മദ്യലഹരിയില്‍ കാറിടിപ്പിച്ച് ബി എസ് എന്‍ എല്‍ കേബിള്‍ തൊഴിലാളിയെ കൊലപ്പെടുത്തിയ പേരൂര്‍ക്കട നരഹത്യ കേസില്‍ കുറ്റം ചുമത്തലിന് ഹാജരാകാന്‍ പ്രതിക്ക് ജില്ലാ കോടതി അന്ത്യശാസനം നല്‍കി.

ഹാജരാകാന്‍ കൂടുതല്‍ സമയം തേടിയുള്ള പ്രതിയുടെ ആവശ്യം തള്ളിക്കൊണ്ടാണ് തിരുവനന്തപുരം അഡീ. ജില്ലാ സെഷന്‍സ് കോടതിയുടെ ഉത്തരവ്. കാറുടമയും ഡ്രൈവറുമായ പേരൂര്‍ക്കട അമ്പലമുക്ക് സ്വദേശി അജയഘോഷ് (56) എന്ന പ്രതി ജൂലൈ 6 ന് ഹാജരാകാനാണുത്തരവ്.


പേരൂര്‍ക്കട - അമ്പലംമുക്ക് വണ്‍വേ റോഡില്‍ 2020 മാര്‍ച്ച് 7 ന് രാത്രി 10.45 മണിക്കാണ് സംഭവം നടന്നത്. മദ്യലഹരിയില്‍ കാറോടിച്ച് ട്രാഫിക് കണ്‍ട്രോള്‍ അടയാളങ്ങളെയും സൈന്‍ ബോഡുകളും ഡൈവേര്‍ഷന്‍ ബാരിക്കേഡുകളും ഇടിച്ച് തെറിപ്പിച്ച് വണ്‍വേയുടെ മധ്യഭാഗത്ത് കേബിള്‍ റെസ്റ്റോറേഷന്‍ വര്‍ക്കിന് വേണ്ടി കുഴിയെടുത്ത് മറ്റു ജോലിക്കാരോടൊപ്പം കുഴിക്കകത്ത് നിന്ന് കുഴിതെളിച്ചു കൊണ്ടു നിന്ന 38 കാരനായ ജോണ്‍ ഫ്രെഡിനെ കൊലപ്പെടുത്തുകയായിരുന്നു.


ഇന്ത്യന്‍ ശിക്ഷാ നിയമത്തിലെ 279 ( അലക്ഷ്യമായും അശ്രദ്ധമായും മനുഷ്യജീവന് ആപത്തു വരത്തക്ക വിധം വാഹനമോടിക്കല്‍) , 304 (മരണം സംഭവിക്കുമെന്ന അറിവോടെ ചെയ്ത നരഹത്യ) , മോട്ടോര്‍ വാഹന നിയമത്തിലെ 185 ( മദ്യപിച്ച് വാഹനമോടിക്കല്‍) എന്നീ വകുപ്പുകള്‍ പ്രകാരം കേസെടുത്താണ് പ്രതിയെ ഹാജരാക്കാന്‍ കോടതി ആവശ്യപ്പെട്ടത്.

ജോണിന്റെ ശരീരത്തില്‍ കാര്‍ കൊണ്ടുവന്നിടിച്ച് ജോണിനെയും വഹിച്ചുകൊണ്ട് മുന്നോട്ട് പോയി തലയ്ക്കും ശരീരത്തിലെ മറ്റു ഭാഗങ്ങള്‍ക്കും ആഴത്തിലുള്ള മുറിവുകള്‍ സംഭവിപ്പിച്ച് മരണം സംഭവിക്കുന്നതിന് ഇടയാക്കി മദ്യപിച്ച് വാഹനമോടിച്ചാല്‍ മനുഷ്യ ജീവന് ആപത്തും ജീവഹാനിയും സംഭവിക്കുമെന്ന് അറിവുണ്ടായിരുന്ന പ്രതി ആയതിന് വിപരീതമായി പ്രവര്‍ത്തിച്ച് കൊലപാതകമല്ലാത്ത കുറ്റകരമായ നരഹത്യ ചെയ്തുവെന്നാണ് കേസ്.