ടാമത്തെ യാര്ഡില് ഹാള്ട്ട് ചെയ്തിരുന്ന ആലപ്പുഴ കണ്ണൂര് എക്സിക്യൂട്ടീവ് എക്സ്പ്രസ് ട്രെയിനിന്റെ ബോഗിയാണ് കത്തിയത്.
രാത്രി ഒന്നരയോടെയാണ് സംഭവം. ആര്ക്കും പരുക്കില്ല. തീയിട്ടതെന്നു സംശയിക്കുന്നതായി റെയില്വേ അധികൃതര് പറയുന്നു. രാത്രി പതിനൊന്നോടെ എത്തിയ ട്രെയിന് നിര്ത്തിയിട്ടതാണ്. ഒരു ബോഗി പൂര്ണമായും കത്തിനശിച്ചു. പുറമേനിന്നു തീയിട്ടതാകാമെന്നാണ് പ്രാഥമിക നിഗമനം. ഏറ്റവും പിറകിലെ മൂന്നാമത്തെ ബോഗിയാണ് കത്തിയത്.മൂന്ന് യൂണിറ്റ് അഗ്നിശമന സേനാ സംഘം ഏറെ നേരം പ്രയത്നിച്ചാണ് നിയന്ത്രണ വിധേയമാക്കിയത്.
സമീപ ബോഗികള്ക്ക് കേടുപാട് ഉണ്ടായിട്ടില്ല. തീ ഉയരുന്നത് റയില്വേ ' ജീവനക്കാരാണ് ആദ്യം കണ്ടത്. അഗ്നിശമന സേനയുടെ വാഹനത്തിന് ഇവിടേക്ക് എത്താന് തടസമായത് പ്രതിസന്ധിക്ക് ഇടയാക്കി. ഇന്ന് ഉച്ചയ്ക്ക് ഇന്റര്സിറ്റി എക്സ്പ്രസായി സര്വീസ് നടത്തേണ്ടതാണ് ഈ ട്രെയിന്.
അതേസമയം എലത്തൂര് ട്രെയിന് തീവയ്പ്പ് കേസില് പ്രതി ഷാരൂഖ് സെയ്ഫിയുടെ റിമാന്ഡ് കാലാവധി നീട്ടി. അടുത്തമാസം ഒന്നാം തീയതി വരെയാണ് നീട്ടിയത്. എന് ഐ എ കോടതിയുടെതാണ് നടപടി. കേസില് എന് ഐ എ യുടെ അന്വേഷണം തുടരുകയാണ്. നേരത്തെ രണ്ട് പ്രാവശ്യമായി 10 ദിവസത്തേക്ക് ഷാരൂഖ് സെയ്ഫിയെ കസ്റ്റഡിയില് വിട്ടിരുന്നു.
കസ്റ്റഡി കാലയളവില് ഷാറൂഖ് സെയ്ഫിയെ എലത്തൂര് അടക്കമുള്ള വിവിധ ഇടങ്ങളില് എത്തിച്ച് തെളിവെടുപ്പ് നടത്തിയിരുന്നു. ഇതിന് പുറമേ ഷഹീന്ബാഗിലും പരിസരപ്രദേശങ്ങളിലും എന് ഐ എ പരിശോധന നടത്തിയിരുന്നു. അന്വേഷണത്തിന്റെ ഭാഗമായി ഷാറൂഖ് സെയ്ഫിയുടെ ബന്ധുക്കളെയും സുഹൃത്തുക്കളെയും എന് ഐ എ ചോദ്യം ചെയ്തിട്ടുണ്ട്.
അതേസമയം എലത്തൂര് ട്രെയിന് ആക്രമണ കേസിന്റെ അന്വേഷണ ചുമതലയിലുണ്ടായിരുന്ന എടിഎസ് സ്ക്വാഡിന്റെ തലവന് ഐജി പി വിജയനെ സര്വീസില് നിന്ന് സസ്പെന്റ് ചെയ്തിരുന്നു. എലത്തൂര് ട്രെയിന് ആക്രമണ കേസിലെ പ്രതി ഷാറൂഖ് സെയ്ഫിയെ മുംബൈയില് നിന്ന് കൊണ്ടുവന്ന ഉദ്യോഗസ്ഥരുമായി ബന്ധപ്പെട്ടുവെന്ന കാരണത്തിലാണ് സസ്പെന്ഷന്. അന്വേഷണവുമായി ബന്ധമില്ലാത്ത ഐജി പി വിജയന് ഉദ്യോഗസ്ഥരെ ബന്ധപ്പെട്ടതിനെതിരെ എഡിജിപി എംആര് അജിത് കുമാറാണ് റിപ്പോര്ട്ട് നല്കിയത്. ഇതിന്റെ അടിസ്ഥാനത്തിലാണ് സസ്പെന്ഷന് ഉത്തരവ് നല്കിയത്.
റിപ്പോര്ട്ടിന് മേലുള്ള തുടരന്വേഷണം നടന്നു വരികയാണ്. സംസ്ഥാനത്തെ മുതിര്ന്ന പൊലീസ് ഉദ്യോഗസ്ഥരില് ഒരാളാണ് ഐജി പി വിജയന്. എലത്തൂര് ട്രെയിന് ആക്രമണം നടന്ന ഉടന് ഐജി പി വിജയന് സ്ഥലത്തെത്തിയിരുന്നു. പിന്നാലെ തീവ്രവാദ വിരുദ്ധ സ്ക്വാഡ് സംഭവത്തില് അന്വേഷണം ആരംഭിച്ചു. ഇതിന് ശേഷമാണ് എഡിജിപി എംആര് അജിത് കുമാറിന്റെ നേതൃത്വത്തില് പ്രത്യേക സംഘത്തെ അന്വേഷണത്തിനായി നിയോഗിച്ചത്.
അന്വേഷണ ഘട്ടത്തില് പൊലീസ് സേനയിലുണ്ടായ തര്ക്കമാണ് ഇപ്പോഴത്തെ നടപടിക്ക് കാരണം എന്നാണ് വിവരം. സംഭവത്തില് ഗ്രേഡ് എസ്ഐയായ മറ്റൊരാള്ക്കെതിരെയും നടപടിക്ക് ശുപാര്ശ ചെയ്തിട്ടുണ്ട്. സംസ്ഥാനത്തെ മികച്ച പൊലീസ് ഉദ്യോഗസ്ഥരില് ഒരാളെന്ന് പേരെടുത്തയാളാണ് ഐജി പി വിജയന്. എന്നാല് എറണാകുളം ഐജിയായ ശേഷം ഇദ്ദേഹത്തെ പ്രധാനപ്പെട്ട ചുമതലകളില് നിയോഗിച്ചിരുന്നില്ല. ഇതിന് പിന്നില് സംസ്ഥാന പൊലീസ് സേനയിലെ ആഭ്യന്തര തര്ക്കങ്ങളും കാരണമാണെന്നാണ് വിവരം. എലത്തൂര് ട്രെയിന് ആക്രമണ കേസ് റിപ്പോര്ട്ട് ചെയ്ത ഘട്ടത്തില് സംസ്ഥാനത്തെ തീവ്രവാദ വിരുദ്ധ സേനയുടെ മേധാവി ഐജി പി വിജയനായിരുന്നു. കേസന്വേഷണം എന്ഐഎ ഏറ്റെടുത്തതിന് പിന്നാലെ അദ്ദേഹത്തെ ചുമതലയില് നിന്ന് നീക്കിയിരുന്നു.
"
https://www.facebook.com/Malayalivartha
