കവര്ച്ചാ തൊണ്ടി മുതല് വീണ്ടെടുക്കാതെ പ്രതിയുമായി ഒത്തു കളിച്ചുള്ള പേരൂര്ക്കട പോലീസ് കുറ്റപത്രം... മജിസ്ട്രേട്ട് കോടതി തള്ളി തുടരന്വേഷണത്തിന് ഉത്തരവിട്ടു, പ്രതിക്ക് മുന്കൂര് ജാമ്യം നിഷേധിച്ച് ജില്ലാ കോടതിയും
കവര്ച്ചാ കേസില് തൊണ്ടി മുതല് വീണ്ടെടുക്കാതെ പ്രതിയുമായി ഒത്തു കളിച്ചുള്ള പേരൂര്ക്കട പോലീസ് കുറ്റപത്രം
മജിസ്ട്രേട്ട് കോടതി തള്ളി തുടരന്വേഷണത്തിന് ഉത്തരവിട്ടു. തിരുവനന്തപുരം പതിനൊന്നാം ജുഡീഷ്യല് ഫസ്റ്റ് ക്ലാസ് മജിസ്ട്രേട്ട് ലെനി തോമസ് കുരാകറിന്റേതാണുത്തരവ്. തെളിവു ശേഖരിക്കാതെയുള്ള അപൂര്ണ്ണമായതും പക്ഷപാതപരവുമായ കുറ്റപത്രമാണ് തള്ളി ക്രിമിനല് നടപടിക്രമം ചട്ടം 173 (8) പ്രകാരം തുടരന്വേഷണത്തിന് കോടതി ഉത്തരവിട്ടത്.
പ്രതിയെ അറസ്റ്റ് ചെയ്യുകയോ കസ്റ്റഡിയില് ചോദ്യം ചെയ്ത് തൊണ്ടി മുതല് വീണ്ടെടുക്കുകയോ ചെയ്യാതെ പ്രതിയുമായി ഒത്തു കളിച്ച് കേരളാ പോലീസ് അന്തിമ റിപ്പോര്ട്ടായ ക്രിമിനല് നടപടിക്രമത്തിലെ ചട്ടം 173 പ്രകാരമുള്ള കുറ്റപത്രം സമര്പ്പിച്ചതിന് കേസ് ചാര്ജിംഗ് ഓഫീസറായ പേരൂര്ക്കട സര്ക്കിള് ഇന്സ്പെക്ടറെ കോടതി രൂക്ഷമായി ശാസിച്ചു.
പോലീസ് ട്രെയിനിംഗ് കോളേജില് ഇതൊക്കെയാണോ പഠിപ്പിക്കുന്നതെന്നും കോടതി ചോദിച്ചു. വളഞ്ഞ വഴിയിലൂടെയും വളയമില്ലാതെ ചാടിയുമുള്ള റിപ്പോര്ട്ടുകള് കോടതി സ്വീകരിക്കുമെന്നാണോ കരുതിയിരിക്കുന്നതെന്നും കോടതി ചോദിച്ചു. 2021 ല് നടന്ന പിടിച്ചുപറി കേസിലാണ് (പേരൂര്ക്കട പി. എസ്. ക്രൈം 2071/2021) പോലീസ് പ്രതിക്ക് മുന്കൂര് ജാമ്യം നേടിക്കൊടുക്കുവാനായി പ്രതിയെ അറസ്റ്റ് ചെയ്യാതെ 2023 ല് കുറ്റപത്രം സമര്പ്പിച്ചത്.
പ്രതിക്ക് ജയില് റിമാന്റ് ഒഴിവാക്കി ജാമ്യം ലഭിക്കാനായാണ് പോലീസ് അന്വേഷണം പൂര്ത്തിയാക്കിയെന്ന് കാട്ടി കുറ്റപത്രം സമര്പ്പിച്ചതെന്നാണ് ആക്ഷേപം ഉയര്ന്നിരിക്കുന്നത്. പ്രതിക്ക് എളുപ്പത്തില് ജാമ്യം ലഭിക്കാന് പ്രതിയെ ഒളിവിലിട്ട് ചാര്ജ് ഷീറ്റ് സമര്പ്പിക്കുന്നതാണ് സ്റ്റേഷന് റൈറ്ററും അന്വേഷണ ഉദ്യോസ്ഥനുമടങ്ങുന്ന പോലീസ് ഉദ്യോഗസ്ഥരുടെ രീതി.
പോലീസിന്റെ ഈ അഴിമതി കോടതി മനസിലാക്കിയാണ് കുറ്റപത്രം തള്ളി കോടതി നിര്ണ്ണായക ഉത്തരവ് പുറപ്പെടുവിച്ചത്.കുടപ്പനക്കുന്ന് ജയപ്രകാശ് ലെയിനില് സാബു എന്ന ബിജുകുമാര് (40) നെ ഏക പ്രതിയാക്കിയാണ് പോലീസ് നാമമാത്ര കുറ്റപത്രം സമര്പ്പിച്ചത്.
മജിസ്ട്രേട്ട് കോടതി പോലീസ് ഒത്തുകളി കുറ്റപത്രം തള്ളി തുടരന്വേഷണത്തിനുത്തരവിട്ടതോടെയാണ് പ്രതി മെയ് 27 ന് മുന്കൂര് ജാമ്യം തേടി തിരുവനന്തപുരം ജില്ലാ സെഷന്സ് കോടതിയെ സമീപിച്ചത്.
പ്രതിക്ക് മുന്കൂര് ജാമ്യം നിഷേധിച്ച് ജില്ലാ കോടതിയും ഉത്തരവിട്ടു. തുടരന്വേഷണത്തിന് മജിസ്ട്രേട്ട് കോടതി പുറപ്പെടുവിച്ച ഉത്തരവും പ്രതിയെ കസ്റ്റഡിയില് വച്ച് ചോദ്യം ചെയ്ത് കുറ്റസമ്മത മൊഴി രേഖപ്പെടുത്തി പ്രതി നയിച്ചാനയിച്ച വഴിയേ പ്രതിയുമൊത്ത് സഞ്ചരിച്ച് തൊണ്ടി മുതല് കണ്ടെത്തി അവ വീണ്ടെടുക്കേണ്ട സാഹചര്യവും പോലീസ് ഒത്തു കളിയും വിലയിരുത്തുമ്പോള് പ്രതിക്ക് ' പ്രീ - അറസ്റ്റ് ബെയില് '' ആയ അറസ്റ്റിന് മുമ്പുള്ള മുന്കൂര് ജാമ്യത്തിന് അര്ഹതയില്ലെന്ന് വിലയിരുത്തിയാണ് ജില്ലാ കോടതി പ്രതിക്ക് മുന്കൂര് ജാമ്യം നിരസിച്ചത്.
"
https://www.facebook.com/Malayalivartha
