മിന്നല് മുരളിയായി അരിക്കൊമ്പന്... അരിക്കൊമ്പന് വീണ്ടും വാര്ത്തകളില് നിറയുന്നു; ആന മേഘമലയില് എത്താതെ തടയണമെന്ന ആവശ്യവുമായി പ്രദേശവാസികള് രംഗത്ത്; അരിക്കൊമ്പനെ കേരളത്തിലെത്തിക്കണമെന്ന സാബു എം. ജേക്കബിന്റെ ഹര്ജി തള്ളി
അങ്ങനെ അരിക്കൊമ്പന് വീണ്ടും വാര്ത്തകളില് നിറയുകയാണ്. തമിഴ്നാട് വനം വകുപ്പ് മയക്കുവെടി വയ്ക്കാന് മഷിയിട്ട് നോക്കിയിട്ടും കാണാത്ത അരിക്കൊമ്പന് വീണ്ടും പൊങ്ങി. അരിക്കൊമ്പന് വീണ്ടും മേഘമല മലനിരകളിലേക്കു നീങ്ങുന്നു.
ആന മേഘമലയില് എത്താതെ തടയണമെന്ന ആവശ്യവുമായി പ്രദേശവാസികള് രംഗത്തെത്തി. ഷണ്മുഖ നദി അണക്കെട്ടിനു സമീപത്തു നിന്നു വനാതിര്ത്തിയിലൂടെ നീങ്ങിയ ആനയെ വനപാലകര് മേഘമല ഭാഗത്തേക്ക് ഓടിച്ചു വിടുകയാണ് എന്നാണു പ്രദേശവാസികളുടെ പരാതി.
ചിന്നക്കനാല് ലക്ഷ്യമാക്കിത്തന്നെയാണു ആന നീങ്ങുന്നതെന്നാണു നിരീക്ഷണ സംഘത്തിന്റെ വിലയിരുത്തല്. നിലവിലെ സാഹചര്യത്തില് ജനവാസ മേഖല കടക്കാതെ ആനയ്ക്ക് ഈ ലക്ഷ്യത്തില് എത്താന് കഴിയില്ല. ആന ജനവാസ മേഖലയില് കടക്കുന്നത് എങ്ങനെയും തടയുക എന്നതാണു തമിഴ്നാട് ലക്ഷ്യമിട്ടിരിക്കുന്നത്. റേഡിയോ കോളറില് നിന്നുള്ള സിഗ്നല് കൃത്യമായി ലഭിക്കാത്തതിനാല് കാടിനുള്ളിലേക്കും നിരീക്ഷണം വ്യാപിപ്പിക്കാന് തീരുമാനിച്ചിട്ടുണ്ട്. ഇതിനായി കാടിനുള്ളില് സഞ്ചരിച്ചു പരിചയമുള്ളവരെകൂടി നിരീക്ഷണ സംഘത്തില് ഉള്പ്പെടുത്തിയിട്ടുണ്ട്.
ആനയെ ഇവിടെ നിന്ന് പിടികൂടി കൊണ്ടുപോകാന് തീരുമാനിച്ചിരുന്ന വെള്ളിമലവരെ വനത്തിലൂടെ ആനയെ എത്തിക്കാന് കഴിയുമോ എന്ന കാര്യവും ഇവര് പരിശോധിക്കുന്നുണ്ട്. മേഘമലയിലേക്ക് ആന വരുന്നതായി വിവരം ലഭിച്ചിട്ടുണ്ടെന്നു തോട്ടം തൊഴിലാളിയും ഹൈവേയ്സ് ടൗണ് പഞ്ചായത്ത് അംഗവുമായ തങ്കദുരൈ പറഞ്ഞു. അരിക്കൊമ്പന് മൂലം ഒരു മാസമായി വിനോദ സഞ്ചാരികള്ക്കു മേഘമലയിലേക്കു പ്രവേശനം നിരോധിച്ചിരിക്കുകയാണ്. ടൂറിസത്തെ ആശ്രയിക്കുന്ന ഒട്ടേറെ ആളുകളുടെ തൊഴില് പ്രതിസന്ധിയിലാണ്. അതിനാല് ആനയെ പിടികൂടി മാറ്റണം എന്നും തങ്കദുരൈ ആവശ്യപ്പെട്ടു.
അതേസമയം പുരകത്തുമ്പോള് ആനയെ പിടിക്കാനിറങ്ങിയ മുതലാളിയ്ക്ക് പണി കിട്ടി. അരിക്കൊമ്പനെ പിടികൂടിയാല് കേരളത്തിലെ മറ്റൊരു ഫോറസ്റ്റ് ഡിവിഷനിലേക്കു മാറ്റണമെന്ന് ഉള്പ്പെടെയുള്ള ആവശ്യങ്ങള് ഉന്നയിച്ചു ട്വന്റി 20 പാര്ട്ടി പ്രസിഡന്റ് സാബു എം. ജേക്കബ് നല്കിയ ഹര്ജി ഹൈക്കോടതി ഡിവിഷന് ബെഞ്ച് തള്ളി. ഹര്ജിയുടെ ഉദ്ദേശ്യശുദ്ധിയില് സംശയം പ്രകടിപ്പിച്ച ജസ്റ്റിസ് അലക്സാണ്ടര് തോമസ്, ജസ്റ്റിസ് സി.ജയചന്ദ്രന് എന്നിവര് ഉള്പ്പെട്ട ഡിവിഷന് ബെഞ്ച് എന്തുകൊണ്ടാണ് ആനയെ കേരളത്തിലേക്ക് കൊണ്ടുവരണമെന്ന് ആവശ്യപ്പെടുന്നതെന്ന് ആരാഞ്ഞു. ഹര്ജിയിലെ ആവശ്യങ്ങള്ക്ക് പിന്ബലമേകുന്ന വസ്തുതകളോ നിയമവശങ്ങളോ ഹാജരാക്കാനായില്ലെന്നു െഹെക്കോടതി വിലയിരുത്തി.
എന്താണ് ഹര്ജിക്കാരന് ഇക്കാര്യത്തിലുള്ള വൈദഗ്ധ്യം, ബന്ധപ്പെട്ട തമിഴ്നാട് ഉദ്യോഗസ്ഥര് അരിക്കൊമ്പനുനേരെ ക്രൂരത കാട്ടിയെന്നു വ്യക്തമാക്കാന് വസ്തുതകളുണ്ടോ, അരിക്കൊമ്പന്റെ തുമ്പിക്കൈയിലുള്ള പരുക്ക് തമിഴ്നാട് ഉദ്യോഗസ്ഥരും പ്രദേശവാസികളും മൂലമാണോ, നിയമ പ്രകാരമുള്ള ഉത്തരവാദിത്തങ്ങള് നിര്വഹിക്കുന്നതില് കേന്ദ്ര, തമിഴ്നാട് സര്ക്കാര് ഉദ്യോഗസ്ഥര് വീഴ്ച വരുത്തിയോ, ഹര്ജിക്കാരനും അഭിഭാഷകനും വനമേഖലയില് താമസിച്ചിട്ടുണ്ടോ, കാട്ടാനയുടെ മുന്നില്പെട്ടിട്ടുണ്ടോ,ആനയെ കേരളത്തിലേക്ക് കൊണ്ടുവരാന് ഹര്ജിക്കാരന് ചെലവ് വഹിക്കുമോ തുടങ്ങിയ ചോദ്യങ്ങള് കോടതി ഉന്നയിച്ചു.
എന്നാല് ഇതിനു വസ്തുതാപരമായ മറുപടി നല്കാന് ഹര്ജിക്കാരനു കഴിഞ്ഞില്ലെന്നു കോടതി പറഞ്ഞു. ആനയെ ഉള്വനത്തിലേക്കു മാറ്റാനുള്ള തമിഴ്നാട് ചീഫ് വൈല്ഡ് ലൈഫ് വാര്ഡന്റെ ഉത്തരവ് നിയമപ്രകാരമാണെന്നു വിലയിരുത്തിയ ഹൈക്കോടതി ഈ ഉത്തരവിന്റെ നിയമസാധുത ഹര്ജിയില് ചോദ്യം ചെയ്തിട്ടില്ലെന്നു ചൂണ്ടിക്കാട്ടി. തമിഴ്നാട്ടിലാണ് ആനയുള്ളത്. ഹര്ജിക്കാരന് മദ്രാസ് ഹൈക്കോടതിയെ സമീപിക്കുകയാണെങ്കില് കേരള ഹൈക്കോടതി ഉത്തരവിലെ പരാമര്ശങ്ങള് ബാധകമായിരിക്കില്ലെന്നു ഡിവിഷന് ബെഞ്ച് വ്യക്തമാക്കി.
"
https://www.facebook.com/Malayalivartha
