അമ്മയറിഞ്ഞില്ല...മകന്‍ മരിച്ചത്... മനോനില തെറ്റിയ അമ്മ മകന്റെ മൃതദേഹത്തോടൊപ്പം കഴിച്ചുകൂട്ടിയത് രണ്ടു രാത്രിയും ഒരു പകലും....പെന്‍ഷന്‍ നല്‍കാന്‍ ബാങ്ക് ജീവനക്കാര്‍ എത്തിയപ്പോഴാണ് മരണവിവരം പുറത്തറിഞ്ഞത്.

ഉറക്കം രണ്ടു രാത്രിയും ഒരു പകലും നീളില്ലെന്നത് തിരിച്ചറിയാനുള്ള മനോനിലയും ആ അമ്മക്ക് കൈമോശം വന്നുപോയിരുന്നു, മൂന്നാണ്ടുകള്‍ക്ക് മുമ്പ് തനിക്കേറെ പ്രിയപ്പെട്ട മകന്‍ ഗിരീശന്റെ ജീവന്‍ പുഴയെടുത്ത നാളുകള്‍ക്ക് ശേഷം. അവസാനം കൂട്ടായി കൂടെയുണ്ടായിരുന്ന മകനും മരിച്ചതറിയാതെ ആ അമ്മ മൃതദേഹത്തിനൊപ്പം കഴിച്ചുകൂട്ടി മൂന്ന് ദിവസത്തോളം.

വളയം കല്ലുനിരയില്‍ കടോംതണ്ണിക്കല്‍ മൂന്നാംകുനിയില്‍ രമേശനെ (42)യാണ് വീട്ടിനകത്ത് മരിച്ചനിലയില്‍ കണ്ടെത്തിയത്. അമ്മയും രമേശനും മാത്രമായിരുന്നു വീട്ടില്‍. മനസ്സിന്റെ താളപ്പിഴക്കിടയിലും ആ അമ്മ കൂലിപ്പണി ചെയ്താണ് കുടുംബം നോക്കിയിരുന്നത്.

അതേസമയം സാമൂഹിക ക്ഷേമ പെന്‍ഷന്‍ നല്‍കാന്‍ എത്തിയതായിരുന്നു ബാങ്ക് ജീവനക്കാര്‍. ദുര്‍ഗന്ധം കാരണം അകത്തു കയറി നോക്കിയപ്പോഴാണ് രമേശനെ കട്ടിലില്‍ മരിച്ച നിലയില്‍ കണ്ടെത്തിയത്. 3 ദിവസം പഴക്കമുണ്ടെന്നാണ് കരുതുന്നത്. കോഴിക്കോട് മെഡിക്കല്‍ കോളജ് ആശുപത്രിയിലേക്കു മാറ്റി.